ಮಾತಾಡುವ ಹಕ್ಕು ಸಂವಿಧಾನ ನೀಡಿದೆ ಅಂತ ತಿಂದಿದ್ದು ಕಕ್ಕಿದರೆ?

Team Udayavani, Oct 3, 2017, 3:26 PM IST

ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರ ಕುರಿತು ನಟ ಪ್ರಕಾಶ್‌ ರೈ ನೀಡಿರುವ ಹೇಳಿಕೆಗಳಿಗೆ ವ್ಯಾಪಕವಾದ ಟೀಕೆ ವ್ಯಕ್ತವಾಗಿದೆ. ಈಗಾಗಲೇ ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಕಾಶ್‌ ರೈ ಅವರ ಪರ-ವಿರೋಧದ ಕುರಿತು ಸಾಕಷ್ಟು ಚರ್ಚೆಯಾಗುತ್ತಿದೆ.

ಪ್ರಕಾಶ್‌ ರೈ ಹೇಳಿದ್ದು ಸರಿ ಎಂದು ಕೆಲವರು ಹೇಳಿದರೆ, ಇನ್ನೂ ಕೆಲವರು ಅಂತಹ ಹೇಳಿಕೆಗಳು ಸರಿಯಲ್ಲ ಎಂದಿದ್ದಾರೆ. ಈಗ ನಟ-ಮಾಜಿ ಶಾಸಕ ಜಗ್ಗೇಶ್‌ ಸಹ ಪ್ರಕಾಶ್‌ ರೈ ಹೇಳಿಕೆಯನ್ನು ಖಂಡಿಸಿದ್ದಾರೆ. ಯಾರ ಹೆಸರನ್ನೂ ಪ್ರಸ್ಥಾಪಿಸದೆ ಬಹಳ ಸೂಕ್ಷವಾಗಿ ಟ್ವಿಟರ್‌ನಲ್ಲಿ ತಮ್ಮ ಅನಿಸಿಕೆಗಳನ್ನು ಹರಿಬಿಟ್ಟಿದ್ದಾರೆ. 

ಜಗ್ಗೇಶ್‌ ಅವರ ಮಾತುಗಳು ಹೀಗಿವೆ. “ಮೋದಿ ಸಾಧನೆಗೂ, ಇವರ ಸಾಧನೆಗೂ ಎತ್ತಣ ಸಂಬಂಧ? ಮಾತಾಡುವ ಹಕ್ಕು ಸಂವಿಧಾನ ನೀಡಿದೆ ಅಂತ ತಿಂದಿದ್ದು ಕಕ್ಕಿದರೆ ತಿನ್ನಿಸದವಗೂ ಅವಮಾನ, ತಿಂದು ಕಕ್ಕಿದವರಿಗೂ ಅಪಮಾನ. ಮಾತು ಹಿತವಿರಲಿ’ ಎಂದು ಅವರು ಬರೆದಿದ್ದಾರೆ.

ಇನ್ನೊಂದು ಟ್ವೀಟ್‌ನಲ್ಲಿ, “ನಟನೆಗೂ ರಾಜಕೀಯಕ್ಕೂ ಅಜಗಜಾಂತರ. ರಾಜಕೀಯ ಚಪ್ಪಾಳೆಗೂ ಸಿನಿಮಾ ಚಪ್ಪಾಳೆಗೂ ವ್ಯತ್ಯಾಸವಿದೆ. ಇದರ ಅರಿವಿಗೆ ಅಖಾಡಕ್ಕೆ ಇಳಿದು ತಿಳಿದು ಮಾತಾಡಬೇಕು. ಇಲ್ಲದಿದ್ದರೆ ಮೈಕಿನ ತೆವಲು’ ಎಂದು ಜಗ್ಗೇಶ್‌ ಸೂಕ್ಷ್ಮವಾಗಿ ಬರೆದಿದ್ದಾರೆ.