ವಿಕ್ಟರಿ-2ನಲ್ಲೂ ಭಟ್ಟರ ಎಣ್ಣೆ ಸಾಂಗ್‌

Team Udayavani, Sep 23, 2018, 12:22 PM IST

ಯೋಗರಾಜ್‌ ಭಟ್ಟರು ಈವರೆಗೆ ಸಾಕಷ್ಟು ಹಾಡುಗಳನ್ನು ಬರೆದಿದ್ದಾರೆ. ಅದರಲ್ಲೂ ಕುಡಿತದ ಕುರಿತಾಗಿಯೂ ಒಂದಷ್ಟು ಹಾಡುಗಳನ್ನು ಬರೆದಿದ್ದಾರೆ. ಅದರಲ್ಲಿ ಕೆಲವು ದೊಡ್ಡ ಮಟ್ಟದಲ್ಲಿ ಸದ್ದು ಮಾಡಿವೆ. ಆ ತರಹ ಸದ್ದು ಮಾಡಿದ ಹಾಡಲ್ಲಿ “ಖಾಲಿ ಕ್ವಾಟ್ರು ಬಾಟ್ಲಿ ಹಂಗೆ ಲೈಫ‌ು’ ಹಾಡು ಕೂಡಾ ಒಂದು. ಶರಣ್‌ ನಾಯಕರಾಗಿರುವ “ವಿಕ್ಟರಿ’ ಚಿತ್ರದ ಈ ಹಾಡು ದೊಡ್ಡ ಮಟ್ಟದಲ್ಲಿ ಹಿಟ್‌ ಆಯಿತು. ಈಗ “ವಿಕ್ಟರಿ-2′ ಬರುತ್ತಿದೆ.

ಸಹಜವಾಗಿಯೇ ಒಂದು ಚಿತ್ರದ ಹಾಡು ಹಿಟ್‌ ಆಗಿರುವಾಗ, ಅದರ ಮುಂದುವರಿದ ಭಾಗದಲ್ಲೂ ಆ ತರಹದ ಹಾಡನ್ನು ಜನ ನಿರೀಕ್ಷಿಸುತ್ತಾರೆ. ಇದನ್ನು ಗಮನದಲ್ಲಿಟ್ಟುಕೊಂಡಿರುವ “ವಿಕ್ಟರಿ-2′ ತಂಡ ಆ ತರಹದ ಒಂದು ಮಾಸ್‌ ಸಾಂಗ್‌ ಅನ್ನು ಚಿತ್ರೀಕರಿಸಿಕೊಂಡಿದೆ. “ನಾನ್‌ ಮನೇಗ್‌ ಹೋಗೋದಿಲ್ಲ..’ ಎಂದು ಆರಂಭವಾಗುವ ಈ ಹಾಡನ್ನು ಯೋಗರಾಜ್‌ ಭಟ್ಟರು ರಚಿಸಿದ್ದಾರೆ.

ಅರ್ಜುನ್‌ ಜನ್ಯಾ ಸಂಗೀತ ನೀಡಿದ್ದು, ವಿಜಯ್‌ ಪ್ರಕಾಶ್‌ ಧ್ವನಿಯಲ್ಲಿ ಈ ಹಾಡು ಮೂಡಿಬಂದಿದೆ. ಕಳೆದ ಬಾರಿಯೂ ಈ ಮೂವರ ಸಮಾಗಮದಲ್ಲಿ ಬಂದ ಹಾಡು ಹಿಟ್‌ ಆಗಿತ್ತು. ಈಗ “ವಿಕ್ಟರಿ-2′ ಅದೇ ನಿರೀಕ್ಷೆಯೊಂದಿಗೆ ಎದುರು ನೋಡುತ್ತಿದೆ. ಕಲರ್‌ಫ‌ುಲ್‌ ಸೆಟ್‌ನಲ್ಲಿ ಈ ಹಾಡನ್ನು ಚಿತ್ರೀಕರಿಸಿದ್ದು, ಶರಣ್‌, ಸಾಧುಕೋಕಿಲ ಸೇರಿದಂತೆ ಅನೇಕರು ಸ್ಟೆಪ್‌ ಹಾಕಿದ್ದಾರೆ.

“ವಿಕ್ಟರಿ-2′ ಚಿತ್ರವನ್ನು ಹರಿಸಂತೋಷ್‌ ನಿರ್ದೇಶಿಸುತ್ತಿದ್ದು, ತರುಣ್‌ ಶಿವಪ್ಪ ನಿರ್ಮಿಸಿದ್ದಾರೆ. ಈ ಚಿತ್ರದಲ್ಲೂ ರವಿಶಂಕರ್‌ ಪ್ರಮುಖ ಪಾತ್ರ ಮಾಡಿದ್ದಾರೆ. ಜೊತೆಗೆ ಸನ್ನಿವೇಶವೊಂದರಲ್ಲಿ ಶರಣ್‌ ಹಾಗೂ ರವಿಶಂಕರ್‌ ಲೇಡಿ ಗೆಟಪ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ಈಗಾಗಲೇ ಬಿಡುಗಡೆಗೊಂಡಿರುವ ಚಿತ್ರದ “ಪ್ಲೀಸ್‌ ಟ್ರಸ್ಟು …’ ಹಾಡು ಹಿಟ್‌ ಆಗಿದ್ದು, ಇದು ಚಿತ್ರತಂಡದ ವಿಶ್ವಾಸ ಹೆಚ್ಚಿಸಿದೆ.