“ಹೌರಾ ಬ್ರಿಡ್ಜ್’ ಮೇಲೆ ನಿಂತಳು “ದೇವಕಿ’

Team Udayavani, Mar 17, 2019, 5:41 AM IST

ಸಾಮಾನ್ಯವಾಗಿ ಚಿತ್ರದ ಟೈಟಲ್‌ ಅನೌನ್ಸ್‌ ಆಗಿ ಚಿತ್ರೀಕರಣ ಶುರುವಾದ ನಂತರ ಚಿತ್ರದ ನಾಯಕಿ, ಚಿತ್ರಕಥೆ, ಕಲಾವಿದರು, ತಂತ್ರಜ್ಞರು ಬದಲಾವಣೆಯಾಗುವ ಸುದ್ದಿಯನ್ನು ನೀವು ಆಗಾಗ್ಗೆ ಚಿತ್ರರಂಗದಲ್ಲಿ ಕೇಳಿರುತ್ತೀರಿ. ಆದರೆ ಇಲ್ಲೊಂದು ಚಿತ್ರತಂಡ, ತನ್ನ ಟೈಟಲ್‌ ಅನೌನ್ಸ್‌ ಮಾಡಿ ಚಿತ್ರೀಕರಣವನ್ನೂ ಮುಗಿಸಿ, ಇನ್ನೇನು ಚಿತ್ರವನ್ನು ತೆರೆಗೆ ತರಬೇಕು ಅನ್ನುವಷ್ಟರಲ್ಲಿ ಚಿತ್ರದ ಟೈಟಲ್‌ ಅನ್ನೇ ಬದಲಾವಣೆ ಮಾಡಿದೆ. ಅಂದಹಾಗೆ ಆ ಚಿತ್ರದ ಹೆಸರು “ದೇವಕಿ’

ಸುಮಾರು ಒಂದೂವರೆ ವರ್ಷಗಳ ಹಿಂದೆ “ಹೌರಾ ಬ್ರಿಡ್ಜ್’ ಎನ್ನುವ ಹೆಸರಿನಲ್ಲಿ ಶೂಟಿಂಗ್‌ ಆರಂಭಿಸಿದ್ದ ಈ ಚಿತ್ರ ತೆರೆಗೂ ಬರೋದಕ್ಕೂ ಮುನ್ನ “ದೇವಕಿ’ ಎಂದು ಮರುನಾಮಕರಣಗೊಂಡಿದೆ. ಅಂದಹಾಗೆ, ಚಿತ್ರದ ಫ‌ಸ್ಟ್‌ ಕಾಪಿಯನ್ನು ನೋಡಿದ ನಂತರ ಚಿತ್ರತಂಡ “ಹೌರಾ ಬ್ರಿಡ್ಜ್’ ಎಂಬ ಟೈಟಲ್‌ಗಿಂತ “ದೇವಕಿ’ ಎಂಬ ಟೈಟಲ್‌ ಚಿತ್ರಕ್ಕೆ ಸೂಕ್ತವಾಗಿದೆ ಎನಿಸಿದ್ದರಿಂದ ಟೈಟಲ್‌ನಲ್ಲಿ ಇಂಥದ್ದೊಂದು ಮಹತ್ತರ ಬದಲಾವಣೆ ಮಾಡಿಕೊಂಡಿದೆಯಂತೆ.

ಇನ್ನೊಂದು ವಿಶೇಷವೆಂದರೆ, “ದೇವಕಿ’ ಚಿತ್ರದಲ್ಲಿ ನಟಿ ಪ್ರಿಯಾಂಕ ಉಪೇಂದ್ರ ಮುಖ್ಯ ಭೂಮಿಕೆಯಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ನಟ ಕಂ ನಿರ್ದೇಶಕ ರಿಯಲ್‌ ಸ್ಟಾರ್‌ ಉಪೇಂದ್ರ – ಪ್ರಿಯಾಂಕ ದಂಪತಿಯ ಪುತ್ರಿ ಐಶ್ವರ್ಯಾ ಈ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡುತ್ತಿದ್ದು, ತಾಯಿ-ಮಗಳು ಈ ಚಿತ್ರದಲ್ಲಿ ಒಟ್ಟಾಗಿ ತೆರೆ ಹಂಚಿಕೊಳ್ಳುತ್ತಿದ್ದಾರೆ. ಈ ಹಿಂದೆ “ಮಮ್ಮಿ ಸೇವ್‌ ಮೀ’ ಹಾರರ್‌ ಚಿತ್ರದಲ್ಲಿ ಪ್ರೇಕ್ಷಕರನ್ನು ಬೆಚ್ಚಿ ಬೀಳಿಸಿದ್ದ ಯುವ ನಿರ್ದೇಶಕ ಲೋಹಿತ್‌ ಈ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ.

ಚಿತ್ರಕ್ಕೆ ಹೆಚ್‌.ಸಿ ವೇಣು ಛಾಯಾಗ್ರಹಣ, ಸಿ. ರವಿಚಂದ್ರನ್‌ ಸಂಕಲನ, ನೋಬಿನ್‌ ಪಾಲ್‌ ಸಂಗೀತ ಸಂಯೋಜನೆಯಿದೆ. “ಚೈಲ್ಡ್ ಟ್ರಾಕಿಂಗ್‌’ ಮಾಫಿಯಾ ಸುತ್ತ ನಡೆಯುವ ಕಥೆ ಹೊಂದಿರುವ ಈ ಚಿತ್ರದಲ್ಲಿ ಪ್ರಿಯಾಂಕ ಉಪೇಂದ್ರ ದೇವಕಿ ಪಾತ್ರದಲ್ಲಿ, ನಟ ಕಿಶೋರ್‌ ಪೊಲೀಸ್‌ ಅಧಿಕಾರಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಇತ್ತೀಚೆಗೆ “ದೇವಕಿ’ ಚಿತ್ರದ ಚಿತ್ರದ ಮೊದಲ ಟೀಸರ್‌ ಅನ್ನು ನಟ ಉಪೇಂದ್ರ, ಮತ್ತು ಚಿತ್ರದ ಫ‌ಸ್ಟ್‌ಲುಕ್‌ ಅನ್ನು ನಟಿ ಪಾರುಲ್‌ ಯಾದವ್‌ ಬಿಡುಗಡೆ ಮಾಡಿದ್ದಾರೆ.

ಇದೇ ವೇಳೆ ಹಾಜರಿದ್ದ ಚಿತ್ರತಂಡ “ದೇವಕಿ’ ಚಿತ್ರದ ವಿಶೇಷತೆಗಳ ಬಗ್ಗೆ ಮಾತನಾಡಿತು. ಕೋಲ್ಕತ್ತಾ, ಬೆಂಗಳೂರು ಸುತ್ತಮುತ್ತ “ದೇವಕಿ’ ಚಿತ್ರದ ಚಿತ್ರೀಕರಣ ನಡೆಸಲಾಗಿದೆ. ಕನ್ನಡ ಮತ್ತು ತಮಿಳು ಭಾಷೆಗಳಲ್ಲಿ ಏಕಕಾಲಕ್ಕೆ ತಯಾರಾಗಿರುವ “ದೇವಕಿ’ ಚಿತ್ರವನ್ನು ಬೆಂಗಾಲಿ, ತೆಲುಗು ಭಾಷೆಗಳಿಗೂ ಡಬ್‌ ಮಾಡುವ ಯೋಚನೆಯಲ್ಲಿದೆ ಚಿತ್ರತಂಡ. “ಆರ್‌.ಸಿ.ಎಸ್‌ ಸಿನಿಮಾಸ್‌’ ಬ್ಯಾನರ್‌ನಲ್ಲಿ ರವೀಶ್‌ ಆರ್‌.ಸಿ ಮತ್ತು ಅಕ್ಷಯ್‌ ಸಿ.ಎಸ್‌ ಜಂಟಿಯಾಗಿ ಈ ಚಿತ್ರವನ್ನು ನಿರ್ಮಿಸಿದ್ದು, ಇದೇ ಏಪ್ರಿಲ್‌ನಲ್ಲಿ ಚಿತ್ರ ಬಿಡುಗಡೆಯಾಗಲಿದೆ.

ದೇವಕಿ ಮೆಚ್ಚಿದ ಪುರಿ ಜಗನ್ನಾಥ್‌: ಬಿಡುಗಡೆಯಾಗಿರುವ “ದೇವಕಿ’ ಚಿತ್ರದ ಟೀಸರ್‌ಗೆ ಸೋಷಿಯಲ್‌ ಮೀಡಿಯಾಗಳಲ್ಲಿ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಇದೇ ವೇಳೆ, “ದೇವಕಿ’ ಚಿತ್ರದ ಟೀಸರ್‌ ಅನ್ನು ತಮ್ಮ ಫೇಸ್‌ ಬುಕ್‌ ಖಾತೆಯಲ್ಲಿ ಹಂಚಿಕೊಂಡಿರುವ ಟಾಲಿವುಡ್‌ನ‌ ಖ್ಯಾತ ನಿರ್ದೇಶಕ ಪೂರಿ ಜಗನ್ನಾಥ್‌, ಚಿತ್ರದ ಟೀಸರ್‌ ತುಂಬ ಪ್ರಾಮಿಸಿಂಗ್‌ ಆಗಿದೆ ಎಂದು ಮೆಚ್ಚುಗೆಯ ಮಾತುಗಳನ್ನಾಡಿದ್ದಾರೆ.