ಇನ್ನೊಂದು ಶಿಖರ ಏರುವಾಸೆ…

Team Udayavani, Oct 19, 2017, 10:41 AM IST

ಗೌರಿ ಶಿಖರ್‌ ಅಭಿನಯದ “ರಾಜಹಂಸ’ ನೋಡಿದವರು, ನಾಯಕ ಗೌರಿ ಶಿಖರ್‌ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದ್ದರು. ಸುದೀಪ್‌, ಜಗ್ಗೇಶ್‌ ಸೇರಿದಂತೆ ಚಿತ್ರರಂಗದ ಅನೇಕರು ಸಿನ್ಮಾ ಬಗ್ಗೆ ಟ್ವೀಟ್‌ ಮಾಡಿದ್ದುಂಟು. ಆದರೆ, ಚಿತ್ರ ಗೌರಿಶಖರ್‌ ಅಂದುಕೊಂಡಷ್ಟು ಹಿಟ್‌ ಆಗಲಿಲ್ಲ. ಈಗ ಗೌರಿಶಿಖರ್‌ಗೆ ಒಂದಷ್ಟು ಕಥೆ ಹುಡುಕಿ ಬರುತ್ತಿವೆಯಂತೆ. ಈಗಾಗಲೇ ಒಂದಿಷ್ಟು ಕಥೆ ಕೇಳಿರುವ ಅವರು, ಹೊಸದೇನನ್ನೋ ಎದುರು ನೋಡುತ್ತಿದ್ದಾರೆ.

ಹೊಸಬರ ಜತೆ ಕೆಲಸ ಮಾಡುವ ಉತ್ಸಾಹ ಇಟ್ಟುಕೊಂಡಿರುವ ಗೌರಿಶಿಖರ್‌ಗೆ ಆ ಸಿನಿಮಾಗಳಲ್ಲಿ ನಟಿಸುವುದಕ್ಕೇನೂ ಸಮಸ್ಯೆ ಇಲ್ಲ. ಆದರೆ, ಎಲ್ಲಿ ಆ ಸಿನಿಮಾಗಳು ಅಂದುಕೊಂಡಂತೆ ಮೂಡಿಬರುವುದಿಲ್ಲವೋ, ಅರ್ಧಕ್ಕೆ ಎಲ್ಲಿ ನಿಂತುಬಿಡುತ್ತವೋ ಎಂಬ ಗೊಂದಲ ಎಂಬ ಭಯವಿದೆ. ಹಾಗಾಗಿ, ತಮಗೆ ಹೊಂದುವ ಕಥೆ, ಪಾತ್ರ ಮತ್ತು ಪ್ರತಿಭಾವಂತರ ತಂಡವನ್ನು ಎದುರು ನೋಡುತ್ತಿದ್ದಾರಂತೆ.

ಈಗ “ರಾಜಹಂಸ’ ಚಿತ್ರಕ್ಕಿಂತಲೂ ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಬೇಕು ಎಂಬ ಹಂಬಲದಲ್ಲಿದ್ದಾರೆ.  ಅಂತಹ ಕಥೆ ಮತ್ತು ಹೊಸತನ ಇರುವ ತಂಡದ ಆಗಮನವನ್ನು ನೋಡುತ್ತಿದ್ದಾರಂತೆ. ಅಂದಹಾಗೆ, ಸಂಭಾವನೆ ಬಗ್ಗೆ ಹೆಚ್ಚು ತಲೆಕೆಡಿಸಿಕೊಳ್ಳದ ಗೌರಿಶಿಖರ್‌, ಒಳ್ಳೆಯ ಕಥೆ, ಪಾತ್ರ ಸಿಕ್ಕರೆ, ಆ ತಂಡದ ಜತೆ ಕೈ ಜೋಡಿಸಿ, ಸಿನಿಮಾ ಶುರುವಿನಿಂದ  ಚಿತ್ರಮಂದಿರದಲ್ಲಿ ಬಿಡುಗಡೆಯಾಗುವವರೆಗೂ ಜತೆಗಿದ್ದು ಕೆಲಸ ಮಾಡು ಉತ್ಸಾಹದಲ್ಲಿದ್ದಾರೆ.

ಆದರೆ, ಅವರೀಗ ಹಣ ಹಾಕಿ ಸಿನಿಮಾ ನಿರ್ಮಾಣ ಮಾಡುವಷ್ಟು ಶಕ್ತರಿಲ್ಲ.  ಆದರೆ, ಉತ್ಸಾಹಕ್ಕಂತೂ ಕೊರತೆ ಇಲ್ಲ. ಹೊಸ ಬಗೆಯ ಕಥೆ ಮಾಡಿಕೊಂಡಿರುವ ಹೊಸಬರೊಂದಿಗೆ ಕೆಲಸ ಮಾಡುವುದಷ್ಟೇ ಅವರ ಮುಂದಿರುವ ಯೋಚನೆ. ಅದರಲ್ಲೂ ಉತ್ಸಾಹ ಇಟ್ಟುಕೊಂಡು, ಸಿನಿಮಾ ಮೇಲಿನ ಪ್ರೀತಿ ಇದ್ದವರ ಜತೆ ರಾತ್ರಿ-ಹಗಲು ಕೆಲಸ ಮಾಡುವ ಹುಮ್ಮಸ್ಸು ಅವರಿಗಿದೆ.