ಗಡ್ಡಪ್ಪನೇ ಸ್ಟಾರು ಸೆಂಚುರಿ ಗೌಡ ಸೂಪರು!

Team Udayavani, Jan 9, 2017, 11:23 AM IST

ಕನ್ನಡ ಚಿತ್ರರಂಗದ ಸದ್ಯದ ಬಿಝಿ ಕಲಾವಿದರ್ಯಾರು ಎಂಬ ಪ್ರಶ್ನೆಗೆ ಬರುವ ಮೂರು ಹೆಸರು ಎಂದರೆ ಸೆಂಚುರಿ ಗೌಡ, ಗಡ್ಡಪ್ಪ ಮತ್ತು ಅಭಿ ಎಂದರೆ ತಪ್ಪಿಲ್ಲ. ಮೂವರೂ ಒಂದರಹಿಂದೊಂದು ಸಿನಿಮಾಗಳನ್ನು ಮಾಡುತ್ತಲೇ ಇದ್ದಾರೆ. ಇತ್ತೀಚೆಗಷ್ಟೇ ಈ ಮೂವರು ನಟಿಸಿರುವ “ಏನ್‌ ನಿನ್‌ ಪ್ರಾಬ್ಲಿಮ್‌’ ಚಿತ್ರದ ಟ್ರೇಲರ್‌ ಬಿಡುಗಡೆಯಾಗಿದೆ.

ಆ ಚಿತ್ರ ಬಿಡುಗಡೆಯಾಗುವುದಕ್ಕಿಂತ ಮುನ್ನವೇ ಮೂವರು ಇನ್ನೊಂದು ಚಿತ್ರವನ್ನು ಸದ್ದಿಲ್ಲದೆ ಮಾಡಿ ಮುಗಿಸಿದ್ದಾರೆ. ಆ ಚಿತ್ರಕ್ಕೆ “ಗಡ್ಡಪ್ಪ ಸರ್ಕಲ್‌’ ಎಂದು ಹೆಸರಿಡಲಾಗಿದೆ. “ಗಡ್ಡಪ್ಪ ಸರ್ಕಲ್‌’ ಚಿತ್ರವನ್ನು ಬರೆದು ನಿರ್ದೇಶಿಸಿರುವುದು ಬಿ.ಆರ್‌. ಕೇಶವ್‌. ಸದ್ಯಕ್ಕೆ “ಮಾಸ್ಕ್’ ಮತ್ತು “ಭೂತದ ಮನೆ’ ಎಂಬ ಎರಡು ಚಿತ್ರಗಳನ್ನು ಮಾಡಿ, ಬಿಡುಗಡೆಗೆ ರೆಡಿ ಮಾಡುತ್ತಿರುವ ಕೇಶವ್‌, ಗ್ಯಾಪ್‌ನಲ್ಲಿ “ಗಡ್ಡಪ್ಪ ಸರ್ಕಲ್‌’ ಚಿತ್ರವನ್ನು ಮಾಡಿ ಮುಗಿಸಿದ್ದಾರೆ.

ಈ ಚಿತ್ರವನ್ನು ತುಳಸಿರಾಮ್‌ ಎನ್ನುವವರು ನಿರ್ಮಿಸಿದ್ದಾರೆ. ಚಿತ್ರದಲ್ಲಿ ಸೆಂಚ್ಯುರಿ ಗೌಡ, ಗಡ್ಡಪ್ಪ, ಅಭಿ, ಸುಕನ್ಯ, ತುಳಸೀರಾಮ್‌, ರಾಮಚರಣ್‌, ವಿಶ್ವಾಸ್‌, ಯೋಗಿ ಮುಂತಾದವರು ನಟಿಸಿದ್ದಾರೆ. ಇದು ಇಬ್ಬರು ಡಾನ್‌ಗಳ ಕುರಿತಾದ ಚಿತ್ರವಾದ. ಒಬ್ಬ ಡಾನ್‌ ಪಾತ್ರವನ್ನು ಸೆಂಚ್ಯುರಿ ಗೌಡ ಮಾಡಿದರೆ, ಇನ್ನೊಬ್ಬ ಡಾನ್‌ ಆಗಿ ಗಡ್ಡಪ್ಪ ನಟಿಸಿದ್ದಾರೆ. ಇಬ್ಬರಿಗೂ ಸೂಟ್‌ ಹಾಕಿಸಿ, ಚಿತ್ರೀಕರಣ ಮಾಡಲಾಗಿದೆ. 

ಎರಡು ಹಾಡುಗಳನ್ನು ಬಿಟ್ಟರೆ, ಈಗಾಗಲೇ ಈ ಚಿತ್ರದ ಚಿತ್ರೀಕರಣ ಮುಗಿದಿದೆ. ಆ ಎರಡು ಹಾಡುಗಳನ್ನು ಪಾಂಡವಪುರದ ಸುತ್ತ ಚಿತ್ರೀಕರಣ ಮಾಡಲಾಗುತ್ತದಂತೆ. ಇನ್ನು ಚಿತ್ರವನ್ನು ಮೈಸೂರು ಮತ್ತು ಬನ್ನೂರು ಸುತ್ತ ಚಿತ್ರೀಕರಣ ಮಾಡಲಾಗಿದೆ. ಚಿತ್ರಕ್ಕೆ ನಯನ್‌ ವಿಕೆ ಸಂಗೀತ ಸಂಯೋಜಿಸಿದರೆ, ಪ್ರಮೋದ್‌ ಎನ್ನುವವರು ಛಾಯಾಗ್ರಹಣ ಮಾಡಿದ್ದಾರೆ. ಸಾಹಿತ್ಯ ಮತ್ತು ಸಂಭಾಷಣೆಯನ್ನು ಶೇಷಗಿರಿ ಬರೆದಿದ್ದಾರೆ.