ಸೋಶಿಯಲ್‌ ಮೀಡಿಯಾದಲ್ಲಿ ದಚ್ಚು-ಕಿಚ್ಚ ಹವಾ

Team Udayavani, Jan 16, 2019, 5:51 AM IST

ಮಂಗಳವಾರ ಒಂದು ಕಡೆ ಸಂಕ್ರಾಂತಿ ಹಬ್ಬದ ಸಂಭ್ರಮವಾದರೆ, ಮತ್ತೂಂದು ಕಡೆ ದರ್ಶನ್‌ ಮತ್ತು ಸುದೀಪ್‌ ಅಭಿಮಾನಿಗಳಿಗೆ ಹಾಡು, ಟೀಸರ್‌ ಹಬ್ಬದ ಸಂಭ್ರಮ. ಹೌದು, ಸಂಕ್ರಾಂತಿ ಹಬ್ಬದ ಕೊಡುಗೆಯಾಗಿ ದರ್ಶನ್‌ ಅಭಿನಯದ “ಯಜಮಾನ’ ಚಿತ್ರದ ಹಾಡು ಮತ್ತು ಸುದೀಪ್‌ ನಟಿಸಿರುವ “ಪೈಲ್ವಾನ್‌’ ಚಿತ್ರದ ಟೀಸರ್‌ ಬಿಡುಗಡೆಯಾಗಿ, ಸೋಶಿಯಲ್‌ ಮೀಡಿಯಾದಲ್ಲಿ ದಚ್ಚು-ಕಿಚ್ಚ ಹವಾ ಸೃಷ್ಟಿಯಾಗಿದೆ.

ಮಂಗಳವಾರ ಬೆಳಗ್ಗೆ 11.4 ಗಂಟೆಯ ಹೊತ್ತಿಗೆ ದರ್ಶನ್‌ ಅಭಿನಯದ “ಯಜಮಾನ’ ಚಿತ್ರದ “ಹರಿ ಹರಿ ಹರಿ ಮುಗಿಲೆತ್ತರ ಹರಿ, ಶಿವನತ್ತಿರ ಮೆರೆಯುವ ನಂದಿ, ಢಮ ಢಮರುಗ ಬೆಚ್ಚಿಸುವ ಜಗ ಮೆಚ್ಚಿಸುವ ಪರಶಿವ ನಂದಿ..’ ಹಾಡು ಇದೀಗ ಯು ಟ್ಯೂಬ್‌ ಟ್ರೆಂಡಿಂಗ್‌ನಲ್ಲಿದೆ. ಬಿಡುಗಡೆಯಾದ ಕೇವಲ ಐದೇ ನಿಮಿಷದಲ್ಲಿ ಒಂದು ಲಕ್ಷ ವೀವ್ಸ್‌ ಕ್ರಾಸ್‌ ಆಗಿದ್ದು ವಿಶೇಷ. ಕೇವಲ ಐದು ಗಂಟೆಗೆ 10 ಲಕ್ಷಕ್ಕೂ ಹೆಚ್ಚು ವೀಕ್ಷಣೆ ಆಗಿದ್ದು ಮತ್ತೂಂದು ವಿಶೇಷ.

ಡಿ ಬೀಟ್ಸ್‌ ಮ್ಯೂಸಿಕ್‌ ಚಾನೆಲ್‌ನಲ್ಲಿ ಬಿಡುಗಡೆಯಾದ ಈ ಹಾಡು ಸದ್ಯಕ್ಕೆ ಸೆನ್ಸೇಷನ್‌ ಕ್ರಿಯೇಟ್‌ ಮಾಡಿರುವುದಂತೂ ಸುಳ್ಳಲ್ಲ. ಹಾಗೆ ಹೇಳುವುದಾದರೆ, ಹಿಂದೆ ಇದ್ದಂತಹ ದಾಖಲೆ ಮುರಿದ ಖ್ಯಾತಿ “ಯಜಮಾನ’ನದ್ದು ಎನ್ನಲಾಗಿದೆ. ದರ್ಶನ್‌ ಅಭಿಮಾನಿಗಳಿಗಂತೂ ಎಳ್ಳು-ಬೆಲ್ಲ ಸವಿದು ಹಾಡಿನ ಸಂಭ್ರಮದಲ್ಲಿ ಮಿಂದೆಂದ್ದ ಭಾವ ಹೇಳತೀರದು.

ಅತ್ತ ಸುದೀಪ್‌ ಅಭಿಮಾನಿಗಳಿಗೂ ಸಂಕ್ರಾಂತಿ ಡಬ್ಬಲ್‌ ಧಮಾಕ ಎಂದರೆ ತಪ್ಪಿಲ್ಲ. ಮಂಗಳವಾರ ಸಂಜೆ 4.45 ಕ್ಕೆ “ಪೈಲ್ವಾನ್‌’ ಟೀಸರ್‌ ಬಿಡುಗಡೆ ಆಗಿದ್ದೇ ತಡ, ನಿಮಿಷಗಳಲ್ಲೇ ಸಾವಿರಾರು ವೀಕ್ಷಣೆ ಆಗಿವೆ. ಅಷ್ಟೇ ಅಲ್ಲ, ಚಿತ್ರರಂಗದ ಅನೇಕ ನಟ,ನಟಿಯರು, ಗಣ್ಯರು ಮೆಚ್ಚುಗೆ ಸೂಚಿಸುವ ಮೂಲಕ ಶುಭಕೋರಿದ್ದು ವಿಶೇಷ.

ಇನ್ನೊಂದು ವಿಶೇಷವೆಂದರೆ, ಸುದೀಪ್‌ ಅವರ “ಪೈಲ್ವಾನ್‌’ ಚಿತ್ರದ ಟೀಸರ್‌ ವೀಕ್ಷಿಸಿದ ಬಾಲಿವುಡ್‌ ನಟ ಸಲ್ಮಾನ್‌ಖಾನ್‌ ಅವರು ಸಹ ಟ್ವೀಟ್‌ ಮಾಡಿ, ಶುಭಕೋರಿದ್ದಾರೆ. ಸದ್ಯಕ್ಕೆ ಸುದೀಪ್‌ ಅವರ “ಪೈಲ್ವಾನ್‌’ ಟೀಸರ್‌ ಹಾಗು ದರ್ಶನ್‌ ಅವರ “ಯಜಮಾನ’ ಚಿತ್ರದ ಲಿರಿಕಲ್‌ ವೀಡಿಯೋಗೆ ಸಾಕಷ್ಟು ಮೆಚ್ಚುಗೆ ಸಿಗುವುದರ ಜೊತೆಗೆ  ಸೋಷಿಯಲ್‌ ಮೀಡಿಯಾದಲ್ಲಿ ಟ್ರೆಂಡಿಂಗ್‌ನಲ್ಲಿವೆ.

ತಮ್ಮ “ಯಜಮಾನ’ ಚಿತ್ರದ “ಶಿವನಂದಿ’ ಹಾಡು ಬಿಡುಗಡೆಯಾಗುತ್ತಿದ್ದಂತೆಯೇ, ದರ್ಶನ್‌ ತಮ್ಮ ಟ್ವಿಟ್ಟರ್‌ ಖಾತೆಯಲ್ಲಿ ಅಭಿಮಾನಿಗಳಿಗೆ “ಎಳ್ಳು ಬೆಲ್ಲ ಸವಿಯುತ್ತ ಒಳ್ಳೆಯ ಮಾತನಾಡಿ, ನಿಮಗೂ ನಿಮ್ಮ ಕುಟುಂಬದವರಿಗೂ ಸಂಕ್ರಾಂತಿ ಹಬ್ಬದ ಶುಭಾಶಯಗಳು. “ಯಜಮಾನ’ ಚಿತ್ರದ “ಶಿವನಂದಿ’ ಹಾಡು ಕೇಳಿ ಆನಂದಿಸಿ’ ಎಂದು ಟ್ವೀಟ್‌ ಮಾಡಿದ್ದಾರೆ. ಅದೇನೆ ಇರಲಿ, ಸದ್ಯಕ್ಕೆ ದಚ್ಚು-ಕಿಚ್ಚ ಹವಾ ಹೆಚ್ಚಾಗಿದ್ದು, ಅಭಿಮಾನಿಗಳು ಸಂಕ್ರಾಂತಿಗೆ ಹೆಚ್ಚು “ಬೆಲ್ಲ’ ಸವಿದಷ್ಟೇ ಖುಷಿಯಲ್ಲಿದ್ದಾರೆ.