ಅಭಿಮಾನಿಗಳ ಪ್ರಶ್ನೆಗೆ ಜಗ್ಗೇಶ್‌ ಉತ್ತರ

Team Udayavani, Apr 16, 2020, 10:29 AM IST

ನಟ ಜಗ್ಗೇಶ್‌ ಸೋಶಿಯಲ್‌ ಮೀಡಿಯಾದಲ್ಲಿ ಸದಾ ಆಕ್ಟೀವ್‌ ಆಗಿರುತ್ತಾರೆ. ತಮಗೆ ಅನಿಸಿದ್ದನ್ನು ಹೇಳುತ್ತಾ ಅಭಿಮಾನಿಗಳ ಪ್ರಶ್ನೆಗೆ ಉತ್ತರಿಸುತ್ತಿರುತ್ತಿರುತ್ತಾರೆ. ಈ ಲಾಕ್‌ ಡೌನ್‌ ಸಮಯದಲ್ಲೂ ಜಗ್ಗೇಶ್‌ ನಿರಂತರವಾಗಿ ಅಭಿಮಾನಿಗಳ ಜೊತೆ ಬೆರೆಯುವ ಮೂಲಕ ಕುತೂಹಲದ ಪ್ರಶ್ನೆಗಳಿಗೆ ಉತ್ತರವಾಗುತ್ತಿದ್ದಾರೆ. ತಮ್ಮ ಹಳೆಯ ದಿನಗಳ ಫೋಟೋ ಹಾಕಿ, ಆ ಬಗ್ಗೆ ಒಂದಷ್ಟು ವಿವರಣೆ ನೀಡುವ ಜೊತೆಗೆ ಅಭಿಮಾನಿಗಳು ತಮಗೆ ಟ್ಯಾಗ್‌ ಮಾಡಿದ ಫೋಟೋಗಳಿಗೂ ವಿವರಣೆ ಕೊಡುತ್ತಾ ಅಭಿಮಾನಿಗಳ ಕುತೂಹಲ ತಣಿಸುತ್ತಿದ್ದಾರೆ. ತಮ್ಮ ದಿನಚರಿ, ಆಹಾರ ಪದ್ಧತಿಯ ಜೊತೆಗೆ ಹಲವು ಘಟನೆಗಳನ್ನು ಮೆಲುಕು ಹಾಕುತ್ತಿರುತ್ತಾರೆ. ಜೊತೆಗೆ ತಮಗೆ ಅನಿಸಿದ ಬುದ್ಧಿಮಾತು ಕೂಡಾ ಹೇಳುತ್ತಾರೆ. ಇತ್ತೀಚೆಗೆ ಜಗ್ಗೇಶ್‌, ಡಾ. ರಾಜ್‌ ಕುಮಾರ್‌ ಕುರಿತಾದ ಹಲವು ವಿಚಾರಗಳನ್ನು ಕೂಡಾ ಹಂಚಿಕೊಂಡಿದ್ದರು. ನನ್ನ ಬದುಕಲ್ಲಿ ರಾಜಣ್ಣನ ಬಳಿ ಕೇಳಿದಷ್ಟು ಪ್ರಶ್ನೆ ಯಾರ ಬಳಿಯು ಕೇಳಿರಲಿಲ್ಲಾ! ಪಾಪ ಸ್ವಲ್ಪವೂ ಬೇಜಾರಾಗದೆ ನನ್ನ ಎಲ್ಲಾ ಪ್ರಶ್ನೆಗೆ ಉತ್ತರಿಸುತ್ತಿದ್ದರು!

ಅದರಲ್ಲಿ ನಾನು ಮರೆಯದ್ದು, ಜಗ್ಗೇಶು ಯೋಗ ಒಂದು ಬಾರಿ ಬರುತ್ತದೆ ಯೋಗ್ಯತೆ ಕೊನೆಯವರಿಗು ಉಳಿಯುತ್ತದೆ!ಇದನ್ನ ರಾಜಕುಮಾರದಲ್ಲಿ ಆನಂದ ಬಳಸಿದ! ಎಂದು ರಾಜ್‌ ಜೊತೆಗಿನ ನೆನಪನ್ನು ಬಿಚ್ಚಿಟ್ಟದ್ದರು. ಸದ್ಯ ಜಗ್ಗೇಶ್‌ ಅವರ ತೋತಾಪುರಿ ಚಿತ್ರ ಬಿಡುಗಡೆಗೆ ಸಿದ್ಧವಾಗಿದ್ದು, ಎರಡು ಭಾಗಗಳಲ್ಲಿ ಬಿಡುಗಡೆಯಾಗಲಿದೆ. ಈ ಚಿತ್ರವನ್ನು ವಿಜಯ ಪ್ರಸಾದ್‌ ನಿರ್ದೇಶಿಸಿದ್ದು, ಸುರೇಶ್‌ ನಿರ್ಮಾಣವಿದೆ.