ಕನ್ನಡ ರ್ಯಾಪರ್‌ನ ಸ್ನೇಹದ ಹಾಡು!

Team Udayavani, Aug 23, 2017, 10:39 AM IST

ಗುರುನಂದನ್‌ ಹೀರೋ ಆಗಿರುವ “ರಾಜು ಕನ್ನಡ ಮೀಡಿಯಂ’ ಚಿತ್ರದಲ್ಲಿ ಸುದೀಪ್‌ ವಿಶೇಷ ಪಾತ್ರವೊಂದರಲ್ಲಿ ನಟಿಸಿರೋದು ನಿಮಗೆ ಗೊತ್ತೇ ಇದೆ. ಸಖತ್‌ ಸ್ಟೈಲಿಶ್‌ ಲುಕ್‌ನಲ್ಲಿ ಕಾಣಿಸಿಕೊಂಡ ಸುದೀಪ್‌ ಆವರ ಫೋಟೋಗಳು ಎಲ್ಲೆಡೆ ಓಡಾಡುವ ಜೊತೆಗೆ “ಕನ್ನಡ ಮೀಡಿಯಂ’ ಒಳ್ಳೆಯ ಮೈಲೇಜ್‌ ಸಿಕ್ಕಿದ್ದು ಸುಳ್ಳಲ್ಲ. ಈಗ ಮತ್ತೂಬ್ಬರು ಈ ಚಿತ್ರದಲ್ಲಿ ಗೆಸ್ಟ್‌ ಅಪಿಯರೆನ್ಸ್‌ ಮಾಡಿದ್ದಾರೆ. ಅದು ಚಂದನ್‌ ಶೆಟ್ಟಿ. 

ರ್ಯಾಪ್‌ ಸಾಂಗ್‌ ಮೂಲಕ ಜನಪ್ರಿಯರಾದ ಚಂದನ್‌ ಶೆಟ್ಟಿ ಈಗಾಗಲೆ ಕೆಲವು ಚಿತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಈಗ “ರಾಜು ಕನ್ನಡ ಮೀಡಿಯಂ’ ಸರದಿ. ಈ ಚಿತ್ರದ ವಿಶೇಷವೆಂದರೆ ಚಿತ್ರದ ಹಾಡೊಂದನ್ನು ಚಂದನ್‌ ಶೆಟ್ಟಿ ಬರೆದು, ಹಾಡುವ ಜೊತೆಗೆ ಆ ಹಾಡಿನಲ್ಲಿ ತಾವೇ ಕಾಣಿಸಿಕೊಂಡಿದ್ದಾರೆ. ಇತ್ತೀಚೆಗೆ ಈ ಹಾಡಿನ ಚಿತ್ರೀಕರಣ ಚಿಕ್ಕಮಗಳೂರು ಸುತ್ತಮುತ್ತ ನಡೆದಿದೆ.

ಸನ್ನಿವೇಶಕ್ಕನುಗುಣವಾದ ಹಾಡು ಇದಾಗಿದ್ದು, ಚಂದನ್‌ ಶೆಟ್ಟಿ ಸಖತ್‌ ಸ್ಟೈಲಿಶ್‌ ಆಗಿ ಕಾಣಿಸಿಕೊಂಡಿದ್ದಾರೆಂಬುದು ಚಿತ್ರತಂಡದ ಮಾತು. “ನೆಂಟ್ರಾ ಬರ್ತಾರೆ ನೆಟ್ಟಗಿದ್ದಾಗ … ಫ್ರೆಂಡ್ಸ್‌ ಬರ್ತಾರೆ ನೀ ಸೋತಾಗ … ಸ್ನೇಹ ಪ್ರೀತಿ ಜೊತೆಗಿದ್ದಾಗ, ಬರದು ಸ್ವಾಮಿ ಯಾವ ರೋಗ …’ ಎಂಬ ಹಾಡನ್ನು ಸ್ವತಃ ಚಂದನ್‌ ಶೆಟ್ಟಿ ಬರೆದು, ಹಾಡಿ ಕುಣಿದಿದ್ದಾರೆ. 

ಸದ್ಯ ಚಿತ್ರದ ಹಾಡುಗಳು ಮಾರುಕಟ್ಟೆಗೆ ಬಂದಿದ್ದು, ಹಾಡುಗಳಿಗೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿರುವ ಖುಷಿ ಚಿತ್ರತಂಡದ್ದು. ಈ ಚಿತ್ರವನ್ನು ನರೇಶ್‌ ನಿರ್ದೇಶನ ಮಾಡಿದ್ದಾರೆ. ಇನ್ನು, ಕೆ.ಎ.ಸುರೇಶ್‌ ಈ ಸಿನಿಮಾದ ನಿರ್ಮಾಪಕರು. “ಶಿವಲಿಂಗ’ ಚಿತ್ರದ ಯಶಸ್ಸಿನ ನಂತರ ಅವರು ಮಾಡುತ್ತಿರುವ ಸಿನಿಮಾವಿದು. ಅವಂತಿಕಾ ಶೆಟ್ಟಿ ಈ ಚಿತ್ರದ ನಾಯಕಿ. ಚಿತ್ರಕ್ಕೆ ಕಿರಣ್‌ ರವೀಂದ್ರನಾಥ್‌ ಸಂಗೀತ, ಶೇಖರ್‌ಚಂದ್ರ ಛಾಯಾಗ್ರಹಣವಿದೆ.