ಜಗ್ಗೇಶ್‌ ಈಗ “ರಂಗನಾಯಕ’

Team Udayavani, Oct 1, 2019, 3:03 AM IST

ಈ ಹಿಂದೊಮ್ಮೆ ಜಗ್ಗೇಶ್‌ ಹಾಗೂ ಗುರುಪ್ರಸಾದ್‌ ಜೊತೆಯಾಗಿ ಸಿನಿಮಾ ಮಾಡುತ್ತಾರೆಂಬ ಸುದ್ದಿ ಹರಿದಾಡಿತ್ತಾದರೂ ನಂತರದ ದಿನಗಳಲ್ಲಿ ಆ ಸುದ್ದಿ ಕಳೆದೇ ಹೋಯಿತು. ಈಗ ಇಬ್ಬರೂ ಅಧಿಕೃತವಾಗಿ ಒಪ್ಪಿಕೊಂಡಿದ್ದಾರೆ. ವಿಖ್ಯಾತ್‌ ಈ ಸಿನಿಮಾವನ್ನು ನಿರ್ಮಿಸುತ್ತಿದ್ದಾರೆ. ಈಗಾಗಲೇ “ಪುಷ್ಪಕ ವಿಮಾನ’ ನಿರ್ಮಿಸಿ, ಸದ್ಯ “ಇನ್ಸ್‌ಪೆಕ್ಟರ್‌ ವಿಕ್ರಂ’ ಬಿಡುಗಡೆಗೆ ಕಾಯುತ್ತಿರುವ ವಿಖ್ಯಾತ್‌, ತಮ್ಮ ವಿಖ್ಯಾತ್‌ ಚಿತ್ರ ಬ್ಯಾನರ್‌ನಲ್ಲಿ ಈಗ ಜಗ್ಗೇಶ್‌ ಹಾಗೂ ಗುರುಪ್ರಸಾದ್‌ ಸಿನಿಮಾ ನಿರ್ಮಿಸುತ್ತಿದ್ದಾರೆ.

ಚಿತ್ರಕ್ಕೆ ಈಗ ಶೀರ್ಷಿಕೆ ಕೂಡಾ ಅಂತಿಮವಾಗಿದೆ. ಚಿತ್ರಕ್ಕೆ “ರಂಗನಾಯಕ’ ಎಂಬ ಟೈಟಲ್‌ ಇಡಲಾಗಿದೆ. “ರಂಗನಾಯಕ’ ಟೈಟಲ್‌ನಡಿ ಗುರುಪ್ರಸಾದ್‌ ಯಾವ ರೀತಿಯ ಕಥೆ ಹೇಳಲು ಹೊರಟಿದ್ದಾರೆಂಬುದನ್ನು ಕಾದು ನೋಡಬೇಕು. ನಿಮಗೆ ಗೊತ್ತಿರುವಂತೆ ಜಗ್ಗೇಶ್‌ ಹಾಗೂ ಗುರುಪ್ರಸಾದ್‌ ಜೋಡಿಯ “ಮಠ’ ಹಾಗೂ “ಎದ್ದೇಳು ಮಂಜುನಾಥ’ ಕನ್ನಡ ಚಿತ್ರರಂಗದ ಎವರ್‌ಗ್ರೀನ್‌ ಸಿನಿಮಾ. ಜಗ್ಗೇಶ್‌ ಕೆರಿಯರ್‌ ಬಗ್ಗೆ ಮಾತನಾಡುವಾಗ ಆ ಎರಡು ಸಿನಿಮಾಗಳನ್ನು ಬಿಟ್ಟು ಮಾತನಾಡಲು ಸಾಧ್ಯವೇ ಇಲ್ಲ.

ಸಮಾಜದ ಅಂಕುಡೊಂಕುಗಳನ್ನು, ಕಂದಾಚಾರಗಳನ್ನು ವಿಡಂಬನಾತ್ಮಕವಾಗಿ ಹೇಳಿದ ಸಿನಿಮಾವದು. ಪ್ರೇಕ್ಷಕ ಕೂಡಾ ಆ ಸಿನಿಮಾಗಳನ್ನು ಮುಕ್ತ ಮನಸ್ಸಿನಿಂದ ಸ್ವೀಕರಿಸಿದ ಪರಿಣಾಮ ಚಿತ್ರ ದೊಡ್ಡ ಮಟ್ಟದಲ್ಲಿ ಹಿಟ್‌ ಆಗಿತ್ತು. ಆ ನಂತರ ಈ ಜೋಡಿ ಜೊತೆಯಾಗಿ ಸಿನಿಮಾ ಮಾಡಲೇ ಇಲ್ಲ. ಈಗ “ರಂಗನಾಯಕ’ ಮೂಲಕ ಒಂದಾಗಿದ್ದಾರೆ. ಚಿತ್ರಕ್ಕೆ ಅನೂಪ್‌ ಸೀಳೀನ್‌ ಸಂಗೀತವಿದೆ. ವಿಜಯದಶಮಿಗೆ ಚಿತ್ರದ ಟೀಸರ್‌ ಬಿಡುಗಡೆಯಾಗಲಿದೆ.