ಗತ ವೈಭವ ನಾಯಕಿ ಆಶಿಕಾ ರಂಗನಾಥ್‌

Team Udayavani, Aug 4, 2022, 12:47 PM IST

ಸಿಂಪಲ್‌ ಸುನಿ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ “ಗತ ವೈಭವ’ ಸಿನಿಮಾದ ಕೆಲಸಗಳು ಭರದಿಂದ ನಡೆಯುತ್ತಿದೆ. ಈಗಾಗಲೇ “ಗತ ವೈಭವ’ ಸಿನಿಮಾದ 35%ರಷ್ಟು ಚಿತ್ರೀಕರಣ ಪೂರ್ಣಗೊಂಡಿದ್ದು, ಕೊಡಗು, ದೇವರಾಯನ ದುರ್ಗ, ತುಮಕೂರು ಮತ್ತು ಬೆಂಗಳೂರು ಸುತ್ತಮುತ್ತ ಚಿತ್ರೀಕರಣ ನಡೆಸಲಾಗಿದೆ. ಇದೀಗ “ಗತ ವೈಭವ’ ಸಿನಿಮಾದ ಬಗ್ಗೆ ಚಿತ್ರತಂಡದ ಕಡೆಯಿಂದ ಹೊಸ ಅಪ್ಡೇಟ್‌ ಒಂದು ಹೊರಬಿದ್ದಿದೆ. ಅದೇನೆಂದರೆ, “ಗತ ವೈಭವ’ ಸಿನಿಮಾದಲ್ಲಿ ನಾಯಕಿಯಾಗಿ ಆಶಿಕಾ ರಂಗನಾಥ್‌ ಕಾಣಿಸಿ ಕೊಳ್ಳುತ್ತಿದ್ದಾರೆ.

ಹೌದು, “ಗತ ವೈಭವ’ ಸಿನಿಮಾದಲ್ಲಿ ನವ ನಾಯಕ ನಟ ದುಶ್ಯಂತ್‌ ಅವರೊಂದಿಗೆ ತೆರೆಮೇಲೆ ಆಶಿಕಾ ರಂಗನಾಥ್‌ ಜೋಡಿಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಫ್ಯಾಂಟಸಿ ಮತ್ತು ರೊಮ್ಯಾಂಟಿಕ್‌ -ಕಾಮಿಡಿ ಕಥಾಹಂದರದ “ಗತ ವೈಭವ’ ಸಿನಿಮಾದಲ್ಲಿ ನಾಯಕ ದುಶ್ಯಂತ್‌ ಪೈರೆಟ್ಸ್‌ ಮತ್ತು ಪೊರ್ಚುಗೀಸ್‌ ಲುಕ್‌ನ ಡಬಲ್‌ ಶೇಡ್‌ ಪಾತ್ರದಲ್ಲಿ ಕಾಣಿಸಿಕೊಂಡರೆ, ನಾಯಕಿ ಆಶಿಕಾ ಸಿನಿಮಾದಲ್ಲಿ ದೇವಕನ್ಯೆಯ ಪಾತ್ರದಲ್ಲಿ ಅಭಿನಯಿಸುತ್ತಿದ್ದಾರೆ.

ಈಗಾಗಲೇ ಸದ್ದಿಲ್ಲದೆ “ಗತ ವೈಭವ’ ಚಿತ್ರತಂಡ ಸೇರಿಕೊಂಡಿರುವ ಆಶಿಕಾ, ಕಳೆದ ಕೆಲ ದಿನಗಳಿಂದ “ಗತ ವೈಭವ’ ಚಿತ್ರೀಕರಣದಲ್ಲೂ ಪಾಲ್ಗೊಂಡಿದ್ದಾರೆ. ಇನ್ನು “ಗತ ವೈಭವ’ ಸಿನಿಮಾದಲ್ಲಿ ಅಶಿಕಾ ರಂಗನಾಥ್‌ ಅಭಿನಯಿಸುತ್ತಿರುವ ದೇವಕನ್ಯೆ ಲುಕ್‌ ಹೇಗಿರಲಿದೆ ಅನ್ನೋ ಕುತೂಹಲಕ್ಕೆ ಇಂದು ಚಿತ್ರತಂಡ ಉತ್ತರ ನೀಡಲಿದೆ. ನಾಯಕಿಯ ಅನಾವರಣ ದೃಶ್ಯ ತುಣುಕು ಇಂದು “ಸುನಿ ಸಿನಿಮಾಸ್‌’ ಯು-ಟ್ಯೂಬ್‌ ಚಾನೆಲ್‌ನಲ್ಲಿ ಬಿಡುಗಡೆಯಾಗಲಿದ್ದು, ಆಶಿಕಾ ಲುಕ್‌ ರಿವೀಲ್‌ ಆಗಲಿದೆ.

“ಸುನಿ ಸಿನಿಮಾಸ್‌’ ಬ್ಯಾನರ್‌ನಲ್ಲಿ ಸಿಂಪಲ್‌ ಸುನಿ, ದೀಪಕ್‌ ಜಂಟಿಯಾಗಿ ನಿರ್ಮಿಸುತ್ತಿರುವ “ಗತ ವೈಭವ’ ಸಿನಿಮಾಕ್ಕೆ ವಿಲಿಯಂ ಡೇವಿಡ್‌ ಛಾಯಗ್ರಹಣವಿದೆ. ಚಿತ್ರದ ಹಾಡುಗಳಿಗೆ ಜ್ಯೂಡ ಸ್ಯಾಂಡಿ ಸಂಗೀತ ಸಂಯೋಜನೆಯಿದೆ.

ಇನ್ನು ತಮ್ಮ ಹೊಸ “ದೇವಕನ್ಯೆ’ಯ ಪಾತ್ರದ ಬಗ್ಗೆ ಆಶಿಕಾ ರಂಗನಾಥ್‌ ಕೂಡ ಸಾಕಷ್ಟು ನಿರೀಕ್ಷೆ ಇಟ್ಟುಕೊಂಡಿದ್ದಾರೆ. ಎಲ್ಲ ಅಂದುಕೊಂಡಂತೆ ನಡೆದರೆ, ಈ ವರ್ಷಾಂತ್ಯದೊಳಗೆ “ಗತ ವೈಭವ’ ತೆರೆಗೆ ಬರುವ ಯೋಚನೆಯಲ್ಲಿದೆ.