ಜ್ಯೊತಿ ನಿವಾಸ್‌ ಕಾಲೇಜಿನಲ್ಲಿ ಗಣೇಶ್‌ ನಗೆ

Team Udayavani, Jul 25, 2017, 10:30 AM IST

ಗಣೇಶ್‌ ಅಭಿನಯದ “ಮುಗುಳು ನಗೆ’ ಚಿತ್ರದ “ಹೊಡಿ ಒಂಭತ್ತ್’ ಹಾಡನ್ನು ತಮ್ಮ ತಂಡದೊಂದಿಗೆ ಹುಬ್ಬಳ್ಳಿವರೆಗೂ ಹೋಗಿ ಬಿಡುಗಡೆ ಮಾಡಿದ್ದರು ನಿರ್ದೇಶಕ ಯೋಗರಾಜ್‌ಭಟ್‌. ಅದಾದ ಬಳಿಕ ಮೈಸೂರಿಗೂ ಅಲ್ಲೊಂದು ಹಾಡನ್ನು ಬಿಡುಗಡೆ ಮಾಡಿದ್ದರು. ಮೊನ್ನೆ ಕೋರಮಂಗಲ ಸಮೀಪದ ಜ್ಯೋತಿ ನಿವಾಸ ಕಾಲೇಜ್‌ಗೂ ತೆರಳಿ ಅಲ್ಲಿ “ರೂಪಸಿ …’ ಎಂಬ ಹಾಡನ್ನು ಬಿಡುಗಡೆ ಮಾಡಿದೆ ಚಿತ್ರತಂಡ. ಉಳಿದ ಹಾಡುಗಳನ್ನೂ ಸಹ ದಾವಣಗೆರೆ ಸೇರಿದಂತೆ ಇತರೆ ಕಡೆ ಬಿಡುಗಡೆ ಮಾಡುವ ಯೋಜನೆ ಹಾಕಿಕೊಂಡಿದ್ದಾರೆ ಭಟ್ಟರು.

ಅಂದಹಾಗೆ, ಹುಡುಗಿಯರೇ ತುಂಬಿರುವ ಜ್ಯೋತಿ ನಿವಾಸ ಕಾಲೇಜ್‌ನ ಸಭಾಂಗಣದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಚಿತ್ರದ ಹಾಡು ಬಿಡುಗಡೆ ಮಾಡುವ ಮೂಲಕ “ಮುಗುಳು ನಗೆ’ ಚಿತ್ರದ “ಹೊಡಿ ಒಂಬತ್ತ್ …’ಹಾಡಿಗೆ ಕಾಲೇಜು ಹುಡುಗಿಯರ ಜತೆಗೂಡಿ ಹೆಜ್ಜೆ ಹಾಕಿದರು ಗಣೇಶ್‌. ಅದಷ್ಟೇ ಅಲ್ಲ, ಗಣೇಶ್‌ “ಮುಂಗಾರು ಮಳೆ’ ಚಿತ್ರದ ಡೈಲಾಗ್‌ ಹೇಳಿ ಹುಡುಗಿಯರ ಶಿಳ್ಳೆ ಚಪ್ಪಾಳೆ ಗಿಟ್ಟಿಸಿಕೊಂಡರು. ‘ಅನಿಸುತ್ತಿದೆ ಯಾಕೋ ಇಂದು …’ ಹಾಡು ಹಾಡಿ ರಂಜಿಸಿದರು. ಹುಡುಗಿಯರ ಒತ್ತಾಯದ ಮೇರೆಗೆ, ಸ್ಟೇಜ್‌ ಮೇಲೆ ಸ್ಟೆಪ್‌ ಹಾಕಿ ಅವರನ್ನು ಖುಷಿಪಡಿಸಿದರು.

ಅದಕ್ಕೂ ಮುನ್ನ, ಜ್ಯೋತಿ ನಿವಾಸ ಕಾಲೇಜಿನ ಹುಡುಗಿಯರು ನಡೆಸಿಕೊಟ್ಟ ಮನರಂಜನೆ ವೀಕ್ಷಿಸಿದ ಗಣೇಶ್‌, ಮಾತನಾಡುವಾಗ ಕಾಲೇಜು ಹುಡುಗಿಯರ ಪ್ರತಿಭೆಯನ್ನು ಕೊಂಡಾಡಿದರು. ಇದೇ ಮೊದಲ ಸಲ ನಾನು ಗರ್ಲ್ಸ್‌ ಕಾಲೇಜ್‌ಗೆ ಬಂದಿದ್ದಾಗಿ ಹೇಳಿಕೊಂಡ ಗಣೇಶ್‌, “ಹುಡುಗಿಯರ ಮುಂದೆ ಏನು ಮಾತಾಡಬೇಕೋ ಗೊತ್ತಿಲ್ಲ. “ಮುಗುಳು ನಗೆ’ ಸಿನಿಮಾ ನೋಡಿ ಅನ್ನಬೇಕೋ, ಚೆನ್ನಾಗಿ ಓದಿ ಅನ್ನಬೇಕೋ, ಅಥವಾ ಬಂಕ್‌ ಮಾಡಿ ಅನ್ನಬೇಕೋ ಗೊತ್ತಾಗ್ತಾ ಇಲ್ಲ.

ಬಂಕ್‌ ಮಾಡಿ ಅಂತ ಹೇಳದೇ ಇದ್ದರೂ, ಅದು ತಾನಾಗಿಯೇ ಆಗುತ್ತೆ ಬಿಡಿ…’ ಎಂಬ ಮಾತು ಹರಿಬಿಡುವ ಮೂಲಕ ಸಭಾಂಗಣದಲ್ಲಿ ತುಂಬಿದ್ದ ಹುಡುಗಿಯರ ಚಪ್ಪಾಳೆಗೆ ಸಾಕ್ಷಿಯಾದರು. ಖುಷಿ ಖುಷಿಯಲ್ಲೇ ಹುಡುಗಿಯರ ಜತೆ ಸ್ಟೆಪ್‌ ಹಾಕಿ, ಡೈಲಾಗ್‌ ಹೇಳಿ ರಂಜಿಸಿದ ಗಣೇಶ್‌, ಇದೊಂದು ಮರೆಯದ ಅನುಭವ ಅಂತ ಹೇಳಿ ಸುಮ್ಮನಾದರು ಅವರು. ಯೋಗರಾಜ್‌ಭಟ್‌, ಚಿತ್ರತಂಡದ ಪರಿಚಯ ಮಾಡಿಕೊಟ್ಟರು. “ಹೊಡಿ ಒಂಬತ್‌’ ಹಾಡಿನ ಗುಟ್ಟು ಹೇಳಿಕೊಡುತ್ತಲೇ ಅವರೊಂದಿಗೆ ಹೆಜ್ಜೆ ಹಾಕಿ ಸೆಲ್ಫಿàಗೂ ಫೋಸ್‌ ಕೊಟ್ಟರು.

ನಾಯಕಿ ಆಶಿಕಾ ಕೂಡ ಜ್ಯೋತಿ ನಿವಾಸ ಕಾಲೇಜಿನಲ್ಲೇ ಓದಿದವರು. ಮೂರ್‍ನಾಲ್ಕು ವರ್ಷಗಳ ಹಿಂದೆ ಕೆಲವು ಸಾಂಸ್ಕೃತಿಕ ಕಾರ್ಯಕ್ರಮಗಳಲ್ಲಿ ವೇದಿಕೆ ಮೇಲೆ ಹೆಜ್ಜೆ ಹಾಕುತ್ತಿದ್ದ ಆಶಿಕಾ, ಈಗ ನಾಯಕಿಯಾಗಿ, ಅದೇ ವೇದಿಕೆ ಮೇಲೆ ಕುಳಿತಿದ್ದನ್ನು ನೆನಪಿಸಿಕೊಂಡರು. ಒತ್ತಾಯದ ಮೇರೆಗೆ, ಹಾಡೊಂದಕ್ಕೆ ಕುಣಿದು, ರಂಜಿಸಿದರು. ಅಂದು ಸಂಗೀತ ನಿರ್ದೇಶಕ ಹರಿಕೃಷ್ಣ, ನಿರ್ಮಾಪಕ ಸಲಾಂ, ಸುಧಾ ಬರಗೂರು ಹಾಗೂ ಕಾಲೇಜಿನ ಸಿಬ್ಬಂದಿ ವರ್ಗ “ಮುಗುಳು ನಗೆ’ ಹಾಡು ಬಿಡುಗಡೆಗೆ ಸಾಕ್ಷಿಯಾದರು.

ನಾಳೆ ಟೈಟಲ್‌ ಸಾಂಗ್‌ ಬಿಡುಡೆ: ಈಗಾಗಲೇ ಚಿತ್ರದ ನಾಲ್ಕು ಹಾಡುಗಳು ಬಿಡಗುಡೆಯಾಗಿದ್ದು, ಐದನೆಯ ಹಾಡು ನಾಳೆ ಅಂದರೆ ಜುಲೈ 26ಕ್ಕೆ ಬಿಡುಗಡೆಯಾಗಲಿದೆ. ಸೋನು ನಿಗಮ್‌ ಹಾಡಿರುವ “ಮುಗುಳು ನಗೆಯೇ ನೀ ಹೇಳು …’ ಎಂಬ ಟೈಟಲ್‌ ಹಾಡು ಬಿಡುಗಡೆಯಾಗಲಿದ್ದು, ನಾಲ್ವರು ಬಿಳಿಯರು ಹಾಡು ಬಿಡುಗಡೆ ಮಾಡಲಿದ್ದಾರಂತೆ. ಯಾರು ನಾಲ್ವರು ಬಿಳಿಯರು ಎಂದರೆ, ಅನಂತ್‌ನಾಗ್‌, ಮನೋಮೂರ್ತಿ, ಗಣೇಶ್‌ ಮತ್ತು ಜಯಂತ್‌ ಕಾಯ್ಕಿಣಿ ಎಂದು ನಗುತ್ತಾರೆ ಅವರು. ಆ ನಂತರ ಸಂಜೆ ಪುನೀತ್‌ ರಾಜಕುಮಾರ್‌ ಅವರು ಫೇಸ್‌ಬುಕ್‌ ಲೈವ್‌ನಲ್ಲಿ ಹಾಡು ಬಿಡುಗಡೆ ಮಾಡಲಿದ್ದಾರಂತೆ.