ಡಾ ರಾಜ್‌ ಹುಟ್ಟುಹಬ್ಬಕ್ಕೆ ಬಂಗಾರದ ಹಾಡುಗಳು

Team Udayavani, Apr 18, 2017, 11:28 AM IST

ಶಿವರಾಜಕುಮಾರ  ಅಭಿನಯದ “ಬಂಗಾರ – ಸನ್‌ ಆಫ್ ಬಂಗಾರದ ಮನುಷ್ಯ’ ಚಿತ್ರವು ಡಾ. ರಾಜಕುಮಾರ್‌ ಅವರ ಹುಟ್ಟುಹಬ್ಬವಾದ ಏಪ್ರಿಲ್‌ 24ಕ್ಕೆ ಬಿಡುಗಡೆಯಾಗಬಹುದು ಎಂದು ಈ ಮುಂಚೆ ಅಂದಾಜಿಸಲಾಗಿತ್ತು. ಆದರೆ, ಚಿತ್ರದ ಕೆಲಸಗಳಲ್ಲಿ ಸ್ವಲ್ಪ ನಿಧಾನವಾದ್ದರಿಂದ, ಚಿತ್ರದ ಬಿಡುಗಡೆ ಮೇ ತಿಂಗಳಿಗೆ ಹೋಗಿದೆ. ಹಾಗಂತ ಶಿವರಾಜಕುಮಾರ್‌ ಅವರ ಅಭಿಮಾನಿಗಳು ಬೇಸರಗೊಳ್ಳಬೇಕಿಲ್ಲ. ಚಿತ್ರ ಬಿಡುಗಡೆಯಾಗದಿದ್ದರೇನು, ಚಿತ್ರದ ಹಾಡುಗಳು ಅಂದು ಖಂಡಿತಾ ಬಿಡುಗಡೆಯಾಗಲಿದೆ.

ಹೌದು, “ಬಂಗಾರ – ಸನ್‌ ಆಫ್ ಬಂಗಾರದ ಮನುಷ್ಯ’ ಚಿತ್ರಕ್ಕೆ ವಿ. ಹರಿಕೃಷ್ಣ ಅವರು ಸಂಗೀತ ಸಂಯೋಜಿಸಿರುವ ಹಾಡುಗಳು ಏಪ್ರಿಲ್‌ 24ಕ್ಕೆ ಬಿಡುಗಡೆಯಾಗಲಿದೆ. ಈ ಚಿತ್ರದಲ್ಲಿ ಅನ್ನದಾತ ಸುಖೀಭವ ಎಂಬ ವಿಷಯವನ್ನು ಹೇಳುವುದಕ್ಕೆ ಹೊರಟಿದ್ದಾರಂತೆ ನಿರ್ದೇಶಕ ಯೋಗಿ. “ರೈತ ಸಾಕಷ್ಟು ಸಮಸ್ಯೆಗಳನ್ನು ಎದುರಿಸುತ್ತಿರುವುದು ಎಲ್ಲರಿಗೂ ಗೊತ್ತಿರುವ ವಿಷಯವೇ.

ಅಂತಹ ರೈತ ಯಾಕೆ ಸುಖವಾಗಿರಬಾರದು ಎಂಬ ಕಲ್ಪನೆಯೊಂದಿಗೆ ಮಾಡುತ್ತಿರುವ ಚಿತ್ರ ಇದು. ಒಂದು ಕ್ರಾಂತಿಕಾರಕ ಯೋಚನೆ ಇರುವಂತಹ ಚಿತ್ರ’ ಇದು ಎನ್ನುವ ಯೋಗಿ, ಈ ಚಿತ್ರವನ್ನು ನಿರ್ದೇಶಿಸುವುದರ ಜೊತೆಗೆ ಕಥೆ ಮತ್ತು ಚಿತ್ರಕಥೆಯನ್ನು ಅವರೇ ಬರೆದಿದ್ದಾರೆ. ಚಿತ್ರಕ್ಕೆ ಎಂ.ಎಸ್‌. ರಮೇಶ್‌ ಅವರ ಸಂಭಾಷಣೆಯಿದೆ.

“ಬಂಗಾರ – ಸನ್‌ ಆಫ್ ಬಂಗಾರದ ಮನುಷ್ಯ’ ಚಿತ್ರದಲ್ಲಿ ಶಿವರಾಜಕುಮಾರ್‌ ಜೊತೆಗೆ ವಿದ್ಯಾ ಪ್ರದೀಪ್‌ ನಾಯಕಿಯಾಗಿ ನಟಿಸಿದ್ದು, ಜೊತೆಗೆ ಸಿಕ್ಕಣ್ಣ, ಸಾಧು ಕೋಕಿಲ, ಶ್ರೀನಿವಾಸಮೂರ್ತಿ, ಶಿವರಾಮಣ್ಣ, ಶ್ರೀನಾಥ್‌, ಸದಾಶಿವ ಬ್ರಹ್ಮಾವರ್‌, ಶರತ್‌ ಲೋಹಿತಾಶ್ವ, ಮೈಕೋ ನಾಗರಾಜ್‌ ಸೇರಿದಂತೆ ಹಲವರು ನಟಿಸಿದ್ದಾರೆ. ಚಿತ್ರವನ್ನು ಜಯಣ್ಣ ಮತ್ತು ಭೋಗೇಂದ್ರ ನಿರ್ಮಿಸುತ್ತಿದ್ದು, ಜೈಆನಂದ್‌ ಅವರ ಛಾಯಾಗ್ರಹಣವಿದೆ.