ಸೆಪ್ಟೆಂಬರ್ 15ರಂದು ‘ಬುದ್ಧಿವಂತ 2′ ಬಿಡುಗಡೆ

Team Udayavani, Jul 30, 2023, 4:16 PM IST

ನಟ ರಿಯಲ್‌ ಸ್ಟಾರ್‌ ಉಪೇಂದ್ರ “ಬುದ್ಧಿವಂತ 2′ ಸಿನಿಮಾದಲ್ಲಿ ಅಭಿನಯಿಸುತ್ತಿರುವುದು ನಿಮಗೆ ಗೊತ್ತಿರಬಹುದು. ಈ ಸಿನಿಮಾದ ಬಹುತೇಕ ಕೆಲಸಗಳು ಪೂರ್ಣಗೊಂಡಿದ್ದರೂ, ಸಿನಿಮಾ ಯಾವಾಗ ಬಿಡುಗಡೆಯಾಗ ಬಹುದು? ಎಂಬ ಸಿನಿಪ್ರಿಯರ ಪ್ರಶ್ನೆಗೆ ಉತ್ತರ ಸಿಕ್ಕಿರಲಿಲ್ಲ. ಇದೀಗ ಈ ಪ್ರಶ್ನೆಗೆ ಸ್ವತಃ ಚಿತ್ರತಂಡವೇ ಉತ್ತರ ನೀಡಿದೆ.

ಹೌದು, ಉಪೇಂದ್ರ ಅಭಿನಯದ “ಬುದ್ಧಿವಂತ 2′ ಸಿನಿಮಾ ಇದೇ ಸೆಪ್ಟೆಂಬರ್‌ 15 ರಂದು ರಾಜ್ಯಾದ್ಯಂತ ಅದ್ದೂರಿಯಾಗಿ ಬಿಡುಗಡೆಯಾಗಲಿದೆ. ಸ್ವತಃ ಚಿತ್ರತಂಡವೇ ಈ ಸುದ್ದಿಯನ್ನು ಸೋಶಿಯಲ್‌ ಮೀಡಿಯಾದಲ್ಲಿ ತಿಳಿಸಿದ್ದು, ವಿಡಿಯೋ ತುಣುಕೊಂದರ ಮೂಲಕ ಚಿತ್ರತಂಡ, “ಬುದ್ಧಿವಂತ 2′ ಸಿನಿಮಾದ ಬಿಡುಗಡೆ ದಿನಾಂಕವನ್ನು ಅಧಿಕೃತವಾಗಿ ಘೋಷಣೆ ಮಾಡಿದೆ.

ಇನ್ನು ಸೆಪ್ಟೆಂಬರ್‌ 18 ರಂದು ನಟ ಉಪೇಂದ್ರ ಅವರ ಹುಟ್ಟುಹಬ್ಬವಿದ್ದು, ಉಪ್ಪಿ ಅವರಿಗೆ ಮತ್ತು ಅವರ ಅಭಿಮಾನಿ ಗಳಿಗೆ ಸ್ಪೆಷಲ್‌ ಗಿಫ್ಟ್ ಆಗಿ “ಬುದ್ಧಿವಂತ 2′ ಸಿನಿಮಾವನ್ನು ತೆರೆಗೆ ತರುವ ಯೋಜನೆ ಹಾಕಿ ಕೊಂಡಿದೆ ಚಿತ್ರತಂಡ. “ಕ್ರಿಸ್ಟಲ್‌ ಪಾರ್ಕ್‌ ಸಿನಿಮಾಸ್‌’ ಬ್ಯಾನರ್‌ನಲ್ಲಿ ಟಿ. ಆರ್‌. ಚಂದ್ರಶೇಖರ್‌ ನಿರ್ಮಿಸಿರುವ “ಬುದ್ಧಿವಂತ 2′ ಸಿನಿಮಾಕ್ಕೆ ಜೈದೇವ್‌ ನಿರ್ದೇಶನವಿದೆ.

ಸಿನಿಮಾದ ಹಾಡುಗಳಿಗೆ ಗುರುಕಿರಣ್‌ ಸಂಗೀತ ಸಂಯೋಜಿಸಿದ್ದು, ಎಸ್‌. ನವೀನ್‌ ಕುಮಾರ್‌ ಛಾಯಾಗ್ರಹಣ, ಕೆ. ಎಂ. ಪ್ರಕಾಶ್‌ ಸಂಕಲನ ಚಿತ್ರಕ್ಕಿದೆ. ಚಿತ್ರದ ಸಾಹಸ ದೃಶ್ಯಗಳಿಗೆ ರವಿವರ್ಮ, ವಿಕ್ರಮ್‌ ಸಾಹಸ ಸಂಯೋಜನೆಯಿದೆ. “ಬುದ್ಧಿವಂತ 2′ ಸಿನಿಮಾದಲ್ಲಿ ಉಪೇಂದ್ರ ಅವರಿಗೆ ನಾಯಕಿಯರಾಗಿ ಸೋನಾಲ್‌ ಮೊಂಟೆರೊ, ಮೇಘನಾ ರಾಜ್‌ ನಟಿಸಿದ್ದಾರೆ.