“ರಿಷಭ್‌ ಪ್ರಿಯ’ ಹೇಗೆ ಕಾಣ್ತಾರೆ ಗೊತ್ತಾ?

Team Udayavani, Jul 4, 2017, 10:39 AM IST

ರಚಿತಾ ರಾಮ್‌ ಕಿರುಚಿತ್ರವೊಂದನ್ನು ನಿರ್ಮಿಸುವುದಕ್ಕೆ ಸಜ್ಜಾಗಿದ್ದಾರೆ, ಆ ಚಿತ್ರವನ್ನು ರೇಡಿಯೋ ಜಾಕಿ ಮಯೂರ್‌ ನಿರ್ದೇಶಿಸುತ್ತಿದ್ದಾರೆ ಎಂಬ ಸುದ್ದಿ ಎರಡೂ¾ರು ತಿಂಗಳಿನಿಂದ ಇತ್ತು. ಆದರೆ, ಚಿತ್ರ ಯಾವಾಗ ಶುರುವಾಗುತ್ತದೆ ಮತ್ತು ಯಾರೆಲ್ಲಾ ಇರುತ್ತಾರೆ ಎಂಬ ಕುತುಹಲಗಳು ಎಲ್ಲರಲ್ಲೂ ಇದ್ದೇ ಇತ್ತು.

ಈಗ ರಚಿತಾ ನಿರ್ಮಾಣದ ಮೊದಲ ಕಿರುಚಿತ್ರ “ರಿಷಭ ಪ್ರಿಯ’ದ ಚಿತ್ರೀಕರಣವಾಗಿರುವುದಷ್ಟೇ ಅಲ್ಲ, ಮೊದಲ ಲುಕ್‌ ಸಹ ಬಿಡುಗಡೆಯಾಗಿದೆ. ಈ ಕಿರುಚಿತ್ರದಲ್ಲಿ ನವೀನ್‌ ಮಹದೇವ್‌ ಮತ್ತು ರಾಗಿಣಿ ಚಂದ್ರನ್‌ ನಾಯಕ-ನಾಯಕಿಯಾಗಿ ನಟಿಸಿದ್ದಾರೆ. ನವೀನ್‌ ಇದಕ್ಕೂ ಮುನ್ನ ಜೀ ಕನ್ನಡದಲ್ಲಿ ಪ್ರಸಾರವಾದ “ಶ್ರೀರಸ್ತು ಶುಭಮಸ್ತು’ ಮುಂತಾದ ಧಾರಾವಾಹಿಗಳಲ್ಲಿ ನಟಿಸಿದ್ದರು.

ಇನ್ನು ರಾಗಿಣಿ ಚಂದ್ರನ್‌, ಪ್ರಜ್ವಲ್‌ ದೇವರಾಜ್‌ ಅವರ ಪತ್ನಿ. ಇಬ್ಬರೂ ಇದೇ ಮೊದಲ ಬಾರಿಗೆ ಒಟ್ಟಾಗಿ ನಟಿಸುತ್ತಿದ್ದಾರೆ. ಅವರಿಬ್ಬರ ಜೊತೆಗೆ ಸಿಹಿಕಹಿ ಚಂದ್ರು, ಸಿಹಿಕಹಿ ಗೀತಾ, ಸೋಮಶೇಖರ್‌ ಜೋಯಿಸ್‌, ಚಿನ್ಮಯಿ ಆತ್ರೇಯಸ್‌ ಮುಂತಾದವರು ನಟಿಸಿದ್ದಾರೆ.

ಇನ್ನು ಈ ಕಿರುಚಿತ್ರಕ್ಕೆ, “ಗೋಧಿ ಬಣ್ಣ ಸಾಧಾರಣ ಮೈಕಟ್ಟು’ ಖ್ಯಾತಿಯ ಚರಣ್‌ರಾಜ್‌ ಸಂಗೀತ ಸಂಯೋಜಿಸಿದ್ದಾರೆ. ಇನ್ನು ನಿರ್ದೇಶನದ ಜೊತೆಗೆ ಮಯೂರ್‌ ಕಥೆ ಹಾಗೂ ಸಂಭಾಷಣೆಯನ್ನು ರಚಿಸಿದ್ದಾರೆ. ಚಿತ್ರವೇನೋ ಸಿದ್ಧವಾಗುತ್ತಿದೆ. ಅದನ್ನು ತೋರಿಸುವ ವ್ಯವಸ್ಥೆ ಹೇಗೋ ಇನ್ನಷ್ಟೇ ಗೊತ್ತಾಗಬೇಕಿದೆ.