ಗುಂಡನ ಕಥೆಗೆ ಸಖತ್‌ ರೆಸ್ಪಾನ್ಸ್‌

Team Udayavani, Nov 13, 2019, 6:00 AM IST

ಪ್ರಾಣಿಗಳ ಸುತ್ತ ಈಗಾಗಲೇ ಸಾಕಷ್ಟು ಸಿನಿಮಾಗಳು ಬಂದಿವೆ. ಅದರಲ್ಲೂ ನಾಯಿ ಹಾಗೂ ಮನುಷ್ಯ ಸಂಬಂಧದ ಸುತ್ತ ಬಂದಷ್ಟು ಸಿನಿಮಾಗಳು ಬೇರೆ ಪ್ರಾಣಿಗಳ ಸುತ್ತ ಬಂದಿಲ್ಲ. ನಾಯಿಯನ್ನು ಮುಖ್ಯಭೂಮಿಕೆಯಲ್ಲಿಟ್ಟುಕೊಂಡು ಈಗಾಗಲೇ ಹಲವು ಸಿನಿಮಾಗಳು ಬಂದಿವೆ. ಈಗ “ನಾನು ಮತ್ತು ಗುಂಡ’ ಕೂಡಾ ಅದೇ ಸಾಲಿಗೆ ಸೇರುವ ಸಿನಿಮಾ. ಮನುಷ್ಯ ಹಾಗೂ ನಾಯಿಯೊಂದರ ನಡುವಿನ ಬಾಂಧವ್ಯದ ಸುತ್ತ ಈ ಸಿನಿಮಾ ಸಾಗುತ್ತದೆ. ಚಿತ್ರದಲ್ಲಿ ಶಿವರಾಜ್‌ ಕೆ.ಆರ್‌.ಪೇಟೆ ಪ್ರಮುಖ ಪಾತ್ರ ಮಾಡುತ್ತಿದ್ದಾರೆ.

ಲ್ಯಾಬ್ರೆಡಾರ್‌ ನಾಯಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದೆ. ಪ್ರೀತಿಸುವ ಪ್ರಾಣಿಗಳು ವ್ಯಕ್ತಿಗಳ ಬದುಕಿನ ಏನೆಲ್ಲ ಪಾತ್ರ ವಹಿಸುತ್ತವೆ, ಅವು ದೂರವಾದಾಗ ಎಷ್ಟೆಲ್ಲ ನೋವು ಅನುಭವಿಸಬೇಕಾಗುತ್ತದೆ ಎನ್ನುವುದನ್ನು ಈ ಚಿತ್ರದಲ್ಲಿ ಹೇಳಲಾಗಿದೆ. ಇತ್ತೀಚೆಗೆ ಚಿತ್ರತಂಡ “ನಿಮ್ಮ ನಾಯಿಯೊಂದಿಗಿನ ಕಥೆಯನ್ನು ಹಂಚಿಕೊಳ್ಳಿ ಎಂದಿತ್ತು. ಇದಕ್ಕೆ ಒಳ್ಳೆಯ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ಅನೇಕರು ತಮ್ಮ ನಾಯಿಯೊಂದಿಗಿನ ಫೋಟೋ, ವೀಡಿಯೋ, ಕಥೆಗಳನ್ನು ಚಿತ್ರತಂಡಕ್ಕೆ ಕಳುಹಿಸಿಕೊಟ್ಟಿದ್ದಾರೆ.

ಈ ಕಥೆಗಳನ್ನು ಚಿತ್ರತಂಡ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳಲಿದೆ. ಈ ಚಿತ್ರವನ್ನು ಶ್ರೀನಿವಾಸ್‌ ತಮ್ಮಯ್ಯ ನಿರ್ದೇಶಿಸುತ್ತಿದ್ದು, ರಘು ಹಾಸನ್‌ ನಿರ್ಮಾಣವಿದೆ. ಚಿತ್ರಕ್ಕೆ ಶರತ್‌ ಚಕ್ರವರ್ತಿ ಸಂಭಾಷಣೆ, ಛಾಯಾಗ್ರಹಣ ಚಿದಾನಂದ, ಸಂಕಲನ ಕೆ.ಎಂ.ಪ್ರಕಾಶ್‌ ಹಾಗೂ ಕುಂಗ್‌ಫ‌ು ಚಂದ್ರು ಸಾಹಸವಿದೆ. ಉಳಿದ ತಾರಾಬಳಗದಲ್ಲಿ ಜಿ.ಗೋವಿಂದೇಗೌಡ, ಜಿಮ್‌ ರವಿ, ರಾಕ್‌ಲೈನ್‌ ಸುಧಾಕರ್‌ ಇದ್ದಾರೆ.