ಸನ್‌ ಆಫ್ ಬಂಗಾರದ ಮನುಷ್ಯ

Team Udayavani, Feb 22, 2017, 11:22 AM IST

“ಶ್ರೀಕಂಠ’ ಚಿತ್ರದ ನಂತರ ಬಿಡುಗಡೆಯಾಗಲಿರುವ ಶಿವರಾಜಕುಮಾರ್‌ರ ಮುಂದಿನ ಚಿತ್ರ ಯಾವುದು ಎಂಬ ಪ್ರಶ್ನೆಗೆ ಉತ್ತರ ಸಿಕ್ಕಿದೆ. ಹಾಗೆ ಮೊದಲು ಬಿಡುಗಡೆಯಾಗುತ್ತಿರುವ ಚಿತ್ರ “ಬಂಗಾರ ಸನ್‌ ಆಫ್ ಬಂಗಾರದ ಮನುಷ್ಯ’. ಈ ಚಿತ್ರವನ್ನು ಏಪ್ರಿಲ್‌ ತಿಂಗಳ ಮೂರನೆಯ ವಾರದಲ್ಲಿ ಬಿಡುಗಡೆ ಮಾಡುವುದಕ್ಕೆ ನಿರ್ದೇಶಕ ಯೋಗಿ ಯೋಚಿಸುತ್ತಿದ್ದಾರೆ. ಇದರ ಮೊದಲ ಹಂತವಾಗಿ ಚಿತ್ರದ ಮೊದಲ ಟೀಸರ್‌ ಸದ್ಯದಲ್ಲೇ ಬಿಡುಗಡೆಯಾಗಲಿದೆ.

ಸದ್ಯದಲ್ಲೇ ಎಂದರೆ, ಅದಕ್ಕೊಂದು ಡೇಟು ಇಲ್ಲವಾ ಎಂದು ಮುನಿಸಿಕೊಳ್ಳಬೇಡಿ. ಈಗಾಗಲೇ “ಬಂಗಾರ – ಸನ್‌ ಆಫ್ ಬಂಗಾರದ ಮನುಷ್ಯ’ ಚಿತ್ರದ ಟೀಸರ್‌ ಕಟ್‌ ಮಾಡಿ, ಸೆನ್ಸಾರ್‌ ಆಫೀಸಿನ ಬಾಗಿಲು ಬಡಿದಿದ್ದಾರೆ ಯೋಗಿ. ಇನ್ನೊಂದೆರೆಡು ದಿನಗಳಲ್ಲೇನಾದರೂ ಸೆನ್ಸಾರ್‌ನಿಂದ ಪ್ರಮಾಣಪತ್ರ ಬಂದರೆ, ಫೆಬ್ರವರಿ 23ರಂದು ಬಿಡುಗಡೆಯಾಗಲಿರುವ ಸುದೀಪ್‌ ಅಭಿನಯದ “ಹೆಬ್ಬುಲಿ’ಯ ಜೊತೆಗೆ ಟೀಸರ್‌ ಬಿಡುಗಡೆ ಮಾಡುವುದು ಯೋಗಿ ಯೋಚನೆ.

ಒಂದು ಪಕ್ಷ ಮಿಸ್‌ ಆಗಿ, ಒಂದು ದಿನ ನಿಧಾನವಾಯಿತು ಎಂದಿಟ್ಟುಕೊಳ್ಳಿ, ಆಗ ಅದರ ಮರುದಿನ ಅಂದರೆ ಶಿವರಾತ್ರಿಯಂದು ಸೋಷಿಯಲ್‌ ಮೀಡಿಯಾ ಮೂಲಕ ಬಿಡುಗಡೆ ಮಾಡುವ ಯೋಚೆನಯೂ ಇದೆ. ಅಲ್ಲಿಗೆ ಇದೇ ತಿಂಗಳ 23 ತಪ್ಪಿದರೆ 24ರಂದು “ಬಂಗಾರ – ಸನ್‌ ಆಫ್ ಬಂಗಾರದ ಮನುಷ್ಯ’ ಚಿತ್ರದ ಮೊದಲ ಟೀಸರ್‌ ಬಿಡುಗಡೆಯಾಗಲಿದೆ.

ಅಂದಹಾಗೆ, “ಬಂಗಾರ – ಸನ್‌ ಆಫ್ ಬಂಗಾರದ ಮನುಷ್ಯ’ ಚಿತ್ರದಲ್ಲಿ ಅನ್ನದಾತ ಸುಖೀಭವ ಎಂಬ ವಿಷಯವನ್ನು ಹೇಳುವುದಕ್ಕೆ ಹೊರಟಿದ್ದಾರಂತೆ ಯೋಗಿ. “ರೈತ ಸಾಕಷ್ಟು ಸಮಸ್ಯೆಗಳನ್ನು ಎದುರಿಸುತ್ತಿರುವುದು ಎಲ್ಲರಿಗೂ ಗೊತ್ತಿರುವ ವಿಷಯವೇ. ಅಂತಹ ರೈತ ಯಾಕೆ ಸುಖವಾಗಿರಬಾರದು ಎಂಬ ಕಲ್ಪನೆಯೊಂದಿಗೆ ಮಾಡುತ್ತಿರುವ ಚಿತ್ರ ಇದು. ಒಂದು ಕ್ರಾಂತಿಕಾರಕ ಯೋಚನೆ ಇರುವಂತಹ ಚಿತ್ರ’ ಇದು ಎನ್ನುವ ಯೋಗಿ, ಈ ಚಿತ್ರವನ್ನು ನಿರ್ದೇಶಿಸುವುದರ ಜೊತೆಗೆ ಕಥೆ ಮತ್ತು ಚಿತ್ರಕಥೆಯನ್ನು ಅವರೇ ಬರೆದಿದ್ದಾರೆ. ಚಿತ್ರಕ್ಕೆ ಎಂ.ಎಸ್‌. ರಮೇಶ್‌ ಅವರ ಸಂಭಾಷಣೆಯಿದೆ.

“ಬಂಗಾರ – ಸನ್‌ ಆಫ್ ಬಂಗಾರದ ಮನುಷ್ಯ’ ಚಿತ್ರದಲ್ಲಿ ಶಿವರಾಜಕುಮಾರ್‌ ಜೊತೆಗೆ ವಿದ್ಯಾ ಪ್ರದೀಪ್‌ ನಾಯಕಿಯಾಗಿ ನಟಿಸಿದ್ದು, ಜೊತೆಗೆ ಸಿಕ್ಕಣ್ಣ, ಸಾಧು ಕೋಕಿಲ, ಶ್ರೀನಿವಾಸಮೂರ್ತಿ, ಶಿವರಾಮಣ್ಣ, ಶ್ರೀನಾಥ್‌, ಸದಾಶಿವ ಬ್ರಹ್ಮಾವರ್‌, ಶರತ್‌ ಲೋಹಿತಾಶ್ವ, ಮೈಕೋ ನಾಗರಾಜ್‌ ಸೇರಿದಂತೆ ಹಲವರು ನಟಿಸಿದ್ದಾರೆ. ಚಿತ್ರವನ್ನು ಜಯಣ್ಣ ಮತ್ತು ಭೋಗೇಂದ್ರ ನಿರ್ಮಿಸುತ್ತಿದ್ದು, ವಿ. ಹರಿಕೃಷ್ಣ ಅವರ ಸಂಗೀತ, ಜೈಆನಂದ್‌ ಅವರ ಛಾಯಾಗ್ರಹಣವಿದೆ.