ಕಸ್ತೂರಿ ನಿವಾಸ ಬದಲು ಕಸ್ತೂರಿ ಮಹಲ್‌

Team Udayavani, Sep 14, 2020, 4:11 PM IST

ಕೆಲ ದಿನಗಳ ಹಿಂದಷ್ಟೇ ಹಿರಿಯ ನಿರ್ದೇಶಕ ದಿನೇಶ್‌ ಬಾಬು ತಮ್ಮ ಹೊಸಚಿತ್ರಕ್ಕೆ “ಕಸ್ತೂರಿ ನಿವಾಸ’ ಅಂಥ ಟೈಟಲ್‌ ಇಟ್ಟಿದ್ದರು. ಆನಂತರ ಆ ಟೈಟಲ್‌ ಬಗ್ಗೆ ಒಂದಷ್ಟು ಮಂದಿ ತಗಾದೆ ತೆಗೆದಿದ್ದರಿಂದ, ದಿನೇಶ್‌ ಬಾಬು ಆ್ಯಂಡ್‌ ಟೀಮ್‌ ತಮ್ಮ ಹೊಸಚಿತ್ರಕ್ಕೆ “ಕಸ್ತೂರಿ ನಿವಾಸ’ ಟೈಟಲ್‌ ಬದಲಾಯಿಸಿ ಹೊಸ ಟೈಟಲ್‌ ಇಡುವುದಾಗಿ ಘೋಷಿಸಿದ್ದರು.

ಅದರಂತೆ ಈಗ ನಿರ್ದೇಶಕ ದಿನೇಶ್‌ ಬಾಬು ಮತ್ತು ಚಿತ್ರತಂಡ, ತಮ್ಮ ಚಿತ್ರಕ್ಕೆ ಹೊಸ ಹೆಸರಿಟ್ಟಿದೆ. ಅಂದಹಾಗೆ, ಆ ಹೊಸ ಹೆಸರು “ಕಸ್ತೂರಿ ಮಹಲ್‌” ಕಸ್ತೂರಿ ಮತ್ತು ಮನೆ ಎರಡು ಈ ಚಿತ್ರದ ಹೈಲೈಟ್ಸ್‌ ಆಗಿರುವುದರಿಂದ, ಈ ಎರಡು ವಿಷಯಗಳನ್ನು ಬಿಟ್ಟು ಚಿತ್ರದ ಟೈಟಲ್‌ ಇಟ್ಟರೆ ಅದಕ್ಕೆ ಅರ್ಥವಿರುವುದಿಲ್ಲ. ಹಾಗಾಗಿ ಈ ಎರಡು ವಿಷಯಗಳನ್ನು ಇಟ್ಟುಕೊಂಡು, ಜೊತೆಗೆ ಹಿಂದೆ ಇಟ್ಟಿದ್ದ ಟೈಟಲ್‌ ಅನ್ನೂ ಬದಲಾಯಿಸಿಕೊಂಡು “ಕಸ್ತೂರಿ ಮಹಲ್’ ಅಂಥ ಹೊಸ ಹೆಸರಿಟ್ಟಿದ್ದೇವೆ ಎಂದಿದೆ ಚಿತ್ರತಂಡ. ಇನ್ನು ರಚಿತಾ ರಾಮ್‌ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿರುವ ಈ ಚಿತ್ರದಲ್ಲಿ, ಸ್ಕಂದ ಅಶೋಕ್‌, ರಂಗಾಯಣ ರಘು, ನಾರಾಯಣ ಸ್ವಾಮಿ ಮೊದಲಾದವರು ಈ ಚಿತ್ರದ ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸುತ್ತಿದ್ದಾರೆ. ಹೊಸದಾಗಿ ಹೆಸರು

ಬದಲಾಯಿಸಿಕೊಂಡಿರುವ “ಕಸ್ತೂರಿ ಮಹಲ್’ ಚಿತ್ರದ ಚಿತ್ರೀಕರಣ ಇದೇ ಅಕ್ಟೋಬರ್‌ 5ರಿಂದ ಚಿಕ್ಕಮಗಳೂರು ಜಿಲ್ಲೆಯ ಮೂಡಿಗೆರೆ, ಕೊಟ್ಟಿಗೆಹಾರ ಸುತ್ತಮುತ್ತಲಿನ ಸುಂದರ ತಾಣಗಳಲ್ಲಿ ಶುರುವಾಗಲಿದೆ. ಹಾರರ್‌-ಥ್ರಿಲ್ಲರ್‌ ಕಥಾನಕ ಹೊಂದಿರುವ ಚಿತ್ರವು ನಿರ್ದೇಶಕ ದಿನೇಶ್‌ ಬಾಬು ಅವರ ಐವತ್ತನೇ ಚಿತ್ರವಾಗಿದೆ. “ಶ್ರೀಭವಾನಿ ಆಟ್ಸ್‌’ ಹಾಗೂ “ರುಬಿನ್‌ ರಾಜ್‌ ಪ್ರೊಡಕ್ಷನ್ಸ್‌’ ಬ್ಯಾನರ್‌ನಲ್ಲಿ ಜಂಟಿಯಾಗಿ ನಿರ್ಮಾಣವಾಗುತ್ತಿದೆ. ರವೀಶ್‌ ಆರ್‌. ಸಿ ಹಾಗೂ ರುಬಿನ್‌ ರಾಜ್‌ ಬಂಡವಾಳ ಹೂಡಿ ನಿರ್ಮಿಸುತ್ತಿರುವ ಈ ಚಿತ್ರಕ್ಕೆ ಪಿ.ಕೆ.ಹೆಚ್‌ ದಾಸ್‌ ಛಾಯಾಗ್ರಹಣ ಹಾಗೂ ಸೌಂದರ್‌ ರಾಜ್‌ ಸಂಕಲನವಿದೆ.