“ಖಾಕಿ’ ಮೇಲೆ ಹೋಪ್‌

Team Udayavani, Jan 15, 2020, 7:04 AM IST

“ಬಸಣ್ಣಿ ಬಾ… ಬಸಣ್ಣಿ ಬಾ…’ ಈ ಹಾಡಿನ ಮೂಲಕ ಪಡ್ಡೆಗಳ ನಿದ್ದೆಗೆಡಿಸಿದ ನಟಿ ತಾನ್ಯಾ ಹೋಪ್‌. “ಯಜಮಾನ’ ಚಿತ್ರದಲ್ಲಿ ದರ್ಶನ್‌ ಜೊತೆ ಕುಣಿದು ಕುಪ್ಪಳಿಸಿದ್ದ ತಾನ್ಯಾಹೋಪ್‌, “ಖಾಕಿ’ ಚಿತ್ರದ ನಾಯಕಿ. ಈ ಚಿತ್ರ ಜನವರಿ 24 ರಂದು ರಾಜ್ಯಾದ್ಯಂತ ಬಿಡುಗಡೆಯಾಗುತ್ತಿದೆ. ಈ ಚಿತ್ರದ ಮೇಲೆ ತಾನ್ಯಾ ಹೋಪ್‌ ಅವರಿಗೆ ಸಾಕಷ್ಟು ನಿರೀಕ್ಷೆ ಇದೆ. ಅದಕ್ಕೆ ಕಾರಣ, ಚಿತ್ರದ ಕಥೆ ಹಾಗು ಪಾತ್ರ.

ಆ ಕುರಿತು ಹೇಳಿಕೊಳ್ಳುವ ತಾನ್ಯಾ ಹೋಪ್‌, “ನನಗೆ “ಖಾಕಿ’ ಮೇಲೆ ತುಂಬಾನೇ ನಿರೀಕ್ಷೆ ಇದೆ. ನಾನಷ್ಟೇ ಅಲ್ಲ, ಇಡೀ ಚಿತ್ರತಂಡ ಎಕ್ಸೈಟ್‌ ಆಗಿದ್ದೇವೆ. ಪ್ರೇಕ್ಷಕರು ನಮ್ಮ ಚಿತ್ರಕ್ಕೆ ಹೇಗೆ ಪ್ರತಿಕ್ರಿಯಿಸುತ್ತಾರೆ ಎಂಬ ಕಾತುರವೂ ಇದೆ. ಎಲ್ಲರೂ ಕಷ್ಟಪಟ್ಟು, ಇಷ್ಟಪಟ್ಟು ಮಾಡಿದ ಚಿತ್ರವಿದು. ನಿರ್ದೇಶಕ ನವೀನ್‌, ನಿರ್ಮಾಪಕ ತರುಣ್‌ ಶಿವಪ್ಪ ಅವರು ಒಳ್ಳೆಯ ಅವಕಾಶ ಕೊಟ್ಟಿದ್ದಾರೆ. ಅದನ್ನು ಸರಿಯಾಗಿ ಬಳಸಿಕೊಂಡ ಖುಷಿ ನನ್ನದು.

ಇನ್ನು, ಚಿರು ಜೊತೆ ಮೊದಲ ಚಿತ್ರವಿದು. ಅವರೊಂದಿಗೆ ಕೆಲಸ ಮಾಡಿದ್ದು ಮರೆಯದ ಅನುಭವ. ಸದಾ ಸೆಟ್‌ನಲ್ಲಿ ಎಲ್ಲರನ್ನೂ ನಗಿಸುತ್ತಲೇ, ಕೆಲಸ ಮಾಡುತ್ತಿದ್ದರು. ನನಗೂ ಸಹ ಈ ಚಿತ್ರದಲ್ಲಿ ಸಾಕಷ್ಟು ವಿಷಯಗಳನ್ನು ಕಲಿಯೋಕೆ ಸಾಧ್ಯವಾಗಿದೆ. ಇನ್ನು, ಇದೊಂದು ಸರ್ಕಾರ ಹಾಗು ಭ್ರಷ್ಟಾಚಾರ ಕುರಿತಾದ ಕಥೆ ಹೊಂದಿರುವ ಸಿನಿಮಾ. ಭ್ರಷ್ಟಾಚಾರದ ವಿರುದ್ಧ ಒಬ್ಬ ಕಾಮನ್‌ ಮ್ಯಾನ್‌ ಹೇಗೆ ಹೋರಾಡಿ, ನ್ಯಾಯ ಪಡೆಯುತ್ತಾನೆ,

ಭ್ರಷ್ಟರನ್ನು ಹೇಗೆ ಮಟ್ಟ ಹಾಕುತ್ತಾನೆ ಅನ್ನೋದು ಕಥೆ. ನಾನು ಈ ಚಿತ್ರದಲ್ಲಿ ಒಬ್ಬ ಸ್ಟ್ರಾಂಗ್‌ ಹುಡುಗಿಯಾಗಿ ನಟಿಸಿದ್ದೇನೆ. ನಾಯಕನಿಗೆ ಸಹಾಯ ಮಾಡುವಂತಹ ಪಾತ್ರವದು. ಅದು ಹೇಗೆ ಅನ್ನುವುದನ್ನು ಚಿತ್ರದಲ್ಲೇ ನೋಡಬೇಕು. ಇಲ್ಲಿ ಎಲ್ಲಾ ಅಂಶಗಳೂ ಇವೆ. ಪಕ್ಕಾ ಕಮರ್ಷಿಯಲ್‌ ಆಗಿರುವ ಚಿತ್ರದಲ್ಲಿ ಎಲ್ಲಾ ವರ್ಗದ ವರಿಗೆ ಇಷ್ಟವಾ ಗುವ ಅಂಶ ಗಳಿವೆ. “ಖಾಕಿ’ ಮನರಂಜನೆಗೆ ಮೋಸ ಮಾಡುವುದಿಲ್ಲ’ ಎನ್ನುತ್ತಾರೆ ತಾನ್ಯಾ ಹೋಪ್‌.