ಕನ್ನಡ ನಟಿ ತಮಿಳು ಬಿಗ್‌ಬಾಸ್‌ ಮನೆಯಲ್ಲಿ ಪತ್ತೆ!

Team Udayavani, Jun 26, 2019, 3:01 AM IST

ಸಾಮಾನ್ಯವಾಗಿ ಕನ್ನಡ ನಟಿಯರು ತೆಲುಗು, ತಮಿಳು, ಮಲಯಾಳಂ ಹಿಂದಿ ಸೇರಿದಂತೆ ಇನ್ನಿತರೆ ಭಾಷೆಗಳ ಚಿತ್ರಗಳಲ್ಲಿ ನಟಿಸುತ್ತಿರುವುದು ಗೊತ್ತೇ ಇದೆ. ಆದರೆ, ಇಲ್ಲೊಬ್ಬ ಅಪ್ಪಟ ಕನ್ನಡದ ನಟಿ ತಮಿಳು ಬಿಗ್‌ಬಾಸ್‌ ಮನೆಯಲ್ಲಿ ಪತ್ತೆಯಾಗಿದ್ದಾರೆ!

ಹೌದು, ಕನ್ನಡದ ಆ ನಟಿ ಬೇರಾರೂ ಅಲ್ಲ, ಶೆರೀನ್‌. ಇಷ್ಟಕ್ಕೂ ಯಾರು ಈ ಶೆರೀನ್‌ ಎಂಬ ಪ್ರಶ್ನೆ ಎದುರಾಗಬಹುದು. ಈ ಹಿಂದೆ ದರ್ಶನ್‌ ಅಭಿನಯದ “ಧ್ರುವ ‘ ಚಿತ್ರದಲ್ಲಿ ದರ್ಶನ್‌ ಜೊತೆ ನಾಯಕಿಯಾಗಿ ಕಾಣಿಸಿಕೊಂಡ ಬೆಡಗಿ ಈ ಶೆರೀನ್‌.

ಅಷ್ಟೇ ಅಲ್ಲ, ದರ್ಶನ್‌ ಅವರ 25 ನೇ ಚಿತ್ರ “ಭೂಪತಿ’ ಚಿತ್ರದಲ್ಲೂ ಶೆರೀನ್‌ ಅವರು ದರ್ಶನ್‌ ಅವರ ಜೊತೆ ನಾಯಕಿಯಾಗಿ ನಟಿಸಿದ್ದರು. ಆ ಬಳಿಕ ಅವರು “ಸಿಹಿಗಾಳಿ’ ಮತ್ತು “ಎಕೆ 57′ ಚಿತ್ರಗಳಲ್ಲೂ ನಟಿಸಿದ್ದರು. ಆ ಬಳಿಕ ಶೆರೀನ್‌ ಎಲ್ಲೂ ಕಾಣಿಸಿಕೊಳ್ಳಲಿಲ್ಲ.

ಹಾಗಂತ, ಅವರಿಗೆ ಅವಕಾಶಗಳು ಇರಲಿಲ್ಲವೆಂದಲ್ಲ, ಕನ್ನಡದಿಂದ ಅವರಿಗೆ ತಮಿಳು, ತೆಲುಗು ಹಾಗು ಮಲಯಾಳಂ ಚಿತ್ರಗಳಲ್ಲೂ ನಟಿಸುವ ಅವಕಾಶ ಹುಡುಕಿ ಬಂತು. ಅತ್ತ ತಿರುಗಿ ನೋಡಿದ ಶೆರೀನ್‌, ಅಲ್ಲೇ ಒಂದಷ್ಟು ಚಿತ್ರಗಳಲ್ಲಿ ಬಿಝಿಯಾದರು.

ಈ ನಡುವೆ ಅವರು ತಮಿಳಿನ ಮೂರನೇ ಆವೃತ್ತಿಯ ಬಿಗ್‌ಬಾಸ್‌ ರಿಯಾಲಿಟಿ ಶೋಗೂ ಎಂಟ್ರಿಕೊಟ್ಟಿದ್ದಾರೆ ಎಂಬುದೇ ವಿಶೇಷ. ಕನ್ನಡ ನಟಿಯರಿಗೆ ಪರಭಾಷೆ ಚಿತ್ರಗಳಲ್ಲಿ ನಟಿಸುವುದು ಖುಷಿಯ ವಿಷಯವಂತೂ ಹೌದು. ಆದರೆ, ತಮಿಳು ಬಿಗ್‌ಬಾಸ್‌ನಲ್ಲಿ ಅವಕಾಶ ಗಿಟ್ಟಿಸಿಕೊಳ್ಳುವುದು ದೊಡ್ಡ ಸಾಹಸವೇ ಹೌದು.

ಬೆಂಗಳೂರಿನ ಹುಡುಗಿಯಾಗಿರುವ ನಟಿ ಶೆರೀನ್‌, ಕನ್ನಡದಲ್ಲಿ ಬೆರಳೆಣಿಕೆ ಚಿತ್ರಗಳಲ್ಲಿ ನಟಿಸಿದರೂ ತಕ್ಕಮಟ್ಟಿಗೆ ಗುರುತಿಸಿಕೊಂಡು, ತಮಿಳು, ತೆಲುಗು ಚಿತ್ರರಂಗದತ್ತ ಮುಖ ಮಾಡಿದರು. ಈಗ ಶೆರೀನ್‌ ಇತ್ತೀಚೆಗಷ್ಟೇ ಶುರುವಾಗಿರುವ ತಮಿಳು ಬಿಗ್‌ಬಾಸ್‌ ಮನೆ ಪ್ರವೇಶಿಸಿದ್ದಾರೆ ಎಂಬುದೇ ವಿಶೇಷ.

ಇನ್ನೊಂದು ವಿಶೇಷವೆಂದರೆ, ತಮಿಳು ಬಿಗ್‌ಬಾಸ್‌ ಕಾರ್ಯಕ್ರಮವನ್ನು ಕಮಲ್‌ಹಾಸನ್‌ ನಿರೂಪಣೆ ಮಾಡುತ್ತಿದ್ದಾರೆ. ಅದೇನೆ ಇರಲಿ, ಕನ್ನಡದ ನಟಿಯೊಬ್ಬರು, ತಮಿಳು ಬಿಗ್‌ಬಾಸ್‌ ಮನೆಯಲ್ಲಿ ಸದ್ದು ಮಾಡುತ್ತಿರುವುದು ಸದ್ಯದ ಮಟ್ಟಿಗೆ ಹೊಸ ಬೆಳವಣಿಗೆಯಂತೂ ಹೌದು.