ಆಗಸ್ಟ್‌ 18ಕ್ಕೆ “ಕಾಫಿ ತೋಟ’

Team Udayavani, Aug 2, 2017, 10:36 AM IST

ಬಹಳ ವರ್ಷಗಳ ನಂತರ ಹಿರಿಯ ನಿರ್ದೇಶಕ ಟಿ.ಎನ್‌. ಸೀತಾರಾಂ ನಿರ್ದೇಶಿಸಿರುವ “ಕಾಫಿ ತೋಟ’ ಚಿತ್ರವು ಆಗಸ್ಟ್‌ 18ಕ್ಕೆ ಬಿಡುಗಡೆಯಾಗುತ್ತಿದೆ. ಚಿತ್ರವನ್ನು ಜಯಣ್ಣ ಫಿಲಂಸ್‌ನಡಿ ಜಯಣ್ಣ ಮತ್ತು ಭೋಗೇಂದ್ರ ವಿತರಿಸುತ್ತಿದ್ದಾರೆ.

ಇನ್ನು ನಟ-ನಿರ್ದೇಶಕ ಉಪೇಂದ್ರ ಅವರು ಚಿತ್ರದ ಮೊದಲ ಟ್ರೇಲರ್‌ ಬಿಡುಗಡೆ ಮಾಡಿದ್ದಾರೆ. ಸೋಮವಾರ ಉಪೇಂದ್ರ ತಮ್ಮ ಹೊಸ ಚಿತ್ರದ ಚಿತ್ರೀಕರಣದಲ್ಲಿ ನಿರತರಾಗಿದ್ದರು. ಈ ಸಂದರ್ಭದಲ್ಲಿ ಅಲ್ಲಿಗೆ ಹೋದ ಚಿತ್ರತಂಡದವರು, ಉಪೇಂದ್ರ ಅವರಿಂದ ಚಿತ್ರದ ಮೊದಲ ಟ್ರೇಲರ್‌ ಬಿಡುಗಡೆ ಮಾಡಿಸಿದ್ದಾರೆ.

ಈಗಾಗಲೇ ಚಿತ್ರದ ಹಾಡುಗಳು ಬಿಡುಗಡೆಯಾಗಿದ್ದು, ಚಿತ್ರದ ಬಿಡುಗಡೆಗೆ ದಿನಗಣನೆ ಶುರುವಾಗಿದೆ. “ಕಾಫಿ ತೋಟ’ ಚಿತ್ರವನ್ನು ಮನ್ವಂತರ ಚಿತ್ರ ಬ್ಯಾನರ್‌ನಡಿ ನಿರ್ಮಿಸಲಾಗಿದ್ದು, ಇದು ಆ ಸಂಸ್ಥೆಯ ಮೊದಲ ಚಿತ್ರವಾಗಲಿದೆ. ಚಿತ್ರಕ್ಕೆ ಕಥೆ, ಚಿತ್ರಕಥೆ ಬರೆಯುವುದರ ಜೊತೆಗೆ ನಿರ್ದೇಶನ ಮಾಡಿರುವವರು ಟಿ.ಎನ್‌. ಸೀತಾರಾಂ.

ಇನ್ನು ಅಶೋಕ್‌ ಕಶ್ಯಪ್‌ ಅವರ ಛಾಯಾಗ್ರಹಣ, ಅನೂಪ್‌ ಸೀಳಿನ್‌ ಮತ್ತು ಮಿಥುನ್‌ ಮುಖುಂದನ್‌ ಅವರ ಸಂಗೀತವಿದೆ. ಚಿತ್ರದಲ್ಲಿ ರಘು ಮುಖರ್ಜಿ, ಟಿ.ಎನ್‌. ಸೀತಾರಾಂ, ರಾಧಿಕಾ ಚೇತನ್‌, ಸಂಯುಕ್ತಾ ಹೊರನಾಡು, ರಾಹುಲ್‌ ಮಾಧವ್‌, ರಾಜೇಶ್‌ ನಟರಂಗ, ಸುಧಾ ಬೆಳವಾಡಿ, ವೀಣಾ ಸುಂದರ್‌, ಸುಂದರ್‌ ರಾಜ್‌ ಸೇರಿದಂತೆ ಹಲವರು ನಟಿಸಿದ್ದಾರೆ.