Kannada Cinema; ಮಾರ್ಚ್ 22ಕ್ಕೆ ‘ದಿಲ್ ಖುಷ್’ ತೆರೆಗೆ

Team Udayavani, Mar 15, 2024, 6:49 PM IST

“ದಿಲ್‌ ಖುಷ್‌’ ಎಂಬ ಸ್ವೀಟ್‌ ಬಗ್ಗೆ ಬಹುತೇಕರಿಗೆ ಗೊತ್ತಿರುತ್ತದೆ. ಈಗ ಇದೇ “ದಿಲ್‌ ಖುಷ್‌’ ಎಂಬ ಹೆಸರಿನಲ್ಲಿ ಹೊಸಬರ ಸಿನಿಮಾವೊಂದು ಕನ್ನಡದಲ್ಲಿ ತೆರೆಗೆ ಬರಲು ಸಿದ್ಧವಾಗುತ್ತಿದೆ. ಸಿಂಪಲ್‌ ಸುನಿ ಸೇರಿದಂತೆ ಹಲವು ನಿರ್ದೇಶಕರ ಜೊತೆಗೆ ನಿರ್ದೇಶನ ವಿಭಾಗದಲ್ಲಿ ಕೆಲಸ ಮಾಡಿದ ಅನುಭವವಿರುವ ಯುವ ಪ್ರತಿಭೆ ಪ್ರಮೋದ್‌ ಜಯ “ದಿಲ್‌ ಖುಷ್‌’ಗೆ ಕಥೆ, ಚಿತ್ರಕಥೆ ಬರೆದು ನಿರ್ದೇಶನ ಮಾಡಿ, ಸಿನಿಮಾವನ್ನು ತೆರೆಗೆ ತರುತ್ತಿದ್ದಾರೆ. ಈ ಚಿತ್ರ ಮಾರ್ಚ್‌ 22ರಂದು ತೆರೆಕಾಣಲಿದೆ.

ಚಿತ್ರದ ಬಗ್ಗೆ ಮಾತನಾಡುವ ಪ್ರಮೋದ್‌ ಜಯ, “ಸಿನಿಮಾದ ಹೆಸರೇ ಹೇಳುವಂತೆ ಇದೊಂದು ಯೂಥ್‌ಫ‌ುಲ್‌ ಸಬ್ಜೆಕ್ಟ್ ಸಿನಿಮಾ. ಸ್ನೇಹ, ಪ್ರೀತಿ, ಸಂಬಂಧ ಎಲ್ಲದರ ಎಳೆಯನ್ನು ಇಟ್ಟುಕೊಂಡು ಸಿನಿಮಾವನ್ನು ಹೊಸಥರದಲ್ಲಿ ಪ್ರೇಕ್ಷಕರ ಮುಂದೆ ತರುವ ಪ್ರಯತ್ನ ಮಾಡಿದ್ದೇವೆ. ಕಿರಿಯರಿಂದ ಹಿಡಿದು ಹಿರಿಯರವರೆಗೆ ಎಲ್ಲರಿಗೂ ಇಷ್ಟವಾಗುವಂಥ ಕಥೆ ಸಿನಿಮಾದಲ್ಲಿದೆ’ ಎಂದರು.

ಇನ್ನು ಈಗಾಗಲೇ ಬಿಡುಗಡೆಯಾಗಿರುವ “ದಿಲ್‌ ಖುಷ್‌’ ಸಿನಿಮಾದ ಪ್ರೇಮಗೀತೆಗೆ ಪ್ರಸಾದ್‌ ಕೆ. ಶೆಟ್ಟಿ ಸಂಗೀತ ಸಂಯೋಜಿಸಿದ್ದು, ಗೌಸ್‌ಪೀರ್‌ ಸಾಹಿತ್ಯ ರಚಿಸಿದ್ದಾರೆ. “ಜಯಪ್ರಭ ಕಲರ್‌ ಫ್ರೇಮ್ಸ್‌’ ಬ್ಯಾನರಿನಲ್ಲಿ ಜಯಲಕ್ಷ್ಮೀ ಪ್ರವೀಣ್‌ ಮತ್ತು ಪ್ರಭ ಶೇಖರ್‌ ನಿರ್ಮಿಸಿರುವ “ದಿಲ್‌ ಖುಷ್‌’ ಸಿನಿಮಾದಲ್ಲಿ ನವ ಪ್ರತಿಭೆಗಳಾದ ರಂಜಿತ್‌, ಸ್ಪಂದನಾ ಸೋಮಣ್ಣ ಜೋಡಿಯಾಗಿ ಕಾಣಿಸಿಕೊಂಡಿದ್ದಾರೆ. ಉಳಿದಂತೆ ರಂಗಾಯಣ ರಘು, ಧರ್ಮಣ್ಣ ಕಡೂರು, ರಘು ರಾಮನಕೊಪ್ಪ, ಅರುಣಾ ಬಾಲ ರಾಜ್‌, ರವಿ ಭಟ್‌ ಮತ್ತಿತರರು ಸಿನಿಮಾದ ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ. “ದಿಲ್‌ ಖುಷ್‌’ ಸಿನಿಮಾಕ್ಕೆ ನಿವಾಸ್‌ ನಾರಾಯಣ್‌ ಛಾಯಾಗ್ರಹಣ, ಜ್ಞಾನೇಶ್‌ ಬಿ. ಮಠದ್‌ ಸಂಕಲನವಿದೆ.