‘ಶೋಕಿವಾಲ’ನ ಹಾಡಿನಲ್ಲಿ ಡೈರೆಕ್ಟರ್ಸ್ ಡ್ಯಾನ್ಸ್

Team Udayavani, Apr 19, 2022, 12:09 PM IST

ಅಜೇಯ್‌ ರಾವ್‌ ನಟನೆಯ “ಶೋಕಿವಾಲ’ ಚಿತ್ರ ಏ.29ಕ್ಕೆ ಬಿಡುಗಡೆಯಾಗುತ್ತಿದೆ. ಮೊದಲ ಹಂತವಾಗಿ ಚಿತ್ರತಂಡ ಬಿಡುಗಡೆ ಮಾಡಿರುವ ಟೀಸರ್‌ ಹಿಟ್‌ಲಿಸ್ಟ್‌ ಸೇರಿದ್ದು, ಈಗ ಚಿತ್ರತಂಡ ಹಾಡೊಂದನ್ನು ಬಿಡುಗಡೆ ಮಾಡಲು ಮುಂದಾಗಿದೆ. ತುಂಬಾ ವಿಶೇಷವಾದ ಹಾಡಾಗಿರುವುದರಿಂದ ಚಿತ್ರತಂಡ ಕೂಡಾ ಎಕ್ಸೆ„ಟ್‌ ಆಗಿದೆ. ಸಾಮಾನ್ಯವಾಗಿ ಕ್ಯಾಮರಾ ಹಿಂದೆ ನಿಂತು ಆ್ಯಕ್ಷನ್‌ ಕಟ್‌ ಹೇಳುವ ನಿರ್ದೇಶಕರು, ಈ ಬಾರಿ ಕ್ಯಾಮರಾ ಮುಂದೆ ಬಂದಿದ್ದಾರೆ.

ಹೌದು, “ಶೋಕಿವಾಲ’ ಚಿತ್ರದ ಹಾಡೊಂದರಲ್ಲಿ ಕನ್ನಡ ಚಿತ್ರರಂಗದ ಐವರು ನಿರ್ದೇಶಕರು ಸ್ಟೆಪ್‌ ಹಾಕಿದ್ದಾರೆ. ಈ ಮೂಲಕ ನಾಯಕ ಅಜೇಯ್‌ ರಾವ್‌ಗೆ ಸಾಥ್‌ ನೀಡಿದ್ದಾರೆ. ನಿರ್ದೇಶಕರಾದ ರವಿ ಬಸ್ರೂರು, ಶಶಾಂಕ್‌, ಹರಿ ಸಂತೋಷ್‌, ವಿ.ನಾಗೇಂದ್ರ ಪ್ರಸಾದ್‌ ಹಾಗೂ ನಂದಕಿಶೋರ್‌ ಹಾಡಿನಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಹಾಡನ್ನು ಚೇತನ್‌ ಕುಮಾರ್‌ ಬರೆದಿದ್ದು, ಸಂತೋಷ್‌ ವೆಂಕಿ ಹಾಡಿದ್ದಾರೆ. ಚಿತ್ರಕ್ಕೆ ಶ್ರೀಧರ್‌ ಸಂಭ್ರಮ್‌ ಸಂಗೀತವಿದೆ.

ಇದನ್ನೂ ಓದಿ:ಕನ್ನಡ ಚಿತ್ರರಂಗದಿಂದ ಬ್ಯಾಕ್‌ ಟು ಬ್ಯಾಕ್‌ ‘ಪ್ಯಾನ್ ಇಂಡಿಯಾ’ ಸಿನಿಮಾ

ಈಗ ಈ ಹಾಡನ್ನು ಬಿಡುಗಡೆ ಮಾಡಲು ಚಿತ್ರತಂಡ ನಿರ್ಧರಿಸಿದ್ದು, ಇಂದು ಕಲಾವಿದರ ಸಂಘದಲ್ಲಿ ಹಾಡು ಬಿಡುಗಡೆಯಾಗಲಿದೆ. ಈ ಹಾಡಿನಲ್ಲಿ ಕಾಣಿಸಿ ಕೊಂಡ ಐವರು ನಿರ್ದೇಶಕರೇ ಸಾಂಗ್‌ ರಿಲೀಸ್‌ ಮಾಡಲಿದ್ದಾರೆ.

ಅಜೇಯ್‌ ರಾವ್‌ ಹಾಗೂ ಸಂಜನಾ ಮುಖ್ಯಭೂಮಿಕೆಯಲ್ಲಿ ನಟಿಸಿರುವ ಈ ಚಿತ್ರವನ್ನು ಜಾಕಿ ನಿರ್ದೇಶಿಸಿದ್ದಾರೆ. ಈಗಾಗಲೇ ಹಲವು ಯಶಸ್ವಿ ಚಿತ್ರಗಳನ್ನು ನಿರ್ಮಿಸಿರುವ ಟಿ.ಆರ್‌.ಚಂದ್ರಶೇಖರ್‌ ತಮ್ಮ ಕ್ರಿಸ್ಟಲ್‌ ಪಾರ್ಕ್‌ ಬ್ಯಾನರ್‌ನಡಿ ಈ ಚಿತ್ರವನ್ನು ನಿರ್ಮಿಸಿದ್ದಾರೆ.