ಐಂದ್ರಿತಾ ಅಡ್ವೆಂಚರ್‌ ಕ್ರೇಜ್‌

Team Udayavani, Jan 26, 2021, 3:40 PM IST

ಮದುವೆಯ ಬಳಿಕ ನಟಿ ಐಂದ್ರಿತಾ ರೇ, ಸದ್ಯ ಈ ವರ್ಷ ಒಂದರ ಹಿಂದೊಂದು ಚಿತ್ರಗಳ ಮೂಲಕ ಪ್ರೇಕ್ಷಕರ ಮುಂದೆ ಬರುವ ತಯಾರಿಯಲ್ಲಿದ್ದಾರೆ. ಈಗಾಗಲೇ ಐಂದ್ರಿತಾ ಅಭಿನಯಿಸಿರುವ “ಗರುಡ’, “ಪ್ರೇಮಂ ಪೂಜ್ಯಂ’ ಚಿತ್ರಗಳು ಬಿಡುಗಡೆಗೆ ಸಿದ್ಧವಾಗಿದೆ. ಇದರ ಹಿಂದೆಯೇ ದಿಗಂತ್‌ ಜೊತೆ ಮತ್ತೂಂದು ಹೊಸಚಿತ್ರದಲ್ಲಿ ನಾಯಕಿಯಾಗಿ ಅಭಿನಯಿಸುತ್ತಿದ್ದಾರೆ.

ಏನಿಲ್ಲವೆಂದರೂ ಈ ವರ್ಷ, ಎರಡು – ಮೂರು ಚಿತ್ರಗಳ ಮೂಲಕ ಕಂ ಬ್ಯಾಕ್‌ ಆಗೋದು ಗ್ಯಾರಂಟಿ ಎಂಬ ನಿರೀಕ್ಷೆಯಲ್ಲಿದ್ದಾರೆ ಐಂದ್ರಿತಾ ರೇ. ಇದೇ ವೇಳೆ ಮಾತಿಗೆ ಸಿಕ್ಕ ಐಂದ್ರಿತಾ ತಮ್ಮ ಮುಂಬರುವ ಚಿತ್ರಗಳು, ಮ್ಯಾರೀಡ್‌ ಲೈಫ್ ಬಗ್ಗೆ ಕೆಲ ವಿಚಾರಗಳನ್ನು ಹಂಚಿಕೊಂಡಿದ್ದಾರೆ.

ಇದನ್ನೂ ಓದಿ: ಇಂದು ಸಂಜೆ ಇನ್ಸ್‌ಪೆಕ್ಟರ್‌ ವಿಕ್ರಂ ಟ್ರೇಲರ್‌ ರಿಲೀಸ್‌

“ಮದುವೆಯಾದ ಬಳಿಕ ಮೊದಲ ಬಾರಿಗೆ ನಾನು ಅಭಿನಯಿಸಿರುವ ಮೂರು ಸಿನಿಮಾಗಳು ಈ ವರ್ಷ ರಿಲೀಸ್‌ ಆಗಬಹುದು ಎಂಬ ನಿರೀಕ್ಷೆ ಇದೆ. ಇನ್ನು ದಿಗಂತ್‌ ಜೊತೆ ಕೂಡ ಮದುವೆಯ ಬಳಿಕ ಮೊದಲ ಬಾರಿಗೆ ಹೀರೋಯಿನ್‌ ಆಗಿ ಅಭಿನಯಿಸಿದ್ದೇನೆ. ಆ ಸಿನಿಮಾದ ಶೂಟಿಂಗ್‌ ಕೂಡ ಮುಗಿದಿದೆ. ಇದರ ಜೊತೆಗೆ ಹಿಂದಿಯಲ್ಲಿ ಪ್ರತೀಕ್‌ ಗಾಂಧಿ ಅವರೊಂದಿಗೆ ನಟಿಸಿರುವ ಸಿನಿಮಾ ಕೂಡ ರೆಡಿಯಾಗಿದ್ದು, ಆ ಸಿನಿಮಾ ಕೂಡ ಈ ವರ್ಷವೇ ರಿಲೀಸ್‌ ಆಗುವ ಸಾಧ್ಯತೆ ಇದೆ. ಇವೆಲ್ಲದರ ಜೊತೆಗೆ ವಿಕ್ರಮ್‌ ಭಟ್‌ ನಿರ್ದೇಶನದ ವೆಬ್‌ ಸೀರಿಸ್‌ ಒಂದರಲ್ಲೂ ಅಭಿನಯಿಸುವ ಆಫ‌ರ್‌ ಬಂದಿದೆ. ಅದನ್ನೂ ಒಪ್ಪಿಕೊಂಡಿದ್ದೇನೆ. ಶೀಘ್ರದಲ್ಲಿಯೇ ಆ ವೆಬ್‌ ಸೀರಿಸ್‌ ಶೂಟಿಂಗ್‌ ಕೂಡ ಶುರುವಾಗುವ ಸಾಧ್ರಯತೆ ಇದೆ’ ಎನ್ನುತ್ತಾರೆ.

ಸಾಮಾನ್ಯವಾಗಿ ಮದುವೆಯಾದ ಮೇಲೆ ಬಹಳಷ್ಟು ನಟಿಯರು ದಪ್ಪವಾಗುತ್ತಾರೆ. ಆದರೆ ಐಂದ್ರಿತಾ ವಿಷಯದಲ್ಲಿ ಮಾತ್ರ ಇದು ಹಾಗಿಲ್ಲ. ಐಂದ್ರಿತಾ ರೇ ಮದುವೆಯ ಬಳಿಕ ಬಹಳ ಸಣ್ಣಗಾಗಿದ್ದಾರಂತೆ. ಅನೇಕರು ಇದೇ ಪ್ರಶ್ನೆಯನ್ನು ಐಂದ್ರಿತಾಗೂ ಕೇಳುತ್ತಿರುತ್ತಾರಂತೆ. ಈ ಪ್ರಶ್ನೆಗೆ ಉತ್ತರಿಸುವ ಐಂದ್ರಿತಾ, “ಮದುವೆಯ ಬಳಿಕ ಆ್ಯಕ್ಟಿಂಗ್‌ಗಿಂತ ಹೆಚ್ಚಾಗಿ ಅಡ್ವೆಂಚರ್‌ ಸ್ಪೋರ್ಟ್ಸ್ ನಲ್ಲಿ ತೊಡಗಿಸಿಕೊಂಡಿರುವುದು ಇದಕ್ಕೆ ಕಾರಣ. ಇದೇ ಬಹುಶಃ ತೆಳ್ಳಗಾಗಲು ಕಾರಣವಿರಬಹುದು’ ಎಂದು ನಸು ನಗುತ್ತಾರೆ.