ಮತ್ತೆ ವಿದೇಶಕ್ಕೆ ದರ್ಶನ್‌

Team Udayavani, Jun 14, 2017, 11:58 AM IST

“ತಾರಕ್‌’ ಚಿತ್ರದ ಹಾಡು ಹಾಗೂ ಕೆಲವು ದೃಶ್ಯಗಳ ಚಿತ್ರೀಕರಣದಲ್ಲಿ ಮಲೇಷ್ಯಾದಲ್ಲಿ ಬಿಝಿಯಾಗಿದ್ದ ದರ್ಶನ್‌ ಕೆಲ ದಿನಗಳ ಹಿಂದೆಯಷ್ಟೇ ಬೆಂಗಳೂರಿಗೆ ಬಂದಿದ್ದರು. ಬಂದು ಕೆಲ ದಿನ ವಿಶ್ರಾಂತಿ ಪಡೆದು ಈಗ ಮತ್ತೆ ವಿದೇಶಿ ವಿಮಾನ ಹತ್ತಿದ್ದಾರೆ. ಇದು “ತಾರಕ್‌’ಗಾಗಿ. ಹೌದು, ದರ್ಶನ್‌ ಮಂಗಳವಾರ ಬೆಳಗ್ಗೆ “ತಾರಕ್‌’ ಚಿತ್ರೀಕರಣಕ್ಕಾಗಿ ಸ್ವಿಟ್ಜರ್ಲೆಂಡ್‌ಗೆ ತೆರಳಿದ್ದಾರೆ.

ಸ್ವಿಟ್ಜರ್ಲೆಂಡ್‌ ಹಾಗೂ ಇಟಲಿಯಲ್ಲಿ “ತಾರಕ್‌’ ಚಿತ್ರೀಕರಣ ನಡೆಯಲಿದ್ದು, “ತಾರಕ್‌’ ತಂಡ ವಿದೇಶಕ್ಕೆ ತೆರಳಿದೆ. ಸತತವಾಗಿ ಚಿತ್ರೀಕರಣದಲ್ಲಿ ಬಿಝಿಯಾಗಿರುವ ದರ್ಶನ್‌, “ತಾರಕ್‌’ನಲ್ಲಿ ಹೊಸ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ಚಿತ್ರದ ಕೆಲವು ಪ್ರಮುಖ ದೃಶ್ಯಗಳ ಚಿತ್ರೀಕರಣ ವಿದೇಶದಲ್ಲಿ ನಡೆಯಲಿದೆ. ಅಲ್ಲಿನ ಸುಂದರ ತಾಣಗಳಲ್ಲಿ “ತಾರಕ್‌’ ಚಿತ್ರೀಕರಣ ನಡೆಯಲಿದೆ. 

“ಮಿಲನ’ ಪ್ರಕಾಶ್‌ ನಿರ್ದೇಶನದ ಈ ಚಿತ್ರ ಪಕ್ಕಾ ಫ್ಯಾಮಿಲಿ ಎಂಟರ್‌ಟೈನರ್‌ ಆಗಿದ್ದು, ದೇವರಾಜ್‌ ಇಲ್ಲಿ ದರ್ಶನ್‌ ತಾತನಾಗಿ ಕಾಣಿಸಿಕೊಂಡಿದ್ದಾರೆ. ಶ್ರುತಿ ಹರಿಹರನ್‌ ಹಾಗೂ ಸಾನ್ವಿ ಈ ಚಿತ್ರದ ನಾಯಕಿಯರು. ಈ ಚಿತ್ರಕ್ಕಾಗಿ ದರ್ಶನ್‌ ಅವರ ಹೇರ್‌ಸ್ಟೈಲ್‌ ಕೂಡಾ ಬದಲಾಗಿದೆ. ಅಂದಹಾಗೆ, “ತಾರಕ್‌’ ಚಿತ್ರೀಕರಣ ಮುಗಿಸಿ ಜುಲೈ 6ಕ್ಕೆ ದರ್ಶನ್‌ ವಾಪಾಸ್‌ ಆಗಲಿದ್ದಾರೆ.