ಬೀದಿಬದಿ ವ್ಯಾಪಾರಿಗಳ ಸಹಾಯಕ್ಕೆ ನಿಂತ ಬಿಗ್‌ ಬಾಸ್‌ ಶೈನ್‌ ಶೆಟ್ಟಿ

Team Udayavani, Mar 30, 2020, 1:55 PM IST

ಕೋವಿಡ್ 19 ಎಫೆಕ್ಟ್ ಎಲ್ಲರಿಗೂ ಜೋರಾಗಿಯೇ ತಟ್ಟಿದೆ. ಅದರಲ್ಲೂ ಬೀದಿ ಬದಿ ವ್ಯಾಪಾರಿಗಳು, ಕಾರ್ಮಿಕರಿಗೆ ಜೋರಾಗಿಯೇ ತಟ್ಟಿದೆ. ಮನೆಬಾಡಿಗೆ, ದಿನಸಿಗೆ ಕಷ್ಟಪಡುವಂತಾಗಿದೆ. ಈಗಾಗಲೇ ಅನೇಕರು ಇವರ ಸಹಾಯಕ್ಕೆ ನಿಂತಿದ್ದಾರೆ. ಈಗ ಬಿಗ್‌ಬಾಸ್‌ ವಿನ್ನರ್‌ ಶೈನ್‌ ಶೆಟ್ಟಿ ಇವರ ಸಹಾಯಕ್ಕೆ ಮುಂದಾಗಿದ್ದಾರೆ. ತಮ್ಮ ತಂಡದೊಂದಿಗೆ ಬೀದಿ ಬದಿ ವ್ಯಾಪಾರಿಗಳ, ಕಾರ್ಮಿಕರ ನೆರವಿಗೆ ಧಾವಿಸಿರುವ ಶೈನ್‌, ಅವರ ಮನೆ ಬಾಡಿಗೆಗೆ ಹಾಗೂ ತಿಂಗಳ ದಿನಸಿಗೆ ತಮ್ಮ ಕೈಲಾದ ಮಟ್ಟಿನ ಸಹಾಯ ಮಾಡಲಿದ್ದಾರೆ.

ಈ ಬಗ್ಗೆ ಹೇಳಿಕೊಂಡಿರುವ ಶೈನ್‌, ನಾನು ಕೂಡಾ ತುಂಬಾ ಕಷ್ಟದಿಂದಲೇ ಬಂದಿದ್ದೇನೆ. ಒಂದು ದಿನ ವ್ಯಾಪಾರ ಇಲ್ಲದೇ ಹೋದರೆ ಅದರ ಕಷ್ಟ ಏನೆಂಬುದು ನನಗೆ ಚೆನ್ನಾಗಿ ಗೊತ್ತು. ಹೀಗಿರುವಾಗ 21 ದಿನ ಬಂದ್‌ ಇರುವುದರಿಂದ ಬೀದಿ ಬದಿ ವ್ಯಾಪಾರಿಗಳು, ದಿನಗೂಲಿ ಕಾರ್ಮಿಕರು ಕಷ್ಟ ಅನುಭವಿಸುತ್ತಾರೆ. ಹಾಗಾಗಿ, ಅವರ ಸಹಾಯಕ್ಕೆ ನಾನು ನನ್ನ ತಂಡದೊಂದಿಗೆ ನಿಂತಿದ್ದೇನೆ ಎಂದಿದ್ದಾರೆ. ಇದರ ಜೊತೆಗೆ ಹಿರಿಯ ನಾಗರಿಕರಿಗೆ ಮೆಡಿಕಲ್‌ ಎಮರ್ಜೆನ್ಸಿ ಇದ್ದಲ್ಲಿ ಅದನ್ನು ಅವರ ಮನೆಗೆ ತಲುಪಿಸಲು ವ್ಯವಸ್ಥೆ ಮಾಡುವುದಾಗಿ ಹೇಳಿರುವ ಶೈನ್‌ ಶೆಟ್ಟಿ, ಮನೆಯಿಂದ ಹೊರಬಾರದಂತೆ ಮನವಿ ಮಾಡಿದ್ದಾರೆ.