ಅಖಾಡಕ್ಕೆ ಡೇವಿಡ್‌

Team Udayavani, Jul 19, 2023, 3:32 PM IST

ಯುವ ಪ್ರತಿಭೆ ಶ್ರೇಯಸ್‌ ಚಿಂಗಾ ನಾಯಕನಾಗಿ ನಟಿಸಿ, ನಿರ್ದೇಶಿಸಿರುವ “ಡೇವಿಡ್‌’ ಸಿನಿಮಾ ಇದೇ ಜು. 21ರಂದು ರಾಜ್ಯಾದ್ಯಂತ ಬಿಡುಗಡೆಯಾಗುತ್ತದೆ. ಕಳೆದ ಕೆಲ ದಿನಗಳಿಂದ “ಡೇವಿಡ್‌’ ಸಿನಿಮಾದ ಪ್ರಚಾರ ಕಾರ್ಯಗಳಲ್ಲಿ ನಿರತವಾಗಿರುವ ಚಿತ್ರತಂಡ, ಸಿನಿಮಾವನ್ನು ಪ್ರೇಕ್ಷಕರಿಗೆ ತಲುಪಿಸುವ ಅಂತಿಮ ಕಸರತ್ತು ನಡೆಸುತ್ತಿದೆ.

ಇದೇ ವೇಳೆ ಮಾಧ್ಯಮಗಳ ಮುಂದೆ ಬಂದಿದ್ದ “ಡೇವಿಡ್‌’ ಚಿತ್ರತಂಡ, ಸಿನಿಮಾ ಬಿಡುಗಡೆಯ ಬಗ್ಗೆ ಒಂದಷ್ಟು ಮಾಹಿತಿಗಳನ್ನು ಹಂಚಿಕೊಂಡಿತು.

ಮೊದಲಿಗೆ “ಡೇವಿಡ್‌’ ಬಗ್ಗೆ ಮಾತಿಗಿಳಿದ ನಾಯಕ ನಟ ಕಂ ನಿರ್ದೇಶಕ ಶ್ರೇಯಸ್‌ ಚಿಂಗಾ, “ಇದೊಂದು ರೊಮ್ಯಾಂಟಿಕ್‌ ಮರ್ಡರ್‌ ಮಿಸ್ಟರಿ ಸಬ್ಜೆಸಿನಿಮಾ. ಇಲ್ಲಿಯವರೆಗೂ ಬಹುತೇಕರು ನೋಡಿರದ ಬೆಂಗಳೂರನ್ನು ಚಿತ್ರದಲ್ಲಿ ತೋರಿಸುವ ಪ್ರಯತ್ನ ಮಾಡಿದ್ದೇವೆ. ಇದೊಂದು ತಂತ್ರಜ್ಞರ ಸಿನಿಮಾ. ಎಲ್ಲ ಕಲಾವಿದರೂ ಚೆನ್ನಾಗಿ ಅಭಿನಯಿಸಿದ್ದಾರೆ. ಹೊಸಥರದ ಸಿನಿಮಾಗಳನ್ನು ಬಯಸುವ ಪ್ರೇಕ್ಷಕರಿಗೆ ಈ ಸಿನಿಮಾ ಇಷ್ಟವಾಗಲಿದೆ’ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ತಮ್ಮ ಪಾತ್ರದ ಬಗ್ಗೆ ಮಾತನಾಡಿದ ನಾಯಕಿ ಸಾರಾ ಹರೀಶ್‌, “ಈ ಹಿಂದೆ ನಾನು ಹಲವು ಜಾಹೀರಾತುಗಳಲ್ಲಿ, ಆನಂತರ “ಭರತ – ಬಾಹುಬಲಿ’ ಸಿನಿಮಾದಲ್ಲಿ ಅಭಿನಯಿಸಿದ್ದೆ. ಅದಾದ ಬಳಿಕ “ಡೇವಿಡ್‌’ ನಾಯಕಿಯಾಗಿ ಅಭಿನಯಿಸುತ್ತಿರುವ ಎರಡನೇ ಸಿನಿಮಾವಾಗಿದೆ. ವಿಭಿನ್ನ ಶೇಡ್‌ ಇರುವಂಥ ಪಾತ್ರ ಈ ಸಿನಿಮಾದಲ್ಲಿ ಸಿಕ್ಕಿದೆ’ ಎಂದರು.

ಶ್ರೇಯಸ್‌ ಚಿಂಗಾ, ಸಾರಾ ಹರೀಶ್‌ ಅವರೊಂದಿಗೆ ರಾಕೇಶ್‌ ಅಡಿಗ, ಅವಿನಾಶ್‌ ಯಳಂದೂರು, ಕಾವ್ಯಾ ಶಾ, ನಂದೀಶ್‌ ಮುಂತಾದವರು “ಡೇವಿಡ್‌’ ಸಿನಿಮಾದ ಇತರ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ನಟ ಬುಲೆಟ್‌ ಪ್ರಕಾಶ್‌ ಕೂಡ ಸಿನಿಮಾದ ಪಾತ್ರವೊಂದರಲ್ಲಿ ಕಾಣಿಸಿಕೊಂಡಿದ್ದು, ಇದು ಬುಲೆಟ್‌ ಪ್ರಕಾಶ್‌ ಅಭಿನಯಿಸಿರುವ ಕೊನೆಯ ಚಿತ್ರ ಎಂಬುದು ಚಿತ್ರತಂಡದ ಮಾತು.