ಡಬ್ಬಿಂಗ್‌ ಮುಗಿಸಿದ ‘ಬಾಂಡ್‌ ರವಿ’

Team Udayavani, Aug 9, 2022, 4:01 PM IST

ಪ್ರಮೋದ್‌ ನಟನೆಯ “ಬಾಂಡ್‌ ರವಿ’ ಸಿನಿಮಾ ಸದ್ದಿಲ್ಲದೇ ಚಿತ್ರೀಕರಣ ಮುಗಿಸಿದ್ದು, ಈಗ ತನ್ನ ಡಬ್ಬಿಂಗ್‌ ಕಾರ್ಯವನ್ನೂ ಪೂರ್ಣಗೊಳಿಸಿದೆ. ಪ್ರಜ್ವಲ್‌ ಎಸ್‌.ಪಿ. ಈ ಸಿನಿಮಾಗೆ ಆಕ್ಷನ್‌ ಕಟ್‌ ಹೇಳಿದ್ದು, ಇದು ಇವರ ಚೊಚ್ಚಲ ಸಿನಿಮಾವಾಗಿದೆ.

ನರಸಿಂಹಮೂರ್ತಿಯವರು ಈ ಚಿತ್ರದ ನಿರ್ಮಾಪಕರು. ಇದೊಂದು ಆ್ಯಕ್ಷನ್‌ ಲವ್‌ ಸ್ಟೋರಿ ಸಿನಿಮಾವಾಗಿದ್ದು, ಮಲ್ಲಿಕಾರ್ಜುನ್‌ ಕಾಶಿ ಹಾಗೂ ಝೇವಿಯರ್‌ ಫ‌ರ್ನಾಂಡಿಸ್‌ ಸಹ ನಿರ್ಮಾಪಕರಾಗಿದ್ದಾರೆ. ಅಪ್ಪು ಅವರ ಅಭಿಮಾನಿಯಾಗಿ ಬಾಂಡ್‌ ರವಿ ಖದರ್‌ನಲ್ಲಿ ನಟಿಸಿರುವ ಪ್ರಮೋದ್‌ಗೆ ಕಾಜಲ್‌ ಕುಂದರ್‌ ಜೋಡಿಯಾಗಿ ಅಭಿನಯಿಸಿದ್ದಾರೆ.

ಬೆಂಗಳೂರು, ಶಿವಮೊಗ್ಗ, ಕೊಡಚಾದ್ರಿ, ಕುದುರೆಮುಖ, ಉಡುಪಿ ಮಂಗಳೂರು ಭಾಗದಲ್ಲಿ ಸುಮಾರು 50 ದಿನಗಳ ಕಾಲ ಚಿತ್ರೀಕರಣ ಮಾಡಲಾಗಿದ್ದು, ರವಿಕಾಳೆ, ಧರ್ಮ, ವಿಜಯ್‌ ಚೆಂಡೂರ್‌, ಶೋಭರಾಜ್‌, ಗೋವಿಂದೇಗೌಡ, ಪವನ್‌, ಮಿಮಿಕ್ರಿ ಗೋಪಿ, ಸಂತು, ಗುರುರಾಜ್‌ ಹೊಸಕೋಟೆ ಮುಖ್ಯ ಭೂಮಿಕೆಯಲ್ಲಿದ್ದಾರೆ.

ಕೆ.ಎಸ್‌. ಚಂದ್ರಶೇಖರ್‌ ಛಾಯಾಗ್ರಹಣ, ಅರ್ಜುನ್‌ ಕಿಟ್ಟು ಸಂಕಲನ, ಸುನಿಲ್‌ ಮತ್ತು ದೇವ್‌ ಎನ್‌. ರಾಜ್‌ ಸಂಭಾಷಣೆ, ಮನೋಮೂರ್ತಿಯವರ ಸಂಗೀತ ಸಿನಿಮಾಕ್ಕಿದೆ. ಜಯಂತ್‌ ಕಾಯ್ಕಿಣಿ ನಾಗೇಂದ್ರ ಪ್ರಸಾದ್‌, ಚಿನ್ಮಯ್‌ ಭಾವಿಕೆರೆ ಸಾಹಿತ್ಯ ಬರೆದಿದ್ದಾರೆ.