Chandan Shetty; ಟ್ರೆಂಡಿಗ್’ನಲ್ಲಿರಬೇಕಾದ್ರೆ ಏನ್ ಮಾಡೋಣ..: ಸೂತ್ರಧಾರಿ ಹಾಡು ಬಂತು

Team Udayavani, Aug 29, 2023, 4:18 PM IST

ಗಾಯನ, ಸಂಗೀತ ನಿರ್ದೇಶನದಲ್ಲಿ ತೊಡಗಿದ್ದ ಚಂದನ್‌ ಶೆಟ್ಟಿ ಈಗ ಹೀರೋ ಆಗಿ ಬಿಝಿಯಾಗುತ್ತಿದ್ದಾರೆ. ಈಗಾಗಲೇ ಚಂದನ್‌ ಎರಡ್ಮೂರು ಸಿನಿಮಾಗಳಲ್ಲಿ ಹೀರೋ ಆಗಿ ನಟಿಸುತ್ತಿದ್ದಾರೆ. ಅದರಲ್ಲಿ “ಸೂತ್ರಧಾರಿ’ ಚಿತ್ರ ಕೂಡಾ ಒಂದು.

ನವರಸನ್‌ ನಿರ್ಮಾಣದ ಈ ಚಿತ್ರ ಚಿತ್ರೀಕರಣ ಪೂರೈಸಿ ಬಿಡುಗಡೆಯ ಹಂತಕ್ಕೆ ಬಂದಿದೆ. ಈಗಾಗಲೇ ಈ ಚಿತ್ರದ “ಡ್ಯಾಶ್‌’ ಸಾಂಗ್‌ ಬಿಡುಗಡೆಯಾಗಿ ಹಿಟ್‌ಲಿಸ್ಟ್‌ ಸೇರಿದೆ. ಈಗ ಚಿತ್ರದ ಮತ್ತೂಂದು ಹಾಡು ಬಿಡುಗಡೆಯಾಗಿದೆ. ಅದು “ಟ್ರೆಂಡಿಂಗ್‌ನಲ್ಲಿರಬೇಕಾದರೆ ಏನ್‌ ಮಾಡ್ಬೇಕು’ ಎಂಬ ಹಾಡು.

ಇತ್ತೀಚೆಗೆ ಈ ಹಾಡು ಬಿಡುಗಡೆಯಾಗಿದ್ದು ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಚಂದನ್‌ ಶೆಟ್ಟಿ ಈ ಹಾಡಿಗೆ ಸಂಗೀತ ನೀಡಿ, ಹಾಡಿದ್ದಾರೆ. ವಿಜಯ್‌ ಈಶ್ವರ್‌ ಸಾಹಿತ್ಯ ಈ ಚಿತ್ರಕ್ಕಿದೆ. ಮೋಹನ್‌ ಅವರು ನೃತ್ಯ ನಿರ್ದೇಶಿಸಿರುವ ಈ ಹಾಡಿಗೆ ಚಂದನ್‌ ಶೆಟ್ಟಿ ಹಾಗೂ ಅಪೂರ್ವ ಹೆಜ್ಜೆ ಹಾಕಿದ್ದಾರೆ.

“ಕಳೆದ ಡಿಸೆಂಬರ್‌ನಲ್ಲಿ ಬಿಡುಗಡೆಯಾದ ನಮ್ಮ ಚಿತ್ರದ ಡ್ಯಾಶ್‌ ಸಾಂಗ್‌ ಭರ್ಜರಿ ಯಶಸ್ಸು ಕಂಡಿದೆ. ಈಗ ಈ ಹಾಡು ಬಿಡುಗಡೆಯಾಗಿದೆ. ಹಾಡು ಬಿಡುಗಡೆಯಾದ ಕೆಲವೇ ಗಂಟೆಗಳಲ್ಲಿ ಒಂದು ಮಿಲಿಯನ್‌ ವೀಕ್ಷಣೆಯಾಗಿದೆ. ಇನ್ನೊಂದು ಹಾಡು ಮುಗಿದರೆ, ಚಿತ್ರೀಕರಣ ಮುಕ್ತಾಯವಾಗುತ್ತದೆ. ಸದ್ಯದಲ್ಲೇ ಚಿತ್ರವನ್ನು ತೆರೆಗೆ ತರುತ್ತೇನೆ’ ಎಂದು ವಿವರ ನೀಡಿದರು ನಿರ್ಮಾಪಕ ನವರಸನ್‌ ತಿಳಿಸಿದರು.

ನಾಯಕ ಚಂದನ್‌ ಶೆಟ್ಟಿ ಅವರಿಗೆ ಈ ಹಾಡು ಕೂಡಾ ದೊಡ್ಡ ಹಿಟ್‌ ಆಗುವ ವಿಶ್ವಾಸವಿದೆ. “ಸೂತ್ರಧಾರಿ ಸಿನಿಮಾದ ಡ್ಯಾಶ್‌ ಹಾಡು ಭರ್ಜರಿ ಹಿಟ್‌ ಆಗಿರುವ ಹಿನ್ನೆಲೆಯಲ್ಲಿ ಅದನ್ನು ಮೀರಿಸುವ ಮತ್ತೂಂದು ಹಾಡು ಕೊಡುವ ಜವಾಬ್ದಾರಿ ನನಗಿತ್ತು. ಈಗ ವಿಜಯ್‌ ಈಶ್ವರ್‌ ಬರೆದಿರುವ “ಏನ್‌ ಮಾಡ್ಬೇಕು…’ ಹಾಡನ್ನು ಬಿಡುಗಡೆ ಮಾಡಿದ್ದೇವೆ. ಈ ಹಾಡು ಕೂಡ ಎಲ್ಲರ ಮನ ಗೆಲ್ಲುತ್ತದೆ ಎಂಬ ವಿಶ್ವಾಸವಿದೆ’ ಎನ್ನುವುದು ಚಿತ್ರದ ನಾಯಕ, ಸಂಗೀತ ನಿರ್ದೇಶಕ ಹಾಗೂ ಗಾಯಕ ಚಂದನ್‌ ಶೆಟ್ಟಿ ಮಾತು. ಕಿರಣ್‌ ಕುಮಾರ್‌ ಈ ಚಿತ್ರದ ನಿರ್ದೇಶಕರು. ಚಿತ್ರದಲ್ಲಿ ಅಪೂರ್ವ ನಾಯಕಿಯಾಗಿ ನಟಿಸಿದ್ದಾರೆ