ಅದೃಷ್ಟದ ಬೆನ್ನೇರಿ ಚಮಕ್‌’; ಗಣೇಶ್, ರಶ್ಮಿಕಾ ಡಿಸೆಂಬರ್ ನಂಬಿಕೆ

Team Udayavani, Dec 28, 2017, 2:18 PM IST

ಡಿಸೆಂಬರ್‌ 29, 2006
ಗಣೇಶ್‌ ನಟನೆಯ “ಮುಂಗಾರು ಮಳೆ’
ಡಿಸೆಂಬರ್‌ 30, 2016
ರಶ್ಮಿಕಾ ನಟನೆಯ “ಕಿರಿಕ್‌ ಪಾರ್ಟಿ’
ಈಗ ಡಿಸೆಂಬರ್‌ 29,2017
ಗಣೇಶ್‌-ರಶ್ಮಿಕಾ ನಟನೆಯ “ಚಮಕ್‌ – ಇಬ್ಬರು ಸಹಜವಾಗಿಯೇ ಎಕ್ಸೈಟ್‌ ಆಗಿದ್ದಾರೆ. ಅದಕ್ಕೆ ಕಾರಣ “ಚಮಕ್‌’ ಮತ್ತು ಡಿಸೆಂಬರ್‌. ಹೌದು,
ಗಣೇಶ್‌-ರಶ್ಮಿಕಾ ಅಭಿನಯದ “ಚಮಕ್‌’ ಚಿತ್ರ ಈ ವಾರ (ಡಿ.29)ಕ್ಕೆ ತೆರೆಕಾಣುತ್ತಿದೆ. ಇಬ್ಬರಿಗೂ ಈ ಚಿತ್ರದ ಮೇಲೆ ತುಂಬಾ ನಿರೀಕ್ಷೆ ಇದೆ.

ಅದಕ್ಕೆ ಸಿನಿಮಾ ಚೆನ್ನಾಗಿ ಮೂಡಿಬಂದಿರೋದು ಒಂದು ಕಾರಣವಾದರೆ, ಡಿಸೆಂಬರ್‌ ಇಬ್ಬರ ಲೈಫ್ನಲ್ಲಿ ಲಕ್ಕಿ ಅನಿಸಿರೋದು ಮತ್ತೂಂದು ಕಾರಣ. 2006, ಡಿಸೆಂಬರ್‌ 29 ರಂದು ಗಣೇಶ್‌ ಅವರ “ಮುಂಗಾರು ಮಳೆ’ ಚಿತ್ರ ಬಿಡುಗಡೆಯಾಗಿ ದೊಡ್ಡ ಮಟ್ಟದಲ್ಲಿ ಯಶಸ್ಸು ಕಾಣುವ ಜೊತೆಗೆ ಅವರ ಲೈಫ್ ಅನ್ನೇ ಬದಲಿಸಿದ್ದು ನಿಮಗೆ ಗೊತ್ತೇ ಇದೆ. ಇನ್ನು, ರಶ್ಮಿಕಾ ಎಂಬ ನಟಿ ಬೆಳಕಿಗೆ ಬಂದಿದ್ದು “ಕಿರಿಕ್‌ ಪಾರ್ಟಿ’ ಚಿತ್ರದ ಮೂಲಕ. ಈ ಚಿತ್ರ ಬಿಡುಗಡೆಯಾಗಿದ್ದು ಕೂಡಾ ಕಳೆದ ವರ್ಷ ಡಿಸೆಂಬರ್‌ನಲ್ಲಿ. ಆ ಚಿತ್ರ ರಶ್ಮಿಕಾಗೆ ಒಳ್ಳೆಯ ಹೆಸರು ತಂದುಕೊಟ್ಟಿತು. ಈಗ ಮತ್ತೂಮ್ಮೆ ಡಿಸೆಂಬರ್‌ ನಿರೀಕ್ಷೆ. ಸುನಿ ನಿರ್ದೇಶನದ “ಚಮಕ್‌’ನಲ್ಲಿ ಈ ಇಬ್ಬರೂ ಒಟ್ಟಾಗಿದ್ದಾರೆ.

ಗಣೇಶ್‌ ಅವರಿಗೆ ಸಕಲೇಶಪುರ ಅದೃಷ್ಟದ ಜಾಗವಂತೆ. ಹಾಗಾಗಿ, “ಚಮಕ್‌’ ಚಿತ್ರದ ಕಥೆಯನ್ನು ಸಕಲೇಶಪುರದಲ್ಲೇ ಕೇಳಿದರಂತೆ. “ಡಿಸೆಂಬರ್‌ 29 ನನ್ನ ಬದುಕನ್ನು ಬದಲಾಯಿಸಿದ ದಿನ. ಈಗ ಅದೇ ದಿನದಂದು “ಚಮಕ್‌’ ಕೂಡಾ ಬಿಡುಗಡೆ ಯಾಗುತ್ತಿದೆ. ಈ ಚಿತ್ರದ ಮೇಲೂ
ಸಾಕಷ್ಟು ನಿರೀಕ್ಷೆ ಇದೆ. ನಿರ್ದೇಶಕ ಸುನಿ ಪ್ರತಿ ದೃಶ್ಯವನ್ನು ಸುಂದರವಾಗಿ ಹೆಣೆದಿದ್ದಾರೆ. ವೈದ್ಯನಾಗಿ ನಟಿಸಿದ್ದೇನೆ. ಸೋಶಿ ಯಲ್‌ ಮೀಡಿಯಾದಲ್ಲಿ ನೋಡಿದ ಹುಡುಗಿಯನ್ನು ನೋಡಲು ಬಂದಾಗ ಎದುರಾಗುವ ಫ‌ಜೀತಿಯನ್ನು ಸುನಿ ತುಂಬಾ ಮಜಾವಾಗಿ ಕಟ್ಟಿಕೊಟ್ಟಿದ್ದಾರೆ. ಚಿತ್ರದಲ್ಲಿ ಕಾಮಿಡಿ, ಸೆಂಟಿಮೆಂಟ್‌ ಎಲ್ಲವೂ ಇದೆ’ ಎಂಬುದು ಗಣೇಶ್‌ ಮಾತುಗಳು.

ನಟಿ ರಶ್ಮಿಕಾ ಮಂದಣ್ಣಗೆ ಈ ಹಿಂದಿನ ಸಿನಿಮಾಗಳಿಗಿಂತ ವಿಭಿನ್ನವಾದ ಪಾತ್ರ ಸಿಕ್ಕಿದೆಯಂತೆ. “ಕಿರಿಕ್‌ ಪಾರ್ಟಿ’ಯಲ್ಲಿ ಸೀರಿಯಸ್‌, “ಅಂಜನಿಪುತ್ರ’ದಲ್ಲಿ ಬಬ್ಲಿಯಾಗಿ ಕಾಣಿಸಿಕೊಂಡಿರುವ ರಶ್ಮಿಕಾ ಇಲ್ಲಿ ಸಂಪ್ರದಾಯಸ್ಥ ಹುಡುಗಿಯಾಗಿ ಕಾಣಿಸಿಕೊಂಡಿದ್ದಾರಂತೆ. ರಶ್ಮಿಕಾ ಹೇಳುವಂತೆ ಈ ಚಿತ್ರವನ್ನು ಮದುವೆ ಆಗದವರು, ಆಗುವವರು, ಆಗಿರುವವರು .

ನೋಡಲೇಬೇಕು. ಎಲ್ಲಾ ವರ್ಗಕ್ಕೂ ಇಷ್ಟವಾಗುವ ಡೀಸೆಂಟ್‌ ಸಿನಿಮಾವಂತೆ. ನಿರ್ದೇಶಕ ಸುನಿ ಗಣೇಶ್‌ ಹಾಗೂ ರಶ್ಮಿಕಾ ಪಾತ್ರವನ್ನು ನೀರು ಬೆರೆಸಿದ ಓಡ್ಕಾ ಹಾಗೂ ತೀರ್ಥಗೆ ಹೋಲಿಸುತ್ತಾರೆ.  ಈ ಚಿತ್ರವನ್ನು ಕ್ರಿಸ್ಟಲ್‌ ಪಾರ್ಕ್‌ ಮೂವೀಸ್‌ನಡಿ ಟಿ.ಆರ್‌.ಚಂದ್ರಶೇಖರ್‌ ನಿರ್ಮಿಸಿದ್ದಾರೆ. ಚಿತ್ರ ವೈಕುಂಠ ಏಕಾದಶಿಯಂದು ಬಿಡುಗಡೆಯಾಗುತ್ತಿರುವುದರಿಂದ ಸಿನಿಮಾ ರಂಗದಲ್ಲಿ ತಮ್ಮ ಅದೃಷ್ಟದ ಬಾಗಿಲು ತೆರೆಯುತ್ತದೆಂಬ ನಂಬಿಕೆ ಅವರಿಗಿದೆ. ನಿರ್ದೇಶಕ ಸುನಿ ಕಥೆ ಹೇಳಿದಾಗ ಅವರಿಗೆ ಸಿನಿಮಾ ನೋಡಿದಂತಾಯಿತಂತೆ. ಈಗ 200ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಸಿನಿಮಾ ಬಿಡುಗಡೆ ಮಾಡುತ್ತಿದ್ದು, ಮುಂದಿನ ವಾರ ಅಮೆರಿಕಾದಲ್ಲಿ ಚಿತ್ರ ಬಿಡುಗಡೆಯಾಗಲಿದೆ.