ನವೆಂಬರ್‌ 1ಕ್ಕೆ “ದಂಡುಪಾಳ್ಯ-4′

Team Udayavani, Oct 6, 2019, 3:01 AM IST

“ದಂಡುಪಾಳ್ಯ…’ ಈ ಹೆಸರು ಕೇಳಿದೊಡನೆ ಹಾಗೊಮ್ಮೆ ಕ್ರೈಂ ಘಟನೆಗಳು ಕಣ್ಣ ಮುಂದೆ ಹಾದುಹೋಗುತ್ತವೆ. ಹೌದು, ಈಗಾಗಲೇ “ದಂಡುಪಾಳ್ಯ’ ಚಿತ್ರಗಳು ಕರಾಳ ಕಥೆಯನ್ನು ತೆರೆಯ ಮೇಲೆ ಅನಾವರಣಗೊಳಿಸಿವೆ. ಈಗ “ದಂಡುಪಾಳ್ಯ-4′ ಚಿತ್ರದ ಸರದಿ. ಹೌದು, ಇದೂ ಕೂಡ ಪಕ್ಕಾ ಕ್ರೈಂ ಕುರಿತಾದ ಗ್ಯಾಂಗ್‌ ಹಿನ್ನೆಲೆಯಿರುವ ಸ್ಟೋರಿ. ಇತ್ತೀಚೆಗೆ ಚಿತ್ರದ ಟ್ರೇಲರ್‌ ಬಿಡುಗಡೆಯಾಗಿದ್ದು, ಕೇವಲ ಬೆರಳೆಣಿಕೆ ದಿನದಲ್ಲೇ ಒಂದು ಮಿಲಿಯನ್‌ ಜನರು ವೀಕ್ಷಿಸಿದ್ದಾರೆ. ಇದು ಸಹಜವಾಗಿಯೇ ಚಿತ್ರತಂಡಕ್ಕೆ ಖುಷಿಯನ್ನು ಹೆಚ್ಚಿಸಿದೆ.

“ದಂಡುಪಾಳ್ಯ-4′ ಚಿತ್ರಕ್ಕೂ ಹಿಂದೆ ಬಂದ “ದಂಡುಪಾಳ್ಯ’ ಸೀಕ್ವೆಲ್‌ ಚಿತ್ರಗಳಿಗೂ ಯಾವುದೇ ಸಂಬಂಧವಿಲ್ಲ. “ದಂಡುಪಾಳ್ಯ-4′ ತನ್ನದೇ ಆದ ಕ್ರೈಂ ಕಥೆಯೊಂದಿಗೆ ಜನರ ಮುಂದೆ ಬರಲಿದೆ. ಚಿತ್ರದಲ್ಲಿ ಸುಮನ್‌ ರಂಗನಾಥ್‌ ಕಾಣಿಸಿಕೊಂಡಿದ್ದು, ಇದುವರೆಗೆ ಗ್ಲಾಮರಸ್‌ ಪಾತ್ರದಲ್ಲಿ ಮಿಂಚುತ್ತಿದ್ದ ಅವರೀಗ, ರಗಡ್‌ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ಅದರಲ್ಲೂ ಸಿಗರೇಟ್‌ ಹಿಡಿದು, ಪಕ್ಕಾ ಮಾಸ್‌ ಸಿನಿಮಾ ಅನ್ನುವುದನ್ನು ಸಾರಿದ್ದಾರೆ. ಇನ್ನು, ನಿರ್ಮಾಪಕ ವೆಂಕಟ್‌ ಚಿತ್ರದಲ್ಲಿ ಎಸಿಪಿ ಪಾತ್ರ ನಿರ್ವಹಿಸಿದ್ದಾರೆ.

ಉಳಿದಂತೆ ಚಿತ್ರದಲ್ಲಿ ಮುಮೈತ್‌ ಖಾನ್‌, ಬ್ಯಾನರ್ಜಿ, ಸಂಜೀವ್‌ಕುಮಾರ್‌, ಅರುಣ್‌, ಸೋಮು, ರಿಚ್‌ ಶಾಸ್ತ್ರೀ ಸೇರಿದಂತೆ ರಂಗಭೂಮಿ ಕಲಾವಿದರು ನಟಿಸಿದ್ದಾರೆ. ಸಂಗೀತ ಆನಂದ್‌ ರಾಜ್‌ವಿಕ್ರಂ ಸಂಗೀತವಿದೆ. ವೆಂಕಟ್‌ ಸಾಹಿತ್ಯದ ಎರಡು ಗೀತೆಗಳಿಗೆ ಚಂದನ್‌ ಶೆಟ್ಟಿ, ಆಂತೋಣಿ ದಾಸ್‌ ಧ್ವನಿಯಾಗಿದ್ದಾರೆ. ಆರ್‌.ಗಿರಿ ಅವರ ಛಾಯಾಗ್ರಹಣವಿದೆ. ಕುಂಗ್‌ಫ‌ು ಚಂದ್ರು ಸಾಹಸವಿದೆ. ನವೆಂಬರ್‌ 1 ರಂದು ಬಿಡುಗಡೆಯಾಗುತ್ತಿದ್ದು, ರಾಜ್ಯಾದ್ಯಂತ ಸುಮಾರು 350 ಕೇಂದ್ರಗಳಲ್ಲಿ ಚಿತ್ರ ಬಿಡುಗಡೆಯಾಗಲಿದೆ.