ಹಾಯ್‌ ಸುದೀಪ್‌..ರಾಕಿಂಗ್‌ ಸ್ಟಾರ್‌ ವಿರುದ್ಧ ಕಿಚ್ಚನ ಫ್ಯಾನ್ಸ್‌ ಗರಂ

Team Udayavani, Jun 5, 2018, 4:20 PM IST

ಬೆಂಗಳೂರು: ಹಾಯ್‌ ಸುದೀಪ್‌…ಹೀಗಂತ ರಾಕಿಂಗ್‌ ಸ್ಟಾರ್‌ ಯಶ್‌ ಅವರು ಕಿಚ್ಚನನ್ನು ಕರೆದದ್ದು ಸುದೀಪ್‌ ಅವರ ಅಭಿಮಾನಿಗಳು ಆಕ್ರೋಶಗೊಳ್ಳಲು ಕಾರಣವಾಗಿದೆ. 

ಹಮ್‌ ಫಿಟ್‌ ಹೇ ತೋ ಇಂಡಿಯಾ ಫಿಟ್‌ ಚಾಲೆಂಜ್‌ನಲ್ಲಿ ಕಿಚ್ಚ ಸುದೀಪ್‌ ಅವರು ಯಶ್‌ಗೆ ಫಿಟ್‌ನೆಸ್‌ ತೋರುವಂತೆ ಚಾಲೆಂಜ್‌ ಮಾಡಿದ್ದರು. ಚಾಲೆಂಜ್‌ ಸ್ವೀಕರಿಸಿದ ಯಶ್‌ ಅವರು ಹಾಯ್‌ ಸುದೀಪ್‌… ಎಂದು ಮಾತು ಮುಂದುವರಿಸಿ ನಾವು ಸಿನಿಮಾದವರು ನಿತ್ಯವೂ ವರ್ಕೌಟ್‌ ಮಾಡುತ್ತೇವೆ. ನನ್ನ ಬಾಲ್ಯ ಸ್ನೇಹಿತನೊಬ್ಬ ನಿದ್ದಾನೆ ಅವನು ಜೀವನದಲ್ಲೇ ಫಿಟ್‌ ಆಗಿರಲು ಸಾಧ್ಯವಿಲ್ಲ ಎಂದು ಚೇತನ್‌ ಅಲಿಯಾಸ್‌ ಚಕ್ಕಲಿ ಎನ್ನುವ ಗೆಳೆಯನಿಂದ ಕಸರತ್ತು ಮಾಡಿಸಿದ್ದರು. 

 ಹಿರಿಯರಾಗಿರುವ ಸುದೀಪ್‌ರನ್ನು ಜ್ಯೂನಿಯರ್‌ ಆಗಿರುವ ಯಶ್‌  ಹೆಸರು ಹೇಳಿ ಕರೆದಿರುವುದು ಸುದೀಪ್‌ ಅಭಿಮಾನಿಗಳು ಆಕ್ರೋಶಗೊಳ್ಳಲು ಕಾರಣವಾಗಿದೆ. ಹಲವರು ಯಶ್‌ ವಿರುದ್ಧ ಅವಾಚ್ಯ ಶಬ್ಧಗಳನ್ನು ಬಳಸಿಯೂ ಸಾಮಾಜಿಕ ತಾಣಗಳಲ್ಲಿ ಪ್ರತಿಕ್ರಿಯೆ ನೀಡಿದ್ದಾರೆ. ಸುದೀಪ್‌ರನ್ನು ಸರ್‌ ಇಲ್ಲಾ ಅಣ್ಣಾ ಎಂದು ಕರೆಯಬೇಕಿತ್ತು  ಎಂದಿದ್ದಾರೆ.

ಸುದೀಪ್‌ ಅವರು ಅಭಿಮಾನಿಗಳ ಆಕ್ರೋಶಕ್ಕೆ ಪ್ರತಿಕ್ರಿಯೆ ನೀಡಿದ್ದು, ನನ್ನ ಗೆಳೆಯರು ಮತ್ತು ಅಭಿಮಾನಿಗಳು ಯಶ್‌ ವಿರುದ್ಧ  ಕಠಿಣ ಶಬ್ಧಗಳಿಂದ ಟ್ವೀಟ್‌ ಮಾಡಬೇಡಿ. ಯಶ್‌ ನನ್ನ ಚಾಲೆಂಜನ್ನು ಪ್ರೀತಿಯಿಂದ ಸ್ವೀಕರಿಸಿ ವಿಡಿಯೋ ಟ್ವೀಟ್‌ ಮಾಡಿದ್ದಾರೆ , ನಾನು ಅದನ್ನು ಮಾತ್ರ ನೋಡುತ್ತೇನೆ. ಎಲ್ಲರೂ ನನ್ನ ಮನವಿಯನ್ನು ಗೌರವಿಸುತ್ತಿರಿ ಅಂದುಕೊಂಡಿದ್ದೇನೆ ಎಂದು ಟ್ವೀಟ್‌ ಮಾಡಿದ್ದಾರೆ.