ಆಕಾಂಕ್ಷ ಈಗ ಬ್ಲೈಂಡ್‌ ಗರ್ಲ್

Team Udayavani, Jun 12, 2017, 11:47 AM IST

ನವನೀತ್‌ ನಿರ್ದೇಶನದ ರವಿಚಂದ್ರನ್‌ ಮುಖ್ಯಭೂಮಿಕೆಯಲ್ಲಿರುವ “ಬಕಾಸುರ’ ಚಿತ್ರ ಮುಗಿಯುತ್ತಾ ಬಂದಿದೆ. ಇನ್ನೊಂದು ಹದಿನೈದು ದಿನ ಚಿತ್ರೀಕರಣವಾದರೆ “ಬಕಾಸುರ’ನ ಕಥೆ ಮುಗಿದೇ ಹೋಗುತ್ತದೆ. ಅದು ಮುಗಿಯುತ್ತಿದ್ದಂತೆ ಮತ್ತೂಂದು ಸಿನಿಮಾ ಆರಂಭಿಸಲು ಸಿದ್ಧತೆ ಮಾಡಿಕೊಂಡಿದ್ದಾರೆ ನವನೀತ್‌. ಅದು ಹಾರರ್‌. ಇದು ಅವರ ಫೆವರೇಟ್‌ ಜಾನರ್‌ ಎಂದರೆ ತಪ್ಪಲ್ಲ. “ಕರ್ವ’ ಎಂಬ ಹಾರರ್‌ ಚಿತ್ರದ ಮೂಲಕ ನಿರ್ದೇಶಕರಾದ ನವನೀತ್‌ ಈಗ ಮತ್ತೂಂದು ಹಾರರ್‌ ಸಿನಿಮಾ ಮಾಡಲು ಹೊರಟಿದ್ದಾರೆ.

ಆ ಚಿತ್ರಕ್ಕಿನ್ನೂ ಹೆಸರಿಟ್ಟಿಲ್ಲ. ಆದರೆ, ನಾಯಕಿಯ ಆಯ್ಕೆಯಾಗಿದೆ. ಆಕಾಂಕ್ಷ, ನವನೀತ್‌ ನಿರ್ದೇಶನದ ಹೊಸ ಸಿನಿಮಾದಲ್ಲಿ ನಾಯಕಿಯಾಗಿ ನಟಿಸಲಿದ್ದಾರೆ. “ಆರ್‌ಎಕ್ಸ್‌ ಸೂರಿ’, “ಜಲ್ಸಾ’, “ಕ್ರ್ಯಾಕ್‌’ ಚಿತ್ರಗಳಲ್ಲಿ ನಟಿಸಿರುವ ಆಕಾಂಕ್ಷ ಈಗ ಮೊದಲ ಬಾರಿಗೆ ಹಾರರ್‌ ಸಿನಿಮಾದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಅಂದಹಾಗೆ, ಈ ಚಿತ್ರದಲ್ಲಿ ಆಕಾಂಕ್ಷಗೆ ತುಂಬಾ ಸವಾಲಿನ ಪಾತ್ರ ಸಿಕ್ಕಿದೆ. ಅದು ಬ್ಲೈಂಡ್‌ ಗರ್ಲ್. ಹೌದು, ಆಕಾಂಕ್ಷ ಇಲ್ಲಿ ಅಂದ ಹುಡುಗಿಯಾಗಿ ನಟಿಸುತ್ತಿದ್ದಾರೆ.

ಇದು ನಾಯಕಿ ಪ್ರಧಾನ ಚಿತ್ರವಾಗಿದ್ದು, ಇಡೀ ಸಿನಿಮಾ ಇವರ ಸುತ್ತ ಸಾಗಲಿದೆಯಂತೆ.  ನವನೀತ್‌ ತಮ್ಮ ಸ್ನೇಹಿತರ ಜೊತೆ ಸೇರಿಕೊಂಡು ಈ ಸಿನಿಮಾ ನಿರ್ಮಾಣ ಮಾಡುತ್ತಿದ್ದಾರೆ. ಇಡೀ ಸಿನಿಮಾ ಊಟಿಯಲ್ಲಿ ಚಿತ್ರೀಕರಣವಾಗಲಿದ್ದು, ಸುಮಾರು 35 ದಿನಗಳ ಕಾಲ ಚಿತ್ರೀಕರಣ ನಡೆಯಲಿದೆ. ಚಿತ್ರದಲ್ಲಿ ಆರ್‌ಜೆ ರೋಹಿತ್‌ ಗೆಸ್ಟ್‌ ಅಪಿಯರೆನ್ಸ್‌ ಮಾಡುತ್ತಿದ್ದಾರೆ. ನವನೀತ್‌ ನಿರ್ದೇಶನದ “ಬಕಾಸುರ’ ಚಿತ್ರದಲ್ಲೂ ರೋಹಿತ್‌ ನಟಿಸುತ್ತಿದ್ದಾರೆ.

“ಇದೊಂದು ಹಾರರ್‌ ಸಿನಿಮಾ. ಇಲ್ಲೊಂದು ಲವ್‌ಸ್ಟೋರಿಯೂ ಇದೆ’ ಎನ್ನುತ್ತಾರೆ ನವನೀತ್‌. ಚಿತ್ರದ ತಾಂತ್ರಿಕ ಬಳಗದಲ್ಲಿ “ಕರ್ವ’ ತಂಡವೇ ಮುಂದುವರೆಯಲಿದೆ. “ಬಕಾಸುರ’ ಚಿತ್ರೀಕರಣ ಮುಗಿಸಿಕೊಂಡು ಮುಂದಿನ ತಿಂಗಳು ಹೊಸ ಸಿನಿಮಾ ಕೈಗೆತ್ತಿಕೊಳ್ಳಲಿದ್ದಾರೆ ನವನೀತ್‌. ಅದು ಮುಗಿಸಿಕೊಂಡು ಡಿಸೆಂಬರ್‌ನಲ್ಲಿ “ಕರ್ವ-2′ ಆರಂಭಿಸುವ ಯೋಚನೆ ಕೂಡಾ ಅವರಿಗಿದೆ.