ಮತ್ತೊಂದು ಚಿತ್ರಕ್ಕೆ ಒಂದಾದ್ರು ಗಣೇಶ-ಸುನಿ

Team Udayavani, Jan 13, 2020, 7:05 AM IST

ನಟ ಗೋಲ್ಡನ್‌ ಸ್ಟಾರ್‌ ಗಣೇಶ್‌ ಸದ್ಯ “ಗಾಳಿಪಟ-2′ ಚಿತ್ರದಲ್ಲಿ ಬಿಝಿ. ಯೋಗರಾಜ್‌ ಭಟ್‌ ನಿರ್ದೇಶನದ ಈ ಚಿತ್ರದಲ್ಲಿ ಗಣೇಶ್‌ ನಟಿ ಸುತ್ತಿದ್ದಾರೆ. ಈಗಾಗಲೇ ಕುದುರೆಮುಖ ಸೇರಿದಂತೆ ಮಲೆ ನಾಡು ಸುತ್ತಮುತ್ತ ಮೊದಲ ಹಂತದ ಚಿತ್ರೀಕರಣ ಮುಗಿಸಿದೆ. ಈಗ ಗಣೇಶ್‌ ಅವರ ಹೊಸ ಸಿನಿಮಾ ಕುರಿತಾದ ಸುದ್ದಿಯೊಂದು ಹೊರ ಬಿದ್ದಿದೆ. ಅದು ಗಣೇಶ್‌ ಹಾಗೂ ಸಿಂಪಲ್‌ ಸುನಿ ಕಾಂಬಿನೇಶನ್‌ ಸಿನಿಮಾ. ಹೌದು, ಸುನಿ ಹಾಗೂ ಗಣೇಶ್‌ ಅವರ ಕಾಂಬಿನೇಶನ್‌ನಲ್ಲಿ ಹೊಸ ಸಿನಿಮಾವೊಂದು ಬರಲಿದೆ.

ಈಗಾಗಲೇ ಮಾತುಕತೆಯಾಗಿದ್ದು, ಶೀಘ್ರದಲ್ಲೇ ಸೆಟ್ಟೇರಲಿದೆ. ಈಗಾಗಲೇ ಗಣೇಶ್‌ ಹಾಗೂ ಸುನಿ ಕಾಂಬಿನೇಶನ್‌ನಲ್ಲಿ “ಚಮಕ್‌’ ಸಿನಿಮಾ ಬಂದಿ ರೋದು ನಿಮಗೆ ಗೊತ್ತೇ ಇದೆ. ಆ ಸಿನಿಮಾ ನೋಡಿದವರಿಂದ ಮೆಚ್ಚುಗೆ ವ್ಯಕ್ತವಾಗುವ ಮೂಲಕ ಚಿತ್ರ ಕೂಡಾ ಹಿಟ್‌ಲಿಸ್ಟ್‌ ಸೇರಿತ್ತು. ಈಗ ಈ ಜೋಡಿ ಮತ್ತೆ ಒಂದಾಗುತ್ತಿದೆ. ಈ ಹೊಸ ಚಿತ್ರವನ್ನು ನಿರ್ಮಿಸುತ್ತಿರೋದು ಸುಪ್ರಿತ್‌. ಯಾವ ಸುಪ್ರಿತ್‌ ಎಂದರೆ “ಭರಾಟೆ’ ಸಿನಿಮಾ ತೋರಿಸಬೇಕು.

ಮುರಳಿ ನಾಯಕರಾಗಿದ್ದ “ಭರಾಟೆ’ ಚಿತ್ರ ನಿರ್ಮಿಸಿದ್ದ ಸುಪ್ರಿತ್‌ ಈಗ ಗಣೇಶ್‌ ಸಿನಿಮಾ ಮಾಡಲು ಮುಂದಾಗಿದ್ದಾರೆ. ಸದ್ಯ ಸುಪ್ರಿತ್‌ ಧನ್ವೀರ್‌ ನಾಯಕರಾಗಿರುವ “ಬಂಪರ್‌’ ಚಿತ್ರವನ್ನು ನಿರ್ಮಿಸಲು ಮುಂದಾ ಗಿದ್ದು, ಜನವರಿ 15ರಂದು ಚಿತ್ರದ ಮುಹೂರ್ತ ನಡೆಯಲಿದೆ. ಎಲ್ಲಾ ಓಕೆ, ಸುನಿ ಹಾಗೂ ಗಣೇಶ್‌ ಕಾಂಬಿನೇಶನ್‌ ಸಿನಿಮಾ ಯಾವಾಗ ಸೆಟ್ಟೇರುತ್ತದೆ ಎಂದರೆ ಅದಕ್ಕೆ ಸದ್ಯ ಉತ್ತರವಿಲ್ಲ.

ಏಕೆಂದರೆ ಇತ್ತ ಕಡೆ ಗಣೇಶ್‌ ಕೂಡಾ ತಮ್ಮ ಸಿನಿಮಾ ಕಮಿಟ್‌ಮೆಂಟ್‌ಗಳಲ್ಲಿ ಬಿಝಿಯಾಗಿದ್ದಾರೆ. ಸುನಿ ಕೂಡಾ ತಮ್ಮ “ಅವತಾರ್‌ ಪುರುಷ’ ಸಿನಿಮಾದಲ್ಲಿ ಬಿಝಿ. ಆ ಚಿತ್ರದ ಹಾಡುಗಳ ಚಿತ್ರೀಕರಣ ಇನ್ನಷ್ಟೇ ಬಾಕಿ ಇದೆ. ಈ ನಡುವೆಯೇ ಪುಷ್ಕರ್‌ ಜೊತೆ ಮತ್ತೊಂದು ಸಿನಿಮಾ ಕಮಿಟ್‌ ಆಗಿದ್ದಾರೆ. ಹಾಗಾಗಿ, ಈ ಎಲ್ಲಾ ಕಮಿಟ್ಮೆಂಟ್‌ಗಳು ಮುಗಿದ ಬಳಿಕ ಹೊಸ ಸಿನಿಮಾ ಸೆಟ್ಟೇರಬಹುದು. ಇದೊಂದು ಫ‌ನ್‌ ಥ್ರಿಲ್ಲರ್‌ ಜಾನರ್‌ನೊಂದಿಗೆ ಸಾಗುವ ಸಿನಿಮಾ ಎನ್ನಲಾಗಿದೆ.