ಗೀತಾ ಫ‌ಸ್ಟ್‌ಲುಕ್‌; ಗಣೇಶ್‌ ಹುಟ್ಟುಹಬ್ಬಕ್ಕೆ ಬಿಡುಗಡೆ

Team Udayavani, Jun 30, 2018, 11:58 AM IST

ಗಣೇಶ್‌ ಅವರು “ಗೀತಾ’ ಎಂಬ ಸಿನಿಮಾ ಒಪ್ಪಿಕೊಂಡಿರುವ ವಿಚಾರ ನಿಮಗೆ ಗೊತ್ತೇ ಇದೆ. ಈ ಚಿತ್ರವನ್ನು ಸಂತೋಷ್‌ ಆನಂದ್‌ ರಾಮ್‌ ಅವರ ಬಳಿ ಸಹಾಯಕ ನಿರ್ದೇಶಕರಾಗಿದ್ದ ವಿಜಯ್‌ ನಾಗೇಂದ್ರ ನಿರ್ದೇಶಿಸುತ್ತಿದ್ದಾರೆ. ಇತ್ತೀಚೆಗೆ ಚಿತ್ರದ ಫೋಟೋಶೂಟ್‌ ಆಗಿದ್ದು, ಈಗ ಫ‌ಸ್ಟ್‌ಲುಕ್‌ ಬಿಡುಗಡೆಯಾಗಿದೆ. 

“ಗೀತಾ’ ಎಂಬ ಸಿನಿಮಾವನ್ನು ಶಂಕರ್‌ನಾಗ್‌ ನಿರ್ದೇಶಿಸಿ, ನಟಿಸಿರೋದು ನಿಮಗೆ ಗೊತ್ತೇ ಇದೆ. ಈಗ ಗಣೇಶ್‌ ಅದೇ ಟೈಟಲ್‌ನಡಿ ಸಿನಿಮಾ ಮಾಡುತ್ತಿದ್ದಾರೆ. ಹಾಗಾದರೆ, ಆ ಟೈಟಲ್‌ಗ‌ೂ ಗಣೇಶ್‌ ಅವರ ಈ ಸಿನಿಮಾಕ್ಕೂ ಏನಾದರೂ ಸಂಬಂಧವಿದೆಯಾ ಎಂದು ನೀವು ಕೇಳಬಹುದು. ಗಾಂಧಿನಗರದ ಮೂಲಗಳ ಪ್ರಕಾರ, ಚಿತ್ರದಲ್ಲಿ ಗಣೇಶ್‌ ಶಂಕರ್‌ನಾಗ್‌ ಅವರ ಅಭಿಮಾನಿಯಾಗಿ ಕಾಣಿಸಿಕೊಳ್ಳಲಿದ್ದಾರೆನ್ನಲಾಗಿದೆ. ಚಿತ್ರದ ಫ‌ಸ್ಟ್‌ಲುಕ್‌ನಲ್ಲಿ ಗಣೇಶ್‌ ಅವರು ಹಾಕಿಕೊಂಡಿರುವ ಕ್ಯಾಪ್‌, ಗಡ್ಡ ಎಲ್ಲವೂ ಶಂಕರ್‌ನಾಗ್‌ ಅವರನ್ನು ಹೋಲುವಂತಿದೆ. ಜೊತೆಗೆ ಶರ್ಟ್‌ ಮೇಲೆ ಕನ್ನಡದ ಬಾವುಟದ ಸಂಕೇತವಿದೆ. 

ವಿ.ಹರಿಕೃಷ್ಣ ಅವರು ಸಂಗೀತ, ಶ್ರೀಶ ಕುದುವಳ್ಳಿ ಛಾಯಾಗ್ರಹಣ ಚಿತ್ರಕ್ಕಿದೆ. ಚಿತ್ರದ ನಾಯಕಿ ಸೇರಿದಂತೆ ಉಳಿದ ಕಲಾವಿದ ಹಾಗೂ ತಂತ್ರಜ್ಞರ ಆಯ್ಕೆ ನಡೆಯುತ್ತಿದೆ. ಆರಂಭದಲ್ಲಿ ಈ ಚಿತ್ರವನ್ನು “ರಾಜ ಲವ್ಸ್‌ ರಾಧೆ’ ನಿರ್ಮಿಸಿದ್ದ ಎಚ್‌ಎಲ್‌ಎನ್‌ ರಾಜ್‌ ನಿರ್ಮಿಸುತ್ತಾರೆಂದು ಹೇಳಲಾಗಿತ್ತು. ಆದರೆ, ಈಗ ನಿರ್ಮಾಪಕರು ಬದಲಾಗಿದ್ದು, “ಮುಗುಳುನಗೆ’ ನಿರ್ಮಿಸಿದ ಸೈಯ್ಯದ್‌ ಸಲಾಂ ಹಾಗೂ ಶಿಲ್ಪಾ ಗಣೇಶ್‌ ಸೇರಿ ನಿರ್ಮಿಸುತ್ತಿದ್ದಾರೆ.