ಹಂಬಲ್‌ ಪೊಲಿಟಿಶಿಯನ್‌ ಕೊಹ್ಲಿ ವಿಶ್‌

Team Udayavani, Sep 15, 2017, 6:13 PM IST

ದಾನಿಶ್‌ ಸೇಠ್ ನಾಯಕರಾಗಿರುವ “ಹಂಬಲ್‌ ಪೊಲಿಟಿಶಿಯನ್‌ ನೋಗರಾಜ್‌’ ಚಿತ್ರದ ಟ್ರೇಲರ್‌ ಇತ್ತೀಚೆಗೆ ಬಿಡುಗಡೆಯಾಗಿದೆ. ಟ್ರೇಲರ್‌ಗೆ ಎಲ್ಲರಿಂದಲೂ ಮೆಚ್ಚುಗೆ ವ್ಯಕ್ತವಾಗುತ್ತಿರುವ ಖುಷಿಯಲ್ಲಿದೆ ಚಿತ್ರತಂಡ. ಈ ಖುಷಿಯನ್ನು ದುಪ್ಪಟ್ಟು ಮಾಡುವಂತಹ ಮತ್ತೂಂದು ಸರ್‌ಪ್ರೈಸ್‌ “ಹಂಬಲ್‌’ ತಂಡಕ್ಕೆ ಸಿಕ್ಕಿದೆ. ಅದು ಖ್ಯಾತ ಕ್ರಿಕೆಟಿಗ ವಿರಾಟ್‌ ಕೊಹ್ಲಿಯವರಿಂದ. ಹೌದು, ಹಂಬಲ್‌ ಪೊಲಿಟಿಶಿಯನ್‌ ಟ್ರೇಲರ್‌ ನೋಡಿದ ವಿರಾಟ್‌ ಕೊಹ್ಲಿ ನಾಯಕ ದಾನಿಶ್‌ ಹಾಗೂ ಚಿತ್ರತಂಡಕ್ಕೆ ಶುಭ ಕೋರಿದ್ದಾರೆ.

“ನಮಸ್ಕಾರ, ಗೆಳೆಯ ದಾನಿಶ್‌ ಸೇಠ್ ನಟಿಸಿರುವ “ಹಂಬಲ್‌ ಪೊಲಿಟಿಶಿಯನ್‌ ಟ್ರೇಲರ್‌ಗೆ ಎಲ್ಲೆಡೆಯಿಂದ ಒಳ್ಳೆಯ ಪ್ರತಿಕ್ರಿಯೆ ಬರುತ್ತಿರುವ ವಿಷಯ ಕೇಳಿ ಖುಷಿಯಾಯಿತು. ಸಿನಿಮಾಕ್ಕೂ ಇದೇ ರೀತಿಯ ಪ್ರತಿಕ್ರಿಯೆ ಸಿಗುತ್ತದೆ ಎಂಬ ವಿಶ್ವಾಸವಿದೆ’ ಎಂದು ಶುಭಕೋರಿದ್ದಾರೆ. ಇದು ಚಿತ್ರತಂಡಕ್ಕೆ ಖುಷಿ ಕೊಟ್ಟಿದೆ. 

ದಾನಿಶ್‌ ಸೇಠ್ ಹಾಗೂ ವಿರಾಟ್‌ ಕೊಹ್ಲಿ ಹೇಗೆ ಫ್ರೆಂಡ್ಸ್‌ ಎಂದು ನೀವು ಕೇಳಬಹುದು. “ಆರ್‌ಸಿಬಿ’ಯಲ್ಲಿ ನೀವು “ಮಿಸ್ಟರ್‌ ನೋಗ್‌’ ಎಂಬ ಒಂದು ಪಾತ್ರವನ್ನು ನೋಡಬಹುದು. ಏನೇನೋ ಪ್ರಶ್ನೆಗಳ ಮೂಲಕ ವಿರಾಟ್‌ ಕೊಹ್ಲಿಯವರು° ನಗಿಸಿದ್ದನ್ನು ನೀವು ನೋಡಿರಬಹುದು. ಹಾಗೆ ನಾಗ್‌ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದು ದಾನಿಶ್‌. ದಾನಿಶ್‌ಗೆ ಅದು ಒಳ್ಳೆಯ ವೇದಿಕೆ ಕಲ್ಪಿಸಿಕೊಟ್ಟಿದ್ದು ಸುಳ್ಳಲ್ಲ. ಆ ಮೂಲಕ ವಿರಾಟ್‌ ಕೊಹ್ಲಿಯವರ ಸ್ನೇಹ ಸಂಪಾದಿಸುತ್ತಾರೆ ದಾನಿಶ್‌.

ಅದೇ ಸ್ನೇಹದಿಂದ ವಿರಾಟ್‌ ಕೊಹ್ಲಿ, ದಾನಿಶ್‌ ಅವರ ಚಿತ್ರಕ್ಕೆ ಶುಭ ಕೋರಿದ್ದಾರೆ. “ಹಂಬಲ್‌ ಪೊಲಿಟಿಶಿಯನ್‌ ನೋಗ್‌ರಾಜ್‌’ ಚಿತ್ರವನ್ನು ಪುಷ್ಕರ್‌, ರಕ್ಷಿತ್‌ ಶೆಟ್ಟಿ ಹಾಗೂ ಹೇಮಂತ್‌ ರಾವ್‌ ಸೇರಿ ನಿರ್ಮಿಸಿದ್ದು, ಸಾದ್‌ ಖಾನ್‌ ನಿರ್ದೇಶಿಸಿದ್ದಾರೆ. ಇದೊಂದು ರಾಜಕೀಯ ವಿಡಂಬನಾತ್ಮಕ ಚಿತ್ರವಾಗಿದೆ.