ತೆರೆಯತ್ತ ‘ಕೈ ಜಾರಿದ ಪ್ರೀತಿ’

Team Udayavani, Jan 8, 2023, 4:13 PM IST

ಅಪ್ಪಟ ಪ್ರೇಮಕಥಾಹಂದ ಹೊಂದಿರುವ “ಕೈ ಜಾರಿದ ಪ್ರೀತಿ’ ಸಿನಿಮಾದ ಟ್ರೇಲರ್‌ ಇತ್ತೀಚೆಗೆ ಬಿಡುಗಡೆಯಾಯಿತು. ಚೈತ್ರಾ ಮೂವೀಸ್‌’ ಬ್ಯಾನರ್‌ನಲ್ಲಿ ನಿರ್ಮಾಣವಾಗಿರುವ ಈ ಸಿನಿಮಾಕ್ಕೆ ಪುಷ್ಪಾ ಭದ್ರಾವತಿ ಕಥೆ, ಚಿತ್ರಕಥೆ, ಸಂಭಾಷಣೆ, ಸಾಹಿತ್ಯ ಬರೆದು ನಿರ್ಮಾಣ ಮತ್ತು ನಿರ್ದೇಶನ ಮಾಡಿದ್ದಾರೆ.

ಇದೇ ವೇಳೆ ಚಿತ್ರದ ಕಥಾಹಂದರ ಬಗ್ಗೆ ಮಾತನಾಡಿದ ನಿರ್ದೇಶಕಿ ಪುಷ್ಪಾ, “ಕಥಾ ನಾಯಕಿ ಜಿಲ್ಲಾಧಿಕಾರಿ ಹೆಂಡತಿ. ದುರದೃಷ್ಟವಶಾತ್‌ ಪತಿ ಅಪಘಾತದಿಂದ ಮರಣ ಹೊಂದಿರುತ್ತಾನೆ. ಚಿಕ್ಕ ಮಗುವಿನೊಂದಿಗೆ ಜೀವನ ನಡೆಸಲು ಕೆಲಸಕ್ಕೆ ಹೋಗುತ್ತಿರುತ್ತಾಳೆ. ಅಲ್ಲಿರುವ ಸ್ಥಳೀಯ ನಾಲ್ಕು ಪುಂಡರು ಇವಳ ಹಿಂದೆ ಬೀಳುತ್ತಾರೆ. ಅದರಲ್ಲೊಬ್ಬ ಅಂದರೆ ಕಥಾ ನಾಯಕ ಈಕೆಯ ಕಷ್ಟವನ್ನು ಕಂಡು ಮದುವೆ ಮಾಡಿಕೊಳ್ಳುತ್ತಾನೆ. ಇವನು ಎಷ್ಟು ಪ್ರೀತಿ ಮಾಡುತ್ತಿದ್ದರೂ ಆಕೆಯಿಂದ

ಸರಿಯಾದ ಸ್ಪಂದನೆ ಸಿಗುತ್ತಿರುವುದಿಲ್ಲ. ಒಮ್ಮೆ ನಡೆಯಬಾರದ ಘಟನೆ ನಡೆದುಹೋಗುತ್ತದೆ. ಇದರಿಂದ ವಿಚಲಿತನಾಗುವ ಆತ ಮುಂದೇನು ಮಾಡುತ್ತಾನೆ ಎನ್ನುವುದೇ ಸಿನಿಮಾದ ಕ್ಲೈಮ್ಯಾಕ್ಸ್‌’ ಎಂದು ವಿವರಣೆ ನೀಡಿದರು.

“ಕೈ ಜಾರಿದ ಪ್ರೀತಿ’ ಸಿನಿಮಾದಲ್ಲಿ ಮಂಜುಶ್ರೀ ಶೆಟ್ಟಿ ಕೆ. ಆರ್‌ ಮತ್ತು ಮಧುಶೆಟ್ಟಿ ಕೆ. ಆರ್‌ ನಾಯಕಿಯಾಗಿ ಕಾಣಿಸಿಕೊಂಡಿದ್ದಾರೆ. ಚೇತನ್‌ ಕೃಷ್ಣನ್‌ ಮತ್ತು ಸನತ್‌ ಚಿತ್ರದಲ್ಲಿ ನಾಯಕರಾಗಿದ್ದು ಉಳಿದಂತೆ ಹಿರಿಯ ನಟ ಸುಮನ್‌, ಡ್ಯಾನಿ ಕುಟ್ಟಪ್ಪ, ಕೋಟೆ ಪ್ರಭಾಕರ್‌, ಭುವನ್‌ ಗೌಡ, ನಾಗೇಂದ್ರ ಅರಸ್‌, ನಾರಾಯಣ ಸ್ವಾಮಿ, ಬಾಬು ಹಿರಣಯ್ಯ, ಆಶಿತಾ ಮೊದಲಾದವರು ಚಿತ್ರದ ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ. ಚಿತ್ರಕ್ಕೆ ಆರ್‌. ಗಿರಿ ಛಾಯಾಗ್ರಹಣ, ಗಂಧರ್ವ ಸಂಗೀತ ಸಂಯೋಜನೆಯಿದೆ.