ಕೋವಿಡ್ 19 ಮಧ್ಯೆ ಕರಾಬು ಸಾಂಗ್‌

ಮಾ.27 ಪೊಗರು ಮೊದಲ ಹಾಡು

Team Udayavani, Mar 21, 2020, 7:05 AM IST

ಕೋವಿಡ್ 19 ಎಫೆಕ್ಟ್ನಿಂದಾಗಿ ಸದ್ಯ ಕನ್ನಡ ಚಿತ್ರರಂಗ ಕೂಡಾ ಸ್ತಬ್ಧವಾಗಿದೆ. ಸಿನಿಮಾ ಕುರಿತಾದ ಯಾವುದೇ ಚಟುವಟಿಕೆಗಳು ನಡೆಯುತ್ತಿಲ್ಲ. ಈ ಸಂದರ್ಭದಲ್ಲಿ ಚಿತ್ರವೊಂದು ಸದ್ದು ಮಾಡಲು ಬರುತ್ತಿದೆ. ಹಾಗಂತ ಸಿನಿಮಾ ಬಿಡುಗಡೆಯಾಗುತ್ತಿಲ್ಲ. ಬದಲಾಗಿ ಹಾಡೊಂದು ಬಿಡುಗಡೆಯಾಗುತ್ತಿದೆ. ಅದು “ಪೊಗರು’ ಚಿತ್ರದ್ದು. ಹೌದು, ಧ್ರುವಸರ್ಜಾ ಅಭಿನಯದ “ಪೊಗರು’ ಸದ್ಯಕ್ಕೆ ನಿರೀಕ್ಷೆ ಹೆಚ್ಚಿಸಿರುವ ಚಿತ್ರ.

ಈಗಾಗಲೇ ತನ್ನ ಪೋಸ್ಟರ್‌ ಹಾಗು ಡೈಲಾಗ್‌ ಟೀಸರ್‌ ಮೂಲಕವೇ ದೊಡ್ಡ ನಿರೀಕ್ಷೆ ಹೆಚ್ಚಿಸಿದ್ದ “ಪೊಗರು’ ಈಗ ಮತ್ತೂಂದು ಹೊಸ ಕುತೂಹಲ ಮೂಡಿಸಿದೆ. ಹೌದು, ಬಿಡುಗಡೆಗೆ ಸಜ್ಜಾಗುತ್ತಿರುವ ಈ ಚಿತ್ರದ ಮೊದಲ ಹಾಡೊಂದು ಬಿಡುಗಡೆಗೆ ಕಾದಿದೆ. ಮಾ.27 ರಂದು “ಕರಾಬು’ ಎಂಬ ಹಾಡನ್ನು ಆನಂದ್‌ ಆಡಿಯೋ ಯುಟ್ಯೂಬ್‌ ಚಾನೆಲ್‌ ಮೂಲಕ ಬಿಡುಗಡೆ ಮಾಡಲು ಚಿತ್ರತಂಡ ನಿರ್ಧರಿಸಿದೆ.

ಎಲ್ಲಾ ಅಂದುಕೊಂಡಂತೆ ನಡೆದಿದ್ದರೆ, ಮಾರ್ಚ್‌ನಲ್ಲೇ “ಪೊಗರು’ ಪ್ರೇಕ್ಷಕರ ಎದುರು ಬರಲಿದೆ ಎಂದೇ ಹೇಳಲಾಗಿತ್ತು. ಆದರೆ, ಚಿತ್ರೀಕರಣ ಕೊಂಚ ತಡವಾದ್ದರಿಂದ ಬಿಡುಗಡೆ ಕೂಡ ತಡವಾಗುತ್ತಿದೆ. ಸದ್ಯಕ್ಕೆ ಈಗ “ಕರಾಬು…’ ಎಂಬ ಹಾಡು ಬಿಡುಗಡೆ ಮಾಡಿ ಆ ನಂತರ ಚಿತ್ರದ ಬಗ್ಗೆ ಇನ್ನಷ್ಟು ನಿರೀಕ್ಷೆ ಹೆಚ್ಚಿಸಿ ಬಿಡುಗಡೆ ಮಾಡುವ ಯೋಚನೆ ಚಿತ್ರತಂಡಕ್ಕಿದೆ.

#pogaru ?????
ಜೈ ಆಂಜನೇಯ ?? pic.twitter.com/1EQaudsFiZ
— Dhruva Sarja (@DhruvaSarja) March 18, 2020

ನಿರ್ದೇಶಕ ನಂದಕಿಶೋರ್‌ ಸದ್ಯಕ್ಕೆ ಚಿತ್ರ ಹಾಡು ಬಿಡುಗಡೆಯ ಬಿಝಿಯಲ್ಲಿದ್ದಾರೆ. ಧ್ರುವ ಸರ್ಜಾ ಅವರ ಸಿನಿಮಾಗಳು ತುಂಬ ತಡವಾಗಿ ಬಿಡುಗಡೆಯಾಗುತ್ತವೆ ಅನ್ನೋದು ಎಲ್ಲರಿಗೂ ಗೊತ್ತು. ಸ್ವತಃ ಅವರ ಅಭಿಮಾನಿಗಳೇ ಈ ಬಾರಿ “ಪೊಗರು’ ಆದಷ್ಟು ಬೇಗ ಬರಲಿದೆ ಎಂಬ ಖುಷಿಯಲ್ಲಿದ್ದರು. ಆದರೆ, ಚಿತ್ರ ಮಾತ್ರ ಇನ್ನು ಬಿಡುಗಡೆಯ ಲಕ್ಷಣ ಕಾಣುತ್ತಿಲ್ಲ.