Kannada Cinema; ಹಾರರ್ ಜತೆಗೆ ಫ್ಯಾಮಿಲಿ ಡ್ರಾಮಾ: ಮಾಯಾನಗರಿ ಮೇಲೆ ಅನೀಶ್ ನಿರೀಕ್ಷೆ

Team Udayavani, Dec 1, 2023, 5:52 PM IST

ಹಾರರ್‌ ಸಿನಿಮಾವಾಗಿ ಇದು ನನಗೆ ಮೊದಲ ಅನುಭವ’ – ಹೀಗೆ ಹೇಳಿ ನಕ್ಕರು ಅನೀಶ್‌ ತೇಜೇಶ್ವರ್‌. ಅವರು ಹೇಳಿದ್ದು “ಮಾಯಾನಗರಿ’ ಬಗ್ಗೆ. ಹೌದು, ಅನೀಶ್‌ ನಟನೆಯ “ಮಾಯಾನಗರಿ’ ಎಂಬ ಸಿನಿಮಾವೊಂದು ಬಿಡುಗಡೆಯ ಹಂತಕ್ಕೆ ಬಂದಿದೆ. ಚಿತ್ರ ಡಿಸೆಂಬರ್‌ 15ಕ್ಕೆ ತೆರಕಾಣುತ್ತಿದೆ. ಈ ಚಿತ್ರದ ಮೇಲೆ ಅನೀಶ್‌ ನಿರೀಕ್ಷೆ ಇಟ್ಟಿದ್ದಾರೆ. ಅದಕ್ಕೆ ಕಾರಣ ಕಥೆ.

“ನಿರ್ದೇಶಕರು ತುಂಬಾ ಚೆನ್ನಾಗಿ ಕಥೆ ಮಾಡಿಕೊಂಡಿದ್ದಾರೆ. ನನ್ನ ಕೆರಿಯರ್‌ನಲ್ಲಿ ಇದು ಹೊಸ ಬಗೆಯ ಸಿನಿಮಾ. ಹಾರರ್‌ ಜೊತೆಗೆ ಆ್ಯಕ್ಷನ್‌, ಫ್ಯಾಮಿಲಿ ಸೆಂಟಿಮೆಂಟ್‌ ಕಥೆ ಇದಾಗಿದೆ. ನಾನಿಲ್ಲಿ ಶಂಕರ್‌ ನಾಗ್‌ ಅಭಿಮಾನಿಯಾಗಿ ಚಿತ್ರರಂಗದಲ್ಲಿ ದೊಡ್ಡ ನಿರ್ದೇಶಕನಾಗಬೇಕೆಂದು ಹೋರಾಟ ನಡೆಸುವ ಪಾತ್ರ ಮಾಡಿದ್ದೇನೆ. ನಾಯಕ ಮಾಯಾನಗರಿ ಎಂಬ ಸ್ಥಳಕ್ಕೆ ಹೋಗಬೆಕಾಗುತ್ತದೆ. ಆ ಊರಿಗೆ ಬರುವ ಆತ ಅಲ್ಲಿ ತಾನೇ ಒಂದು ಪಾತ್ರವಾಗಬೇಕಾಗುತ್ತದೆ. ಅದೇನು ಎಂಬುದನ್ನು ಸಿನಿಮಾದಲ್ಲಿ ತಿಳಿದುಕೊಳ್ಳಬೇಕು’ ಎನ್ನುವುದು ಅನೀಶ್‌ ಮಾತು.

ಇನ್ನು, ಚಿತ್ರದಲ್ಲಿ ಹಿರಿಯ ನಟ ದ್ವಾರಕೀಶ್‌ ಕೂಡಾ ನಟಿಸಿದ್ದಾರೆ. ಅನೀಶ್‌ಗೆ ಅವರ ಜೊತೆಗೆ ತೆರೆಹಂಚಿಕೊಂಡ ಖುಷಿ. “ದ್ವಾರಕೀಶ್‌ರಂಥ ನಟರ ಜೊತೆ ಸ್ಕ್ರೀನ್‌ ಶೇರ್‌ ಮಾಡುವ ಅವಕಾಶ ಸಿಕಿದ್ದು ನನ್ನ ಅದೃಷ್ಟ’ ಎನ್ನಲು ಮರೆಯುವುದಿಲ  “ಸಿನಿಮಾ ಎಂದಮೇಲೆ ಏರಿಳಿತ ಸಹಜ. ಅದೇ ರೀತಿ ನಮ್ಮ ಸಿನಿಮಾ ಈಗ ಬಿಡುಗಡೆಗೆ ಬಂದಿದೆ. ಇಡೀ ತಂಡದ ಶ್ರಮ ಇದರಲ್ಲಿದೆ. ಅದಕ್ಕೆ ತಕ್ಕ ಫ‌ಲ ಸಿಗುವ ವಿಶ್ವಾಸವಿದೆ’ ಎನ್ನುವುದು ಅನೀಶ್‌ ಮಾತು.

ಚಿತ್ರದಲ್ಲಿ ಅನೀಶ್‌ ಜೊತೆಗೆ ತೇಜು ಹಾಗೂ ಶ್ರಾವ್ಯಾ ರಾವ್‌ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಈ ಚಿತ್ರಕ್ಕೆ ಶಂಕರ್‌ ಆರಾಧ್ಯ ಕಥೆ ಚಿತ್ರಕಥೆ ಬರೆದು ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ. ಸ್ಯಾಂಡಲ್‌ ವುಡ್‌ ಪಿಕ್ಚರ್ಸ್‌ ಬ್ಯಾನರ್‌ನಡಿ ಈ ಚಿತ್ರ ನಿರ್ಮಾಣವಾಗಿದೆ.

ರವಿಪ್ರಕಾಶ್ ರೈ