ಆಟೋಡ್ರೈವರ್ ಗೆಟಪ್ ನಲ್ಲಿ ವಿಜಯ್; ಕನಕ ಚಿತ್ರದ ಫಸ್ಟ್ ಲುಕ್

Team Udayavani, Mar 2, 2017, 3:23 PM IST

ಶಿವರಾತ್ರಿ ದಿನ ಆರ್‌.ಚಂದ್ರು ನಿರ್ಮಾಣ, ನಿರ್ದೇಶನದ, ವಿಜಯ್‌ ನಾಯಕರಾಗಿರುವ “ಕನಕ’ ಚಿತ್ರದ ಫೋಟೋಶೂಟ್‌ ನಗರದ ವಿವಿಧ ರಸ್ತೆಗಳಲ್ಲಿ, ರೈಲ್ವೇ ನಿಲ್ದಾಣ ಅಕ್ಕಪಕ್ಕ ನಡೆಯಲಿದೆ ಎಂಬ ಸುದ್ದಿಯನ್ನು ಈ ಹಿಂದೆ ನೀವು ಇದೇ ಬಾಲ್ಕನಿಯಲ್ಲಿ ಓದಿದ್ದೀರಿ. ಅದರಂತೆ ಚಂದ್ರು ಫೋಟೋಶೂಟ್‌ ಮಾಡಿದ್ದಾರೆ.

ವಿಜಯ್‌ಗೆ ಆಟೋ ಡ್ರೈವರ್‌ ಗೆಟಪ್‌ ಹಾಕಿಸಿ ವಿಭಿನ್ನವಾಗಿ ಫೋಟೋಶೂಟ್‌ ಮಾಡುವ ಮೂಲಕ ಸಿ ನಿಮಾಕ್ಕೆ ಅಣಿಯಾಗಿದ್ದಾರೆ ಚಂದ್ರು. ಅದರ ಫ‌ಸ್ಟ್‌ಲುಕ್‌ ಇಲ್ಲಿದೆ. ಬೆಂಗಳೂರಿನ ಪ್ರಮುಖ ಏರಿಯಾಗಳಲ್ಲಿ. ಹೆಚ್ಚು ಜನ ಸೇರುವ ಮೆಜೆಸ್ಟಿಕ್‌, ಕಂಟೋನ್ಮೆಂಟ್‌, ಎಂ.ಜಿ.ರಸ್ತೆ ಸೇರಿದಂತೆ ನಗರದ ಹಲವೆಡೆ “ಕನಕ’ ಚಿತ್ರದ ಫೋಟೋಶೂಟ್‌ ಮಾಡಲಾಗಿದೆ. 

ಕನಕ’ ಚಿತ್ರದಲ್ಲಿ ವಿಜಯ್‌ ಆಟೋ ಡ್ರೈವರ್‌ ಆಗಿ ನಟಿಸುತ್ತಿದ್ದಾರೆ. ಅಲ್ಲಿಗೆ ಇದು ಕೂಡಾ ಕಾಮನ್‌ಮ್ಯಾನ್‌ ಸಬ್ಜೆ ಕ್ಟ್ ಎಂದು ಪ್ರತ್ಯೇಕವಾಗಿ ಹೇಳುವ ಅಗತ್ಯವಿಲ್ಲ. ಆಟೋ ಡ್ರೈವರ್‌ಗಳು ಬಸ್‌, ರೈಲ್ವೇ ನಿಲ್ದಾಣಗಳ ಸುತ್ತ ಪ್ರಯಾಣಿಕರಿಗಾಗಿ ಕಾಯುತ್ತಿರುತ್ತಾರೆ. ಹಾಗಾಗಿ, ಫೋಟೋಶೂಟ್‌ ಸಹಜವಾಗಿ ಮೂಡಿಬರಬೇಕೆಂಬ ಕಾರಣದಿಂದಲೇ “ಕನಕ’ ಚಿತ್ರದ ಫೋಟೋಶೂಟ್‌ ಅನ್ನು ಜನನಿಬಿಡ ಜಾಗಗಳಲ್ಲಿ ಮಾಡಿದ್ದಾರೆ.

ಚಿತ್ರಕ್ಕೆ ಸಾನ್ವಿ ಶ್ರೀವಾಸ್ತವ್‌ ನಾಯಕಿಯಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ. ಈಗಾಗಲೇ “ಚಂದ್ರಲೇಖಾ’,  ಮಾಸ್ಟರ್‌ಪೀಸ್‌’, “ಭಲೇಜೋಡಿ’, “ಸುಂದರಾಂಗ ಜಾಣ’ ಚಿತ್ರಗಳಲ್ಲಿ ನಟಿಸಿರುವ ಹಾಗೂ “ಸಾಹೇಬ’, “ಮಫ್ತಿ’ ಚಿತ್ರಗಳಲ್ಲಿ ಬಿಝಿಯಾಗಿರುವ ಸಾನ್ವಿ ಜೊತೆ ಮಾತುಕತೆ ನಡೆದಿದ್ದು, ಸಾನ್ವಿ ಕೂಡಾ “ಕನಕ’ ತಂಡ ಸೇರಲಿದ್ದಾರೆಂಬ ಮಾಹಿತಿ ಇದೆ. ಚಿತ್ರದ ಚಿತ್ರೀಕರಣ ಮಾರ್ಚ್‌ 6 ರಿಂದ ನಡೆಯಲಿದೆ.