ಡಾಲಿ ಧನಂಜಯ್‌ ಹೊಸ ಚಿತ್ರ ಹೆಡ್‌ ಬುಷ್‌

Team Udayavani, Aug 17, 2020, 5:44 PM IST

ಈ ವರ್ಷದ ಆರಂಭದಲ್ಲಿ ನಟ ಡಾಲಿ ಧನಂಜಯ್‌ ಬೆಂಗಳೂರಿನ ಮಾಜಿ ಭೂಗತ ದೊರೆ ಎಂ.ಪಿ ಜಯರಾಜ್‌ ಬಯೋಪಿಕ್‌ ನಲ್ಲಿ ಅಭಿನಯಿಸಲಿದ್ದಾರೆ ಎಂಬ ಸುದ್ದಿ ಹೊರಬಿದ್ದಿತ್ತು. ಈ ಬಗ್ಗೆ ಒಂದಷ್ಟು ಮಾಹಿತಿ ನೀಡಲು ಮಾಧ್ಯಮಗಳ ಮುಂದೆ ಬಂದಿದ್ದ ಚಿತ್ರತಂಡ, ಎಂ.ಪಿ ಜಯರಾಜ್‌ ಬಯೋಪಿಕ್‌ ಬಗ್ಗೆ ಕುರಿತು ಹಲವು ವಿಚಾರಗಳನ್ನು ಹಂಚಿಕೊಂಡಿತ್ತು. ಚಿತ್ರದ ಸ್ಕ್ರಿಪ್ಟ್ ಕಾರ್ಯಗಳು ಬಹುತೇಕ ಫೈನಲ್‌ ಆಗಿದ್ದರೂ, ಈ ಚಿತ್ರದ ಟೈಟಲ್‌ ಮಾತ್ರ ಇನ್ನೂ ಫಿಕ್ಸ್ ಆಗಿರಲಿಲ್ಲ.

ಈಗ ಈ ಚಿತ್ರದ ಬಗ್ಗೆ ಮತ್ತೂಂದು ಸುದ್ದಿ ಹೊರಬಿದ್ದಿದೆ. ಅಂದಹಾಗೆ, ಎಂ.ಪಿ ಜಯರಾಜ್‌ ಬಯೋಪಿಕ್‌ ಚಿತ್ರದ ಟೈಟಲ್‌ ಅಂತಿಮವಾಗಿದೆ. ಚಿತ್ರಕ್ಕೆ “ಹೆಡ್‌ ಬುಷ್‌’ ಎಂದು ಚಿತ್ರತಂಡ ಹೆಸರಿಟ್ಟಿದೆ. ಸ್ವಾತಂತ್ರ್ಯ ದಿನಾಚರಣೆಯ ಶುಭ ಸಂದರ್ಭದಲ್ಲಿ ಚಿತ್ರದ ಟೈಟಲ್‌ ಪೋಸ್ಟರ್‌ ಅನ್ನು ಚಿತ್ರತಂಡ ಬಿಡುಗಡೆ ಮಾಡಿದೆ. ಇನ್ನು “ಹೆಡ್‌ ಬುಷ್‌’ ಚಿತ್ರದ ಟೈಟಲ್‌ ನಲ್ಲಿ ವಾಲ್ಯೂಮ್ -1 ದಿ ರೈಸ್‌ ಆ್ಯಂಡ್‌ ರೈಸ್‌ ಆಫ್ ಬೆಂಗಳೂರು ಅಂಡರ್ವಲ್ಡ್ ಎಂದು ಟ್ಯಾಗ್‌ ಲೈನ್‌ ಇಡಲಾಗಿದ್ದು, ಚಿತ್ರಕ್ಕೆ ಅಗ್ನಿ ಶ್ರೀಧರ್‌ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದಿದ್ದಾರೆ. ಅಶು ಬೆದ್ರ ವೆಂಚರ್ ಬ್ಯಾನರ್‌ ನಲ್ಲಿ ಅಶು ಬೆದ್ರ ಈ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ.

“ಹೆಡ್‌ ಬುಷ್‌’ ಚಿತ್ರದಲ್ಲಿ ಡಾನ್‌ ಎಂ.ಪಿ ಜಯರಾಜ್‌ ಪಾತ್ರದಲ್ಲಿ ಧನಂಜಯ್‌ ಕಾಣಿಸಿಕೊಳ್ಳುತ್ತಿದ್ದು, ಚಿತ್ರದ ಪಾತ್ರಕ್ಕಾಗಿ ಕಳೆದ ಕೆಲ ತಿಂಗಳಿನಿಂದ ಧನಂಜಯ್‌ ಒಂದಷ್ಟು ತಯಾರಿ ಮಾಡಿಕೊಳ್ಳುತ್ತಿದ್ದಾರೆ. 70-80 ರ ದಶಕದ ಭೂಗತ ಲೋಕದ ಕಥಾಹಂದರ ಹೊಂದಿರುವ ಚಿತ್ರವನ್ನು ಶೂನ್ಯ ನಿರ್ದೇಶನ ಮಾಡುತ್ತಿದ್ದಾರೆ. ಚಿತ್ರಕ್ಕೆ ಕರಮ್‌ ಚಾವ್ಲಾ ಛಾಯಾಗ್ರಹಣವಿದ್ದು, ಚರಣ್‌ ರಾಜ್‌ ಚಿತ್ರದ ಹಾಡುಗಳಿಗೆ ಸಂಗೀತ ಸಂಯೋಜಿಸುತ್ತಿದ್ದಾರೆ. ಸದ್ಯ “ಹೆಡ್‌ ಬುಷ್‌’ ಚಿತ್ರದ ಟೈಟಲ್‌ ಪೋಸ್ಟರ್‌ ನೋಡುಗರ ಗಮನ ಸೆಳೆಯುತ್ತಿದ್ದು, ಚಿತ್ರ ಮುಂದಿನ ವರ್ಷದಲ್ಲಿ ತೆರೆಗೆ ಬರುವ ಸಾಧ್ಯತೆ ಇದೆ.­