ಬ್ರಹ್ಮ ರಾಕ್ಷಸ -ಹೀಗೊಂದು ಹಾರರ್‌ ಸಿನಿಮಾ; ಪುಷ್ಕರ್‌ ಬ್ಯಾನರ್‌ ಸೆಪ್ಟೆಂಬರ್‌ನಲ್ಲಿ ಶುರು

Team Udayavani, Aug 6, 2020, 8:50 AM IST

ಚಿತ್ರರಂಗ ಚೇತರಿಸಿಕೊಳ್ಳುತ್ತಿದೆ. ಕೊರೊನಾದಿಂದ ಸ್ತಬ್ಧವಾಗಿದ್ದ ಚಿತ್ರರಂಗ ತನ್ನ ಕೆಲಸಗಳಿಗೆ ತೆರೆದುಕೊಳ್ಳುತ್ತಿದೆ. ಅರ್ಧಕ್ಕೆ ನಿಂತ ಸಿನಿಮಾ ಕೆಲಸಗಳು ಒಂದು ಕಡೆ ಆರಂಭವಾಗುತ್ತಿದ್ದರೆ, ಇನ್ನೊಂದು ಕಡೆ ಹೊಸ ಸಿನಿಮಾಗಳ ಆರಂಭಕ್ಕೆ ತಯಾರಿ ನಡೆಯುತ್ತಿದೆ. ಈ ಸಾಲಿಗೆ ಸೇರ್ಪಡೆ “ಬ್ರಹ್ಮ ರಾಕ್ಷಸ’. ಏನಿದು “ಬ್ರಹ್ಮ
ರಾಕ್ಷಸ’ ಎಂದು ನೀವು ಕೇಳಬಹುದು. ಇದಕ್ಕೆ ಉತ್ತರ ಹಾರರ್‌ ಸಿನಿಮಾ. ಹೌದು, “ಬ್ರಹ್ಮ ರಾಕ್ಷಸ’ ಎಂಬ ಹಾರರ್‌ ಸಿನಿಮಾವೊಂದು ಸೆಟ್ಟೇರಲು
ಅಣಿಯಾಗುತ್ತಿದೆ. ಈ ಹಿಂದೆ ಪ್ರಿಯಾಂಕಾ ಉಪೇಂದ್ರ ಮುಖ್ಯಭೂಮಿಕೆಯಲ್ಲಿದ್ದ “ಮಮ್ಮಿ’ ಹಾಗೂ “ದೇವಕಿ’ ಚಿತ್ರವನ್ನು ನಿರ್ದೇಶಿಸಿರುವ ಲೋಹಿತ್‌ ಈಗ ಔಟ್‌ ಅಂಡ್‌ ಔಟ್‌ ಹಾರರ್‌ ಸಿನಿಮಾ ಮಾಡಲು ಮುಂದಾಗಿದ್ದು, ಆ ಚಿತ್ರಕ್ಕೆ “ಬ್ರಹ್ಮ ರಾಕ್ಷಸ’ ಎಂದು ಹೆಸರಿಡಲಾಗಿದೆ.

ಈ ಚಿತ್ರವನ್ನು ಪುಷ್ಕರ್‌ ನಿರ್ಮಿಸುತ್ತಿದ್ದಾರೆ. ಈಗಾಗಲೇ “ಅವನೇ ಶ್ರೀಮನ್ನಾರಾಯಣ’, “ಹಂಬಲ್‌ ಪೊಲಿಟಿಷಿಯನ್‌’ ಸಿನಿಮಾಗಳನ್ನು ನಿರ್ಮಿಸಿರುವ ಪುಷ್ಕರ್‌ ಈಗ “ಬ್ರಹ್ಮ ರಾಕ್ಷಸ’ ಸಿನಿಮಾ ನಿರ್ಮಾಣ ಮಾಡಲು ಮುಂದಾಗಿದ್ದಾರೆ. ಇತ್ತೀಚೆಗೆ ನಿರ್ದೇಶಕ ಲೋಹಿತ್‌ ಹುಟ್ಟುಹಬ್ಬಕ್ಕೆ ಉಡುಗೊರೆಯಾಗಿ ಚಿತ್ರದ ಟೈಟಲ್‌ ರಿವೀಲ್‌ ಮಾಡಿದ್ದಾರೆ. ಎಲ್ಲಾ ಓಕೆ, ಈ ಚಿತ್ರ ಯಾವಾಗ ಆರಂಭವಾಗುತ್ತದೆ ಎಂದು ನೀವು ಕೇಳಬಹುದು. ಅದಕ್ಕೆ ಉತ್ತರ ಸೆಪ್ಟೆಂಬರ್‌. ಹೌದು, ಸೆಪ್ಟೆಂಬರ್‌ನಲ್ಲಿ ಚಿತ್ರ ಆರಂಭವಾಗಲಿದೆ. ಈಗಷ್ಟೇ ಸ್ಕ್ರಿಪ್ಟ್ ಅಂತಿಮವಾಗಿದ್ದು, ನಿರ್ಮಾಪಕ, ನಿರ್ದೇಶಕರು ಚಿತ್ರದ ತಾರಾಬಳಗ, ತಾಂತ್ರಿಕ ಬಳಗದ ಆಯ್ಕೆಯಲ್ಲಿ ತೊಡಗಿದ್ದಾರೆ.
ಚಿತ್ರದ ಬಗ್ಗೆ ಮಾತನಾಡುವ ಲೋಹಿತ್‌, “ಇದು ರೆಗ್ಯುಲರ್‌ ಶೈಲಿಯ ಹಾರರ್‌ ಸಿನಿಮಾವಲ್ಲ. ಹೊಸ ಬಗೆಯಲ್ಲಿ ಸಿನಿಮಾವನ್ನು ಕಟ್ಟಿಕೊಡಲಿದ್ದೇವೆ’ ಎನ್ನುತ್ತಾರೆ.