ಧನಂಜಯ್‌ ಈಗ ಒಳ್ಳೇ ಹುಡ್ಗ!

Team Udayavani, Jan 2, 2017, 10:53 AM IST

ಶಿವರಾಜ್‌ಕುಮಾರ್‌ ಅಭಿನಯದ “ಟಗರು’ ಸಿನಿಮಾದಲ್ಲಿ ಧನಂಜಯ್‌ “ಕೆಟ್ಟ’ ಹುಡುಗನ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ ಎಂಬ ಸುದ್ದಿ ಎಲ್ಲರಿಗೂ ಗೊತ್ತು. ಈಗ ಅವರು “ಒಳ್ಳೇ ಹುಡುಗ’ನಾಗೋಕೆ ರೆಡಿಯಾಗಿದ್ದಾರೆ! ಹೌದು, ಧನಂಜಯ್‌ ಈಗ ಹೊಸದೊಂದು ಚಿತ್ರ ಒಪ್ಪಿಕೊಂಡಿದ್ದಾರೆ. ಆ ಚಿತ್ರದಲ್ಲಿ ಅವರದು “ಒಳ್ಳೇ ಹುಡುಗ’ನ ಪಾತ್ರವಂತೆ. ಅಂದಹಾಗೆ, ಧನಂಜಯ್‌ ಅಭಿನಯದ ಚಿತ್ರವನ್ನು ನಿರ್ದೇಶನ ಮಾಡುತ್ತಿರೋದು ಗೌಸ್‌ಪೀರ್‌.

ಈ ಹಿಂದೆ ದಿಗಂತ್‌ ಅಭಿನಯದ “ಶಾರ್ಪ್‌ಶೂಟರ್‌’ ಚಿತ್ರ ನಿರ್ದೇಶಿಸಿದ್ದ ಗೌಸ್‌ಪೀರ್‌ಗೆ ಇದು ಎರಡನೇ ನಿರ್ದೇಶನದ ಸಿನಿಮಾ. ಮೊದಲ ನಿರ್ದೇಶನ ಚಿತ್ರದ ಬಳಿಕ ಗೌಸ್‌ಪೀರ್‌ ಒಂದು ವರ್ಷ ಯಾವುದೇ ಸಿನಿಮಾ ನಿರ್ದೇಶನ ಮಾಡುವ ಗೋಜಿಗೆ ಹೋಗಿರಲಿಲ್ಲ. ಹಾಗಂತ, ಒಂದು ವರ್ಷ ಗ್ಯಾಪ್‌ನಲ್ಲಿ ಅವರು ಸುಮ್ಮನೆ ಕೂರೂ ಇರಲಿಲ್ಲ. ಆ ಗ್ಯಾಪ್‌ನಲ್ಲಿ ಎರಡು ಸ್ಕ್ರಿಪ್ಟ್ಗಳನ್ನು ರೆಡಿ ಮಾಡಿಕೊಂಡಿದ್ದಾರೆ.

ಒಂದು “ಭಗ್ನ ಪ್ರೇಮಿಗಳ ಸಂಘ’ ಹಾಗೂ ಹೆಸರಿಡದ ಇನ್ನೊಂದು ಸಿನಿಮಾದ ಸ್ಕ್ರಿಪ್ಟ್ ಕೆಲಸ ಮುಗಿಸಿ, ಈಗ ಧನಂಜಯ್‌ಗಾಗಿ ಹೊಸ ಸಿನಿಮಾವನ್ನು ಕೈಗೆತ್ತಿಕೊಂಡು, “ಟಗರು’ ಚಿತ್ರದಲ್ಲಿ ಕೆಟ್ಟ ಹುಡುಗನಾಗಿ ಕಾಣಿಸಿಕೊಂಡಿರುವ ಅವರನ್ನೀಗ, ಈ ಚಿತ್ರದ ಮೂಲಕ “ಒಳ್ಳೇ ಹುಡಗ’ನನ್ನಾಗಿಸಲು ಹೊರಟಿದ್ದಾರೆ ನಿರ್ದೇಶಕರು. ಈ ಚಿತ್ರವನ್ನು ಪ್ರದ್ಯುನ್‌ ಗ್ರೂಪ್ಸ್‌ ಬ್ಯಾನರ್‌ನಡಿ ಪುನೀತ್‌ಗೌಡ ಎಂಬುವವರು ನಿರ್ಮಿಸುತ್ತಿದ್ದಾರೆ.

ಇವರಿಗೆ ಸಿನಿಮಾ ನಿರ್ಮಾಣ ಹೊಸದಲ್ಲ. ಈಗಾಗಲೇ ಚೇತನ್‌ಚಂದ್ರ ಅಭಿನಯದ “ಮಾಲ್ಗುಡಿ ಸ್ಟೇಷನ್‌’ ಎಂಬ ಚಿತ್ರವನ್ನೂ ನಿರ್ಮಿಸುತ್ತಿದ್ದಾರೆ. ಧನಂಜಯ್‌ ಅಭಿನಯದ ಚಿತ್ರಕ್ಕಿನ್ನೂ ಗೌಸ್‌ಪೀರ್‌ ನಾಮಕರಣ ಮಾಡಿಲ್ಲವಂತೆ. “ಇದೊಂದು ರೊಮ್ಯಾಂಟಿಕ್‌ ಥ್ರಿಲ್ಲರ್‌ ಸಿನಿಮಾ ಆಗಿದ್ದು, ಒಬ್ಬ ಮುಗ್ಧ ಹುಡುಗನೊಬ್ಬ ತುಂಬಾ ಒಳ್ಳೆಯವನಾದರೆ, ಸೊಸೈಟಿಯಲ್ಲಿ ಹೇಗೆಲ್ಲಾ ಸಮಸ್ಯೆಗಳನ್ನು ಎದುರಿಸಬೇಕಾಗುತ್ತದೆ ಎಂಬುದನ್ನಿಲ್ಲಿ ಹೇಳ ಹೊರಟಿದ್ದಾರಂತೆ ಗೌಸ್‌ಪೀರ್‌.

ಮಂಗಳೂರು, ಬೆಂಗಳೂರು ಹಾಗೂ ಉತ್ತರ ಕರ್ನಾಟಕದಲ್ಲಿ ಚಿತ್ರೀಕರಣ ನಡೆಯಲಿದೆ. ಚಿತ್ರದಲ್ಲಿ 4 ಹಾಡುಗಳಿರಲಿವೆ. ಸದ್ಯಕ್ಕೆ ಸಂಗೀತ ಮತ್ತು ಛಾಯಾಗ್ರಾಹಕರ ಆಯ್ಕೆ ಪ್ರಕ್ರಿಯೆ ನಡೆಯುತ್ತಿದೆ. ಉಳಿದಂತೆ ನಾಯಕಿ ಹಾಗೂ ತಾರಾಬಳಗದ ಆಯ್ಕೆ ಕೂಡ ಇಷ್ಟರಲ್ಲೇ ನಡೆಯಲಿದೆ ಎಂದು ವಿವರ ಕೊಡುತ್ತಾರೆ ಗೌಸ್‌ಪೀರ್‌. ಅದೇನೆ ಇರಲಿ, ಧನಂಜಯ್‌ “ಟಗರು’ ಚಿತ್ರದಲ್ಲಿ ನೆಗೆಟಿವ್‌ ಪಾತ್ರ ಮಾಡುತ್ತಿದ್ದರೆ, ಈ ಚಿತ್ರದ ಮೂಲಕ “ಒಳ್ಳೇ ಹುಡುಗ’ನಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ.