Chaithra J Achar: ಮಾರ್ನಮಿ ತಂಡ ಸೇರಿದ ಚೈತ್ರಾ

Team Udayavani, Sep 23, 2024, 1:17 PM IST

ಕನ್ನಡ ಚಿತ್ರರಂಗದಲ್ಲಿ ಹೊಸಥರದ ಸಿನಿಮಾಗಳು ಮತ್ತು ಬೋಲ್ಡ್‌ ಎನಿಸುವಂಥ ಪಾತ್ರಗಳ ಮೂಲಕ ಗುರುತಿಸಿಕೊಳ್ಳುತ್ತಿರುವ ನಟಿ ಚೈತ್ರಾ ಜೆ. ಆಚಾರ್‌ (Chaitra J Achar). ಸದ್ಯ ಕನ್ನಡದಲ್ಲಿ ಬ್ಯಾಕ್‌ ಟು ಬ್ಯಾಕ್‌ ಸಿನಿಮಾಗಳ ಮೂಲಕ ಗುರುತಿಸಿಕೊಳ್ಳುತ್ತಿರುವ ಚೈತ್ರಾ ಜೆ. ಆಚಾರ್‌ ಈಗ ಹೊಸ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಅದು “ಮಾರ್ನಮಿ’  (Maarnami). ಹೀಗೊಂದು ಸಿನಿಮಾದಲ್ಲಿ ಚೈತ್ರಾ ನಟಿಸುತ್ತಿದ್ದು, ಚಿತ್ರವನ್ನು ರಿಶಿತ್‌ ಶೆಟ್ಟಿ ನಿರ್ದೇಶನ ಮಾಡುತ್ತಿದ್ದು, ರಿತ್ವಿಕ್‌ ನಾಯಕರಾಗಿ ನಟಿಸುತ್ತಿದ್ದಾರೆ.

ಚಿತ್ರದ ಬಗ್ಗೆ ಮಾತನಾಡುವ ಚೈತ್ರಾ, “ಕಥೆ ಬಹಳ ಇಷ್ಟವಾಯ್ತು. ಡೇಟ್‌ ಸಮಸ್ಯೆ ಇದೆ ಆಗಲ್ಲ ಎಂದೆ. ಮತ್ತೆ ಕಥೆ ನನ್ನ ಬಳಿಯೇ ಬಂತು. ಡೇಟ್ಸ್‌ ಅಡ್ಜೆಸ್ಟ್‌ ಮಾಡಿಕೊಳ್ಳೋಣಾ ಎಂದರು. ಅದ್ಭುತ ಕಥೆ. ಟೆಕ್ನಿಕಲ್‌ ಆಗಿ ಚಿತ್ರ ಸ್ಟ್ರಾಂಗ್‌ ಇದೆ. ರಿಷಿತ್‌ ಕಥೆ ಹೇಳಲು ಬಂದಾಗ ಎಲ್ಲಿಯೂ ಬೋರ್ ಆಗಲಿಲ್ಲ. ಇಷ್ಟು ಬೇಗ ಮುಗಿಯಿತಾ ಅನಿಸಿತು. ರಿತ್ವಿಕ್‌ ಅವರ ಜೊತೆ ಕೆಲಸ ಮಾಡಲು ಖುಷಿ ಇದೆ. ಕಥೆ ನಂಬಿದ್ದೇವೆ, ಚರಣ್‌ ರಾಜ್‌ ಅವರ ಮ್ಯೂಸಿಕ್‌ ಇದೆ. ನಾನು ಶೂಟಿಂಗ್‌ಗೆ ಹೊರಡಲು ಎಕ್ಸೈಟ್‌ ಆಗಿದ್ದೇನೆ ಎನ್ನುತ್ತಾರೆ.

ಚೈತ್ರಾ ಜೆ. ಆಚಾರ್‌ ಈಗ ಕನ್ನಡದ ಜೊತೆಗೆ ತಮಿಳು ಚಿತ್ರರಂಗದಲ್ಲೂ ಬಿಝಿಯಾಗುವ ಲಕ್ಷಣ ತೋರುತ್ತಿದ್ದಾರೆ. ಇತ್ತೀಚೆಗಷ್ಟೇ ತಮಿಳಿನ ಶಶಿಕುಮಾರ್‌ ಚಿತ್ರಕ್ಕೆ ನಾಯಕಿಯಾಗಿ ಆಯ್ಕೆಯಾಗಿದ್ದ ಚೈತ್ರಾಗೆ ಈಗ ಮತ್ತೂಂದು ಬಿಗ್‌ ಆಫ‌ರ್‌ ತಮಿಳಿನಿಂದಲೇ ಸಿಕ್ಕಿದೆ. ಅದು ತಮಿಳು ನಟ ಸಿದ್ಧಾರ್ಥ್ ನಾಯಕರಾಗಿರುವ ಸಿನಿಮಾ. ಸಿದ್ಧಾರ್ಥ್ ಅವರ 40ನೇ ಸಿನಿಮಾಕ್ಕೆ ಚೈತ್ರಾ ನಾಯಕಿಯಾಗಿದ್ದಾರೆ. ಈ ಮೂಲಕ ಬ್ಯಾಕ್‌ ಟು ಬ್ಯಾಕ್‌ ಎರಡು ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ.