ಆಶು ಬೆದ್ರ ಈಗ ಹೀರೋ

Team Udayavani, Apr 30, 2017, 11:18 AM IST

ಆಶು ಬೆದ್ರ ಈಗ ಹೀರೋ ಆಗುತ್ತಿದ್ದಾರೆ. ಸದ್ಯದಲ್ಲೇ ಅವರು ನಾಯಕರಾಗಿರುವ ಸಿನಿಮಾ ಲಾಂಚ್‌ ಆಗಲಿದೆ! ಯಾರು ಆಶು ಬೆದ್ರ ಎಂದು ನೀವು ಕೇಳಿದರೆ “ಸಿಂಪಲ್ಲಾಗ್‌ ಇನ್ನೊಂದು  ಲವ್‌ಸ್ಟೋರಿ’ ಸಿನಿಮಾವನ್ನು ತೋರಿಸಬೇಕು. ಆ ಸಿನಿಮಾವನ್ನು ನಿರ್ಮಿಸಿದವರು ಇದೇ ಆಶು ಬೆದ್ರ. ಸಿನಿಮಾ ನಿರ್ಮಾಣಕ್ಕೂ ಮುನ್ನ ಆಶು ಕಿರುತೆರೆಯ ನಿರ್ಮಾಣದಲ್ಲಿ ತಮ್ಮನ್ನು ತೊಡಗಿಸಿಕೊಂಡಿದ್ದರು. ಈಗ ಹೀರೋ ಆಗುತ್ತಿದ್ದಾರೆ.

ಹಾಗೆ ನೋಡಿದರೆ ಆಶು ಬೆದ್ರ ಬಣ್ಣದ ಲೋಕಕ್ಕೆ ಬಂದಿದ್ದೇ ಕಲಾವಿದ ಆಗಬೇಕೆಂಬ ಉದ್ದೇಶದಿಂದಂತೆ. ಆದರೆ ಆರಂಭದಲ್ಲಿ ತೊಡಗಿಸಿಕೊಂಡಿದ್ದು ಮಾತ್ರ ನಿರ್ಮಾಣ ಹಾಗೂ ಕ್ರಿಯೇಟಿವ್‌ ವಿಭಾಗದಲ್ಲಿ. ಈಗ ಆಶು ಬೆದ್ರ ನಾಯಕರಾಗುವ ಕಾಲ ಕೂಡಿಬಂದಿದೆ. ಅರವಿಂದ ಶಾಸಿ ನಿರ್ದೇಶನದ ಸಿನಿಮಾ ಮೂಲಕ ಆಶು ಬೆದ್ರ ಲಾಂಚ್‌ ಆಗುತ್ತಿದ್ದಾರೆ.

ಅರವಿಂದ್‌ ಈ ಹಿಂದೆ “ಕಹಿ’ ಎಂಬ ಸಿನಿಮಾ ಮಾಡಿದ್ದು, ಮೊನ್ನೆಯಷ್ಟೇ ರಾಜ್ಯ ಪ್ರಶಸ್ತಿ ಪಡೆದುಕೊಂಡಿದ್ದಾರೆ. ಈಗ ಹೊಸ ಬಗೆಯ ಕಥೆಯೊಂದಿಗೆ ಹೊಸ ನಾಯಕನ ಜೊತೆ ಸಿನಿಮಾ ಮಾಡಲು ರೆಡಿಯಾಗಿದ್ದಾರೆ ಅರವಿಂದ್‌. ಕಥೆ ಕೇಳಿದ ಆಶು ಅವರಿಗೆ ತಾನು ಹೀರೋ ಆಗಿ ಲಾಂಚ್‌ ಆಗಲು ಇದು ಸೂಕ್ತ ಕಥೆ ಎನಿಸಿತಂತೆ.

ಕಥೆಯೇ ಹೀರೋ ಆಗಿರುವಂತಹ ಸಿನಿಮಾ ಮೂಲಕ ಲಾಂಚ್‌ ಆಗಬೇಕೆಂಬ ಆಸೆ ಇತ್ತಂತೆ. ಅದೀಗ ಈಡೇರಿದೆ. “ಕಥೆಯೇ ಹೀರೋ ಆದಾಗ ಅದು ಹೆಚ್ಚು ಪರಿಣಾಮಕಾರಿಯಾಗಿರುತ್ತದೆ. ಇಲ್ಲಿ ಅಂತಹ ಕಥೆ ಸಿಕ್ಕಿದೆ. ಇದು ನನ್ನ ಲಾಂಚ್‌ಗೆ ಒಳ್ಳೆಯ ಸಿನಿಮಾವಾಗುತ್ತದೆ’ ಎಂಬ ವಿಶ್ವಾಸವೂ ಇದೆ ಎನ್ನುವುದು ಆಶು ಬೆದ್ರ ಮಾತು. ಈ ಚಿತ್ರದ ಟೈಟಲ್‌, ಇತರ ಕಲಾವಿದರ ಹಾಗೂ ತಾಂತ್ರಿಕ ವರ್ಗದ ಆಯ್ಕೆ ಇನ್ನಷ್ಟೇ ಆಗುತ್ತಿದೆ.