ಪತಿಯ ಕನಸು, ಪತ್ನಿಯ ಕಾಸು; ಇದು ‘ಹೊಟ್ಟೆಪಾಡು’ ಚಿತ್ರ

Team Udayavani, Feb 12, 2023, 4:12 PM IST

ಹೊಸಬರೇ ಸೇರಿ ಮಾಡಿರುವ “ಹೊಟ್ಟೆಪಾಡು’ ಚಿತ್ರದ ಹಾಡು ಹಾಗೂ ಟ್ರೇಲರ್‌ ಇತ್ತೀಚೆಗೆ ಬಿಡುಗಡೆಯಾಗಿದೆ. ಡಿ.ವಿ.ರಾಧಾ ಅವರು ನಿರ್ಮಿಸಿರುವ ಈ ಚಿತ್ರಕ್ಕೆ ವಸಂತ್‌ ಸಂಗೀತ ನಿರ್ದೇಶನ, ನಿರ್ದೇಶನ ಮಾಡುವ ಜೊತೆಗೆ ನಾಯಕನಾಗಿಯೂ ನಟಿಸಿದ್ದಾರೆ.

ಚಿತ್ರದ ಬಗ್ಗೆ ಮಾತನಾಡಿದ ವಸಂತ್‌, “ನಾನು ಇಪ್ಪತ್ತು ವರ್ಷಗಳಿಂದ ಚಿತ್ರರಂಗದಲ್ಲಿದ್ದೇನೆ. ಆಗಿನಿಂದಲೂ ನಾಯಕನಾಗುವ ಆಸೆ. ಆದರೆ ಆಗಿರಲಿಲ್ಲ. ಕೆಲವು ವರ್ಷ ಬೇರೆ ವ್ಯಾಪಾರ ಮಾಡುತ್ತಿದ್ದೆ. ಈಗ ಹೊಟ್ಟೆಪಾಡು ಚಿತ್ರ ನಿರ್ಮಾಣ ಮಾಡಿದ್ದೇವೆ. ನನ್ನ ಪತ್ನಿ ರಾಧಾ ಈ ಚಿತ್ರದ ನಿರ್ಮಾಪಕಿ. ನಾನೇ ಸಂಗೀತ ನಿರ್ದೇಶನ ಹಾಗೂ ನಿರ್ದೇಶನ ಮಾಡಿದ್ದೇನೆ. ಹೊಟ್ಟೆಪಾಡು ವಿಭಿನ್ನ ಕಥೆ ಹೊಂದಿರುವ ಸಾಹಸಮಯ ಹಾಗೂ ಸಾಂಸಾರಿಕ ಚಿತ್ರ. ಸದ್ಯದಲ್ಲೆ ಚಿತ್ರ ಬಿಡುಗಡೆಯಾಗುತ್ತಿದೆ’ ಎನ್ನುವುದು ವಸಂತ್‌ ಮಾತು.

ನಿರ್ಮಾಪಕಿ ಡಿ.ವಿ.ರಾಧಾ, ಸಾಹಸ ನಿರ್ದೇಶಕ ಕೌರವ ವೆಂಕಟೇಶ್‌, ನಾಯಕಿ ಜಾಹ್ನವಿ ವಿಶ್ವನಾಥ್‌ ಸೇರಿದಂತೆ ಚಿತ್ರದಲ್ಲಿ ನಟಿಸಿರುವ ಅನೇಕ ಕಲಾವಿದರು ಹಾಗೂ ತಂತ್ರಜ್ಞರು ಹೊಟ್ಟೆಪಾಡು ಚಿತ್ರದ ಕುರಿತು ಮಾತನಾಡಿದರು.ತನ್ಮಯ್‌ ಎಸ್‌ ಆನಂದಕುಮಾರ್‌ ಚಿತ್ರಕಥೆ, ಸಂಭಾಷಣೆ, ನೃತ್ಯವಿದ್ದು, ಈ ಚಿತ್ರಕ್ಕೆ ರವಿ ಬೆಳಗುಂದಿ ಛಾಯಾಗ್ರಹಣ ಹಾಗೂ ಅಮಿತ್‌ ಜವಳಪುರ ಸಂಕಲನವಿದೆ. ವಸಂತ್‌, ಜಾಹ್ನವಿ ವಿಶ್ವನಾಥ್‌, ವಿನಯ ಪ್ರಸಾದ್‌, ಶೋಭರಾಜ್‌, ಅಪೂರ್ವ, ಶೈಲೇಶ್‌ ಮುಂತಾದವರು ಈ ಚಿತ್ರದ ತಾರಾಬಳಗದಲ್ಲಿದ್ದಾರೆ.