ಪಾತ್ರಕ್ಕೆ ತೂಕ ಹೆಚ್ಚಿಸಿಕೊಂಡ ಗಣೇಶ್‌ ಹಿಂಗ್‌ ಕಾಣ್ತಾರೆ

Team Udayavani, Jan 31, 2019, 11:57 AM IST

ಈ ಫೋಟೋದಲ್ಲಿರೋದು ಬೇರಾರೂ ಅಲ್ಲ, ನಟ ಗಣೇಶ್‌. ಅವರೇಕೆ ಹೀಗಾಗಿಬಿಟ್ಟರು ಅನ್ನುವ ಪ್ರಶ್ನೆಗೆ ಉತ್ತರ ’99’. ಈ ಚಿತ್ರದ ಫ‌ಸ್ಟ್‌ ಲುಕ್‌ ಇದು. ಈ ಗೆಟಪ್‌ನಲ್ಲಿ ಗಣೇಶ್‌ ಇದೇ ಮೊದಲು ಈ ರೀತಿ ಕಾಣಿಸಿಕೊಳ್ಳುತ್ತಿದ್ದಾರೆ. ದಪ್ಪ ಬೆಳೆದಿರುವ ದಾಡಿ, ಗುಂಡು ಗುಂಡಾಗಿರುವ ದೇಹ ಇದೆಲ್ಲಾ ಹೇಗೆ ಸಾಧ್ಯ? ಅದು ’99’ ಆಗಿದ್ದಕ್ಕೆ ಸಾಧ್ಯವಾಗಿದೆ ಅನ್ನೋದು ಚಿತ್ರತಂಡದ ಮಾತು.

ಅಂದ ಹಾಗೆ, ’99’ ಚಿತ್ರ ಸದ್ದಿಲ್ಲದೆಯೇ ಚಿತ್ರೀಕರಣ ಪೂರ್ಣಗೊಂಡಿದೆ. ನಿರ್ದೇಶಕ ಪ್ರೀತಂಗುಬ್ಬಿ ಮತ್ತು ಗಣೇಶ್‌ ಕಾಂಬಿನೇಷನ್‌ನ ಮೂರನೇ ಸಿನಿಮಾ ಇದು. ಇನ್ನು, ರಾಮು ಅವರ ಜೊತೆ ಗಣೇಶ್‌ಗೆ ಇದು ಮೊದಲ ಚಿತ್ರ. ’99’ ತಮಿಳಿನ ಸೂಪರ್‌ ಹಿಟ್ ’96’ ಚಿತ್ರದ ಅವತರಣಿಕೆ. ಗಣೇಶ್‌ ಅವರಿಗೆ ಆ ಪಾತ್ರ ಸೂಕ್ತ ಅನ್ನುವ ಕಾರಣಕ್ಕೆ ಪ್ರೀತಮ್‌ ಗುಬ್ಬಿ, ಅವರೊಂದಿಗೆ ಬಹುಬೇಗನೆ ಸಿನಿಮಾವನ್ನು ಮಾಡಿ ಮುಗಿಸಿದ್ದಾರೆ.

ಇದೊಂದು ಅದ್ಭುತವಾದ ಪ್ರೇಮಕಾವ್ಯ. ಇಲ್ಲೊಂದು ಲವ್‌ಸ್ಟೋರಿ ಇದೆಯಾದರೂ, ಅದು ಬೇರೆಯದ್ದೇ ಮಜಾ ಕೊಡುವಂತಹ ಲವ್‌ಸ್ಟೋರಿ. ಈ ಚಿತ್ರದ ಪಾತ್ರಕ್ಕಾಗಿ ಗಣೇಶ್‌ ಏನೆಲ್ಲಾ ಕಸರತ್ತು ಮಾಡಿದ್ದಾರೆ ಗೊತ್ತಾ? ಆ ಬಗ್ಗೆ ಸ್ವತಃ ಗಣೇಶ್‌ ಅವರೇ ‘ಉದಯವಾಣಿ’ ಬಳಿ ಒಂದಷ್ಟು ಸ್ವಾರಸ್ಯಕರ ವಿಷಯಗಳನ್ನು ಬಿಚ್ಚಿಡುತ್ತಾರೆ.

ನಾನು ’99’ ಚಿತ್ರದ ಪಾತ್ರಕ್ಕೆ ಬರೋಬ್ಬರಿ ಐದು ಕೆಜಿ ತೂಕ ಹೆಚ್ಚಿಸಿಕೊಂಡಿದ್ದೇನೆ. ಅದೂ ಕೇವಲ ಒಂದುವರೆ ತಿಂಗಳಲ್ಲಿ ಅನ್ನೋದು ವಿಶೇಷ. ‘ಗೀತಾ’ ಚಿತ್ರೀಕರಣ ವೇಳೆಯಲ್ಲೇ ’99’ ಚಿತ್ರದ ಪಾತ್ರದ ಸಿದ್ಧತೆ ಮಾಡಿಕೊಳ್ಳುತ್ತಿದ್ದೆ. ಹೇಗೆಂದರೆ, ಬಿಡುವಿನ ವೇಳೆ, ಐಸ್‌ಕ್ರೀಂ, ಚಾಕೋಲೇಟ್, ಸ್ವೀಟ್ಸ್‌ ಸೇರಿದಂತೆ ಇತ್ಯಾದಿ ತಿನಿಸುಗಳನ್ನು ಸಿಕ್ಕಾಪಟ್ಟೆ ತಿನ್ನುತ್ತಿದ್ದೆ. ಹಾಗೆ ಮಾಡಿದ್ದಕ್ಕೆ ’99’ ಚಿತ್ರೀಕರಣ ಹೊರಡುವ ಸಮಯದಲ್ಲಿ ನಾನು ತೂಕ ಹೆಚ್ಚಾಗಿದ್ದು. ಆ ಪಾತ್ರದಲ್ಲಿ ಸಾಕಷ್ಟು ವಿಶೇಷತೆ ಇದೆ.

ಅದೊಂಥರಾ ಜಾಲಿ ಹುಡುಗನ ಪಾತ್ರ. ಸದಾ ಅರಾಮವಾಗಿರುವ ತನ್ನ ಬದುಕನ್ನು ಹೀಗೇ ಇಟ್ಟುಕೊಳ್ಳಬೇಕು ಅನ್ನುವಂಥದ್ದಲ್ಲ. ಸಾಕಷ್ಟು ಏರಿಳಿತಗಳ ನಡುವಿನ ಬದುಕು ಆ ಪಾತ್ರದ್ದು. ಮುಖದ ಮೇಲೆ ಗಡ್ಡ, ಗುಂಡಾಗಿರುವ ದೇಹ ಆ ಪಾತ್ರ ಬಯಸಿತ್ತು. ಹಾಗಾಗಿ, ಅದಕ್ಕೆ ತಯಾರಾದೆ’ ಎಂದು ತಾವು ಹೆಚ್ಚಿಸಿಕೊಂಡ ತೂಕದ ಹಿಂದಿನ ರಹಸ್ಯ ಬಿಚ್ಚಿಸುತ್ತಾರೆ ಗಣೇಶ್‌.

ಈಗ ಗಣೇಶ್‌ ‘ಗೀತಾ’ ಚಿತ್ರಕ್ಕಾಗಿ ಮತ್ತೆ ತೂಕ ಇಳಿಸುವ ತಯಾರಿಯಲ್ಲಿದ್ದಾರೆ. ಬೆಳಗ್ಗೆ ಎದ್ದವರೇ, ಓಡುತ್ತಿದ್ದಾರೆ. ಮತ್ತೆ ಸಣ್ಣಗಾಗಬೇಕೆಂಬ ನಿಟ್ಟಿನಲ್ಲಿ ಸಾಕಷ್ಟು ಕಸರತ್ತು ಮಾಡುತ್ತಿದ್ದಾರೆ. ‘ಗೀತಾ’ ಚಿತ್ರದ ಪಾತ್ರ ಕೂಡ ಹೊಸದಾಗಿದೆ. ಹಾಗಾಗಿ, ಅದಕ್ಕೆ ಈಗಾಗಲೇ ತೂಕ ಇಳಿಸಿಕೊಳ್ಳಲು ಮತ್ತೆ ಓಟ ಶುರುಮಾಡಿದ್ದಾರಂತೆ.

’99’ ಚಿತ್ರದಲ್ಲಿ ‘ಜಾಕಿ’ ಭಾವನಾ ಗಣೇಶ್‌ಗೆ ಜೋಡಿಯಾಗಿ ಕಾಣಿಸಿಕೊಂಡಿದ್ದಾರೆ. ಗಣೇಶ್‌ ಅಭಿನಯದ ‘ಗಿಮಿಕ್‌’ ಮೊನ್ನೆಯಷ್ಟೇ ಪೂರ್ಣಗೊಂಡಿದೆ. ಅದರ ಬೆನ್ನಲ್ಲೇ ’99’ ಕೂಡ ಮುಗಿದು ಹೋಗಿದೆ. ಈಗ ‘ಗೀತಾ’ ಚಿತ್ರೀಕರಣಕ್ಕೆ ಹೋಗುವ ಸಮಯ. ಫೆಬ್ರವರಿ 9 ರಿಂದ ಪುನಃ ‘ಗೀತಾ’ಳನ್ನು ಗಣೇಶ್‌ ಸೇರಿಕೊಳ್ಳಲಿದ್ದಾರೆ. ಈ ವರ್ಷ ಗಣೇಶ್‌ ಅಭಿಮಾನಿಗಳಿಗೆ ಹಬ್ಬ ಅನ್ನೋದು ಪಕ್ಕಾ. ಈ ಮೂರು ಚಿತ್ರಗಳು ಇದೇ ವರ್ಷ ತೆರೆ ಕಂಡರೂ ಅಚ್ಚರಿ ಇಲ್ಲ.