ತೆರೆಮೇಲೆ ನಾಣಿ ಮದ್ವೆ ಪ್ರಸಂಗ! 

Team Udayavani, Mar 10, 2023, 3:05 PM IST

ಈ ಹಿಂದೆ “ನಿಂಬೆಹುಳಿ’, “ಹೌಸ್‌ ಫ‌ುಲ್’ ಸಿನಿಮಾಗಳನ್ನು ನಿರ್ದೇಶಿಸಿದ್ದ ಹೇಮಂತ್‌ ಹೆಗ್ಡೆ ಈ ಬಾರಿ ಮತ್ತೂಂದು ಔಟ್‌ ಅಂಡ್‌ ಔಟ್‌ ಕಾಮಿಡಿ ಕಥಾಹಂದರದ ಸಿನಿಮಾದ ಮೂಲಕ ಪ್ರೇಕ್ಷಕರ ಮುಂದೆ ಬರುವ ತಯಾರಿಯಲ್ಲಿದ್ದಾರೆ. ಅಂದಹಾಗೆ, ಆ ಸಿನಿಮಾದ ಹೆಸರು “ನಮ್‌ ನಾಣಿ ಮದ್ವೆ ಪ್ರಸಂಗ’.

ಸದ್ಯ “ನಮ್‌ ನಾಣಿ ಮದ್ವೆ ಪ್ರಸಂಗ’ ಸಿನಿಮಾದ ಪೋಸ್ಟ್‌ ಪ್ರೊಡಕ್ಷನ್‌ ಮುಗಿಸಿರುವ ಚಿತ್ರತಂಡ, ಇತ್ತೀಚೆಗೆ ಸಿನಿಮಾದ ಹಾಡೊಂದನ್ನು ಬಿಡುಗಡೆ ಮಾಡಿದೆ.

ಹೇಮಂತ್‌ ಹೆಗ್ಡೆ ಬರೆದಿರುವ, ಹವ್ಯಕ ಕನ್ನಡ ಶೈಲಿಯಲ್ಲಿ ಮೂಡಿಬಂದಿರುವ ಈ ಹಾಡಿಗೆ ರವಿ ಮುರೂರು ಸಂಗೀತ ಸಂಯೋಜಿಸಿದ್ದು, ಹಿರಿಯ ಸಂಗೀತ ನಿರ್ದೇಶಕ ವಿ. ಮನೋಹರ್‌ ಹಾಡನ್ನು ಬಿಡುಗಡೆಗೊಳಿಸಿ ಚಿತ್ರತಂಡಕ್ಕೆ ಶುಭ ಹಾರೈಸಿದರು.

ಇದೇ ವೇಳೆ ಮಾತನಾಡಿದ ನಾಯಕ ನಟ ಕಂ ನಿರ್ದೇಶಕ ಹೇಮಂತ್‌ ಹೆಗ್ಡೆ, “ಇದೊಂದು ಅಪ್ಪಟ ಮನರಂಜನೆಯ ಚಿತ್ರ. ಹಳ್ಳಿಯ ರೈತರಿಗೆ ಹೆಣ್ಣು ಸಿಗುತ್ತಿಲ್ಲ ಎಂಬ ಈಗಿನ ಸಮಸ್ಯೆಯೊಂದನ್ನು ಇಟ್ಟುಕೊಂಡು ಹಾಸ್ಯಭರಿತವಾಗಿ ಸಿನಿಮಾವನ್ನು ತೆರೆಗೆ ತರುತ್ತಿದ್ದೇವೆ. ಫ್ಯಾಮಿಲಿ ಕುಳಿತು ನೋಡುವ ಈ ಸಿನಿಮಾದ ಕಥಾಹಂದರ ಉತ್ತರ ಕನ್ನಡ ಜಿಲ್ಲೆಯ ಹಿನ್ನಲೆಯಲ್ಲಿ ಸಾಗುತ್ತದೆ. ಶಿರಸಿ ಸುತ್ತಮುತ್ತ ಚಿತ್ರದ ಬಹುಭಾಗ ಚಿತ್ರೀಕರಣ ನಡೆಸಲಾಗಿದ್ದು, ಅಲ್ಲಿನ ಭಾಷಾ ಶೈಲಿ ಸಂಭಾಷಣೆಯಲ್ಲಿದೆ. ಸದ್ಯ ಸಿನಿಮಾದ ಪ್ರಚಾರ ಕಾರ್ಯಗಳನ್ನು ಶುರು ಮಾಡಿದ್ದು, ಸಿನಿಮಾ ಏಪ್ರಿಲ್‌ 7ಕ್ಕೆ ಬಿಡುಗಡೆಯಾಗಲಿದೆ’ ಎಂದು ಮಾಹಿತಿ ನೀಡಿದರು.

“ಎಸ್‌ವಿಎಂ ಪ್ರೂಡಕ್ಷನ್ಸ್‌’ ಬ್ಯಾನರಿನಲ್ಲಿ ಸಂದೀಪ ನಾಗರಾಜ್‌ ನಿರ್ಮಿಸಿದ್ದಾರೆ.