ಶಿವ-ಹರಿ ಹೆಗಲಿನಲ್ಲಿ ವೃಷಭ ವಾಹನ

Team Udayavani, Nov 15, 2021, 11:39 AM IST

ದಿನಗಣನೆ ಆರಂಭವಾಗಿದೆ. ಹೊಸ ಬಗೆಯ ಸಿನಿಮಾಗಳನ್ನು ಇಷ್ಟಪಡುವ ಸಿನಿಮಾ ಪ್ರೇಮಿಗಳು ಕಾತರದಿಂದ ಕಾಯುತ್ತಿದ್ದಾರೆ. ಅದು “ಗರುಡ ಗಮನ ವೃಷಭ ವಾಹನ’ ಸಿನಿಮಾಕ್ಕೆ.

ನಿಮಗೆ ಗೊತ್ತಿರುವಂತೆ ಈ ಚಿತ್ರ ನ.19ರಂದು ಬಿಡುಗಡೆಯಾಗುತ್ತಿದೆ. ಈ ಚಿತ್ರದ ಮುಖ್ಯ ಹೈಲೈಟ್‌ಗಳಲ್ಲಿ ಶಿವ ಹಾಗೂ ಹರಿ ಎಂಬ ಎರಡು ಪಾತ್ರಗಳು ಸಿಗುತ್ತವೆ. ರಾಜ್‌ ಶೆಟ್ಟಿ ಇಲ್ಲಿ ಶಿವನ ಪಾತ್ರ ಮಾಡಿದರೆ, ಹರಿ ಪಾತ್ರದಲ್ಲಿ ರಿಷಭ್‌ ಶೆಟ್ಟಿ ಕಾಣಿಸಿಕೊಂಡಿದ್ದಾರೆ.

ಶಿವ ಮತ್ತು ಹರಿ ಎರಡೂ ದೇವರ ಹೆಸರು. ಅದರಂತೆ, ಚಿತ್ರದ ಪಾತ್ರಗಳಲ್ಲೂ ಆಯಾ ದೇವರ ಒಂದೊಂದು ಗುಣವನ್ನು ಎರಡು ಪಾತ್ರಗಳು ಪ್ರತಿನಿಧಿಸುತ್ತವೆ. ಶಿವ ಪಾತ್ರ ಕೋಪಿಷ್ಟನಾದರೆ, ಹರಿ ಪಾತ್ರ ಎಲ್ಲವನ್ನು ನಿಯಂತ್ರಿಸುವ ಜೊತೆ ಬದಲಾವಣೆ ತರುವಂತಹ ಹಾದಿಯಲ್ಲಿ ಸಾಗುತ್ತದೆ. ಒಂದೇ ಮಾತಲ್ಲಿ ಹೇಳುವುದಾದರೆ ಈ ಎರಡು ಪಾತ್ರಗಳು ಒಟ್ಟಾದರೆ ಹೇಗೆ ಒಂದು ದೊಡ್ಡ ಶಕ್ತಿಯಾಗಿ ಹೊರಹೊಮ್ಮಲಿದೆ ಎಂಬ ಅಂಶದೊಂದಿಗೆ ಸಿನಿಮಾ ಸಾಗುತ್ತದೆ. ಈ ಚಿತ್ರದಲ್ಲಿ ಗೋಪಾಲ ದೇಶಪಾಂಡೆಯವರ ಪಾತ್ರ ಕೂಡಾ ಪ್ರಮುಖವಾಗಿದೆಯಂತೆ.

ಚಿತ್ರದ ಬಗ್ಗೆ ಮಾತನಾಡುವ ನಿರ್ದೇಶಕ ರಾಜ್‌ ಬಿ ಶೆಟ್ಟಿ, “ಶಿವ ಹಾಗೂ ಹರಿ ಪಾತ್ರದ ಮೂಲಕ ಇಡೀ ಸಿನಿಮಾ ಸಾಗುತ್ತದೆ. ಆ ಪಾತ್ರಗಳ ಮಜವನ್ನು ತೆರೆಮೇಲೆ ನೋಡಬೇಕು’ ಎನ್ನುವ ರಾಜ್‌ ಶೆಟ್ಟಿ, “ಸಹಜವಾಗಿಯೇ ಎಕ್ಸೆ„ಟ್‌ ಆಗಿದ್ದೇನೆ. ಸಿನಿಮಾ ನಾವು ಅಂದುಕೊಂಡದ್ದಕ್ಕಿಂತ ದೊಡ್ಡದಾಗಿ ಮೂಡಿಬಂದಿದೆ. ಈ ಚಿತ್ರಕ್ಕೆ ರಕ್ಷಿತ್‌ ಶೆಟ್ಟಿ ಅವರ ಪರಂವಾ, ಕೆಆರ್‌ಜಿ ಸ್ಟುಡಿಯೋ … ಹೀಗೆ ಎಲ್ಲರೂ ಕೈ ಜೋಡಿಸಿ ನಮ್ಮ ಸಿನಿಮಾ ದೊಡ್ಡದಾಗಿದೆ’ ಎನ್ನುತ್ತಾರೆ.

ನ.17ಕ್ಕೆ ಪ್ರೀಮಿಯರ್‌ ಶೋ

“ಗರುಡ ಗಮನ ವೃಷಭ ವಾಹನ’ ಚಿತ್ರದ ಪ್ರೀಮಿಯರ್‌ ಶೋ ನ.17 ನಡೆಯಲಿದೆ. ಈಗಾಗಲೇ ಬುಕ್ಕಿಂಗ್‌ ಬಹುತೇಕ ಫ‌ುಲ್‌ ಆಗಿದ್ದು, ಈ ಮೂಲಕ ಚಿತ್ರದ ಬಗೆಗಿನ ಕುತೂಹಲ ಹೆಚ್ಚಾಗುತ್ತಿದೆ.