ದರ್ಶನ್‌- ಪ್ರೇಮ್‌ ಚಿತ್ರ “ಆಂಜನೇಯ’?

Team Udayavani, Jul 29, 2017, 10:54 AM IST

ಸದ್ಯ “ದಿ ವಿಲನ್‌’ ಚಿತ್ರೀಕರಣದಲ್ಲಿ ಬಿಝಿ ಇರುವ ಪ್ರೇಮ್‌ ಮುಂದೆ ದರ್ಶನ್‌ ಜೊತೆ ಸಿನಿಮಾ ಮಾಡುತ್ತಾರೆಂಬ ಸುದ್ದಿ ಓಡಾಡುತ್ತಿತ್ತು. ಈಗ ಅದು ಪಕ್ಕಾ ಆಗಿದೆ. ದರ್ಶನ್‌ ಹಾಗೂ ಪ್ರೇಮ್‌ ಜೊತೆಯಾಗಿ ಸಿನಿಮಾ ಮಾಡುತ್ತಿದ್ದು, ಉಮಾಪತಿ ಈ ಸಿನಿಮಾವನ್ನು ನಿರ್ಮಾಣ ಮಾಡಲಿದ್ದಾರೆ. ಈ ಹಿಂದೆ ಸುದೀಪ್‌ ಅವರ “ಹೆಬ್ಬುಲಿ’ ಚಿತ್ರದ ನಿರ್ಮಾಪಕರಲ್ಲೊಬ್ಬರಾಗಿದ್ದ ಉಮಾಪತಿ ಈಗ ದರ್ಶನ್‌ ಸಿನಿಮಾ ಮಾಡಲು ಮುಂದಾಗಿದ್ದಾರೆ.

ಈಗಾಗಲೇ ಮಾತುಕತೆಯಾಗಿ ಬಹುತೇಕ ಫೈನಲ್‌ ಆಗಿದ್ದು, ಈಗಾಗಲೇ ಪ್ರೇಮ್‌ ಕೂಡಾ ದರ್ಶನ್‌ಗೆ ಕಥೆಯ ಒನ್‌ಲೈನ್‌ ಹೇಳಿದ್ದಾರೆ. ಮೂಲಗಳ ಪ್ರಕಾರ, ಈ ಚಿತ್ರಕ್ಕೆ “ಆಂಜನೇಯ’ ಎಂದು ಟೈಟಲ್‌ ಇಡುವ ಬಗ್ಗೆ ಪ್ರೇಮ್‌ ಯೋಚಿಸುತ್ತಿದ್ದಾರೆನ್ನಲಾಗಿದೆ. ಹಾಗಂತ ಇದು ಫೈನಲ್‌ ಅಲ್ಲ, ಏಕೆಂದರೆ ಈಗಷ್ಟೇ ಪ್ರೇಮ್‌ “ದಿ ವಿಲನ್‌’ ಚಿತ್ರದ ಶೇ 40ರಷ್ಟು ಭಾಗದ ಚಿತ್ರೀಕರಣ ಮುಗಿಸಿದ್ದಾರಷ್ಟೇ.

ಇತ್ತ ಕಡೆ ದರ್ಶನ್‌ “ಕುರುಕ್ಷೇತ್ರ’ ಚಿತ್ರಕ್ಕೆ ಅಣಿಯಾಗಿದ್ದಾರೆ. “ಕುರುಕ್ಷೇತ್ರ’ದ ನಂತರ ದರ್ಶನ್‌ ತಾವು ಕಮಿಟ್‌ ಆಗಿರುವ ಸಿನಿಮಾಗಳನ್ನು ಮುಗಿಸಿಕೊಂಡು ಪ್ರೇಮ್‌ ಸಿನಿಮಾ ಮಾಡಲಿದ್ದಾರೆಂಬ ಸುದ್ದಿ ಗಾಂಧಿನಗರದಲ್ಲಿ ಓಡಾಡುತ್ತಿದೆ. ದರ್ಶನ್‌ ಹಾಗೂ ಪ್ರೇಮ್‌ ಕಾಂಬಿನೇಶನ್‌ನಲ್ಲಿ ಬಂದ “ಕರಿಯ’ ಚಿತ್ರ ದೊಡ್ಡ ಯಶಸ್ಸು ಕಂಡಿತ್ತು. ಆ ನಂತರ ಈ ಜೋಡಿ ಜೊತೆಯಾಗಿ ಸಿನಿಮಾ ಮಾಡಿರಲಿಲ್ಲ. ಈಗ ಸುಮಾರು ಹದಿನಾಲ್ಕು ವರ್ಷಗಳ ನಂತರ ಜೊತೆಯಾಗುತ್ತಿದೆ.