ಪರಬ್ರಹ್ಮನ ಹಿಂದೆ ಜಮಾನ ಹೀರೋ

Team Udayavani, Sep 17, 2018, 11:04 AM IST

ಕೆಲವು ವರ್ಷಗಳ ಹಿಂದೆ “ಜಮಾನ’ ಎಂಬ ಸಿನಿಮಾ ಬಂದಿರುವ ವಿಚಾರ ನಿಮಗೆ ನೆನಪಿರಬಹುದು. ಆ ಚಿತ್ರದಲ್ಲಿ ನಾಯಕರಾಗಿ ನಟಿಸಿದ್ದ ಜಯಪ್ರಕಾಶ್‌ ಈಗ ಮತ್ತೆ ಸಿನಿಮಾವೊಂದರಲ್ಲಿ ನಾಯಕರಾಗಿ ನಟಿಸುತ್ತಿದ್ದಾರೆ. ಅದು “ಜೈಹೋ ಪರಬ್ರಹ್ಮ’ ಎಂಬ ಸಿನಿಮಾದಲ್ಲಿ ನಟಿಸಲು ಅಣಿಯಾಗಿದ್ದಾರೆ. ಈಗಾಗಲೇ ಬಹುತೇಕ ಎಲ್ಲವೂ ಅಂತಿಮವಾಗಿದ್ದು, ಸದ್ಯದಲ್ಲೇ ಚಿತ್ರ ಸೆಟ್ಟೇರಲಿದೆ.

ಸಂಜಯ್‌ ಈ ಚಿತ್ರದ ನಿರ್ದೇಶಕರು. ಸಸ್ಪೆನ್ಸ್‌, ಥ್ರಿಲ್ಲರ್‌ ಕಥೆಯನ್ನು ಹೊಂದಿರುವ ಈ ಚಿತ್ರದಲ್ಲಿ ನಿಧಿ ಶೋಧ ಕೂಡಾ ಪ್ರಮುಖ ಅಂಶವಾಗಿದೆಯಂತೆ. ಈ ಸನ್ನಿವೇಶದಲ್ಲಿ ಅಘೋರಿಗಳು ಕೂಡಾ ಪ್ರಮುಖ ಪಾತ್ರ ನಿರ್ವಹಿಸಲಿದ್ದಾರಂತೆ. ಇನ್ನು, ಈ ಚಿತ್ರದ ನಿರೂಪಣೆ ಕೂಡಾ ಹೊಸ ಬಗೆಯಿಂದ ಕೂಡಿರುತ್ತದೆ ಎಂಬುದು ಚಿತ್ರತಂಡದ ಮಾತು. 

ಚಿತ್ರವನ್ನು ಚೇತನ್‌ ರಮೇಶ್‌ ನಿರ್ಮಿಸುತ್ತಿದ್ದಾರೆ. ಈ ಹಿಂದೆ “ಜಮಾನ’ ಚಿತ್ರ ನಿರ್ಮಿಸಿದ ಚೇತನ್‌ ರಮೇಶ್‌ ಈಗ ಪರಬ್ರಹ್ಮನತ್ತ ಮುಖ ಮಾಡಿದ್ದಾರೆ. ಈ ಚಿತ್ರದಲ್ಲಿ ಹೊಸ ಹೊಸ ಲೊಕೇಶನ್‌ಗಳನ್ನು ತೋರಿಸುವ ಇರಾದೆ ಕೂಡಾ ಚಿತ್ರತಂಡಕ್ಕಿದೆ. ಉಳಿದಂತೆ ಚಿತ್ರದಲ್ಲಿ ಆಶೀಶ್‌ ವಿದ್ಯಾರ್ಥಿ, ಆಯೇಷಾ ಪ್ರಮುಖ ಪಾತ್ರ ಮಾಡುತ್ತಿದ್ದಾರೆ.